ބާރާއި ނުފޫޒު ލިބިފައި އޮތެއް ކަމަކު އެއްވެސް ކަމެއްގައިހެން އެއް ގަލަކަށް ނާރާ 2 ގައުމަކީ އެމެރިކާއާއި ޗައިނާއޭ ދެންނެވުމުން އެކަމާ ދެބަސްވާނީ މަދު މީހެކެވެ. ބައިނަލްއަގުވާމީ އެކި މައިދާންތަކުގައި ޗައިނާއާއި އެމެރިކާގެ ދެބަސްވުންތައް ނުތަނަވަސް ވަމުން ގޮސް، ހަމަ ދެންމެ ދެންމެ ހަނގުރާމައެއް ފަށާފާނެ ކަމުގެ ބިރަށް، ދުނިޔެ އޮންނަނީ ސިހިސިހިއެވެ. އަސްކަރީ ބާރުވެރިކަމާއި މާލީ ތަނަވަސްކަން ލިބިފައި އޮތެއް ކަމަކު، ދެ ގައުމުންކުރެ އެއް ގައުމުވެސް އިސްވެ ހަމަލާއެއް ދިނުމަށް އޮތީ ކިހާ ވަރެއްގެ ފުރުސަތެއް ކަމެއް ކަށަވަރު ކޮށް ދަންނަވަން ނޭނގިދާނެއެވެ.
ޗައިނާގެ އަސްކަރީ މަސްރަހު ދިރާސާ ކުރަމުންދާ އެކަކީ ޗައިނާގެ އެކަޑަމީ އޮފް މިލިޓަރީ ސައެންސަސްގެ އެސޯސިއޭޓް ރިސާޗް ފެލޯއެއް ކަމަށް ވާ ކާއޯ ޖިންގްއެވެ. ކާއޯ ވިދާޅުވާ ގޮތުގައި ޗައިނާއާއި އެމެރިކާގެ އަސްކަރިއްޔާއާ ދެމެދު، ހަމަޖެހޭ ދޭދޭ ގުޅުމެއް ދެމެހެއްޓުމަކީ ދެ ގައުމުގެ މަސްލަހަތަށްވެސް އެކަމުގައި އެންމެ ފައިދާ ބޮޑު ގޮތެވެ. ބައިނަލްއަގުވާމީ މުޖުތަމައު އެދޭނެ ގޮތަކީވެސް އެއީތާއެވެ.
ބައިނަލްއަގުވާމީ ފެންވަރުގައި ކުރިއަށްގެންދާ އެންމެ ވަރުގަދަ އެއް ސެކިއުރިޓީ ކޮންފަރެންސް ނުވަތަ ޝަންގްރިއްލާ ޑައެލޮގްސްގެ 19 ވަނަ ބައްދަލުވުމަށް ވަޑައިގަތުމުގެ ކުރިން، ޗައިނާގެ ސްޓޭޓް ކައުންސިލާ އަދި ދިފާއީ ވަޒީރު ވޭއީ ފެންގްހޭ އާއި އެމެރިކާގެ ދިފާއީ ވަޒީރު ލޮއިޑް އޮސްޓިން ވަނީ މަޝްވަރާތަކެއް ކުރިއަށް ގެންދަވާފައެވެ.
ކާއޯ ވިދާޅުވާ ގޮތުގައި ދެ ގައުމުގެ ދިފާއީ އޮފިޝަލުން، މޫނާއި މޫނު ފެންނަ ގޮތަށް ބައްދަލު ކުރެއްވުމަކީ އިންތިހާއަށް މުހިންމު ކަމެކެވެ. އެފަދަ ބައްދަލުވުމަކީ ދޭދޭ ގުޅުމަށްވެސް މުހިންމު ކަމެއް ކަމަށް ކާއޯ ވިދާޅުވިއެވެ. އަދި އެއީ ޗައިނާގެ ރައީސް ޝީ ޖީންޕިންގްއާއި އެމެރިކާގެ ރައީސް ޖޯ ބައިޑަންގެ އެއްބަސްވުންތައް ތަންފީޒު ކުރުމަށްވެސް އެޅޭ މުހިންމު ފިޔަވަޅެއް ކަމަށް ކާއޯ ސިފަކުރެއްވިއެވެ.
ދުނިޔޭގެ އެންމެ ވަރުގަދަ 2 އިގުތިސޯދުގެ މަގާމުގައި އޮތް ޗައިނާއާއި އެމެރިކާގެ އަސްކަރިއްޔާއާ ދެމެދު ހަމަޖެހޭ ގުޅުމެއް ބަދަހި ކުރުމަކީ، އެކަމުގެ ފައިދާ، މުޅި ބައިނަލްއަގުވާމީ މުޖުތަމައަށްވެސް ކުރާނެ ކަމެކެވެ.
ދުނިޔޭގައި މިވަގުތު އޮތް އެންމެ ވަރުގަދަ 2 ގައުމުގެ ވިސްނުމުން ބަލާއިރު، ކުރިމަތިލުމަކަށް ދިއުމަށް ވުރެ، ދޭދޭ ގުޅުން ހަރުދަނާ ކުރުމުގެ ފައިދާ، އެމެރިކާއާއި ޗައިނާއަށް ބޮޑު. ކުރިމަތިލުމެއްގެ ގެއްލުން ބޮޑު. އޭގެ މާނައަކީ އެއްވެސް ބަޔަކަށް އަނެއް ބަޔަކު ބައްޔެއް ނުކުރެވޭނެއޭ. ނުވިތާކަށް ބަދަލުވެސް ނުކުރެވޭނެއޭ. ސްޓޭބަލް އަސްކަރީ ގުޅުމެއް ދޭދޭ ފެންވަރުގައި އޮތުމުން 2 ގައުމުގެ މަސްލަހަތަށްވެސް ފައިދާ ބޮޑު. ބައިނަލްއަގުވާމީ މުޖުތަމައުގެ އާންމު ފިކުރަކީވެސް އެއީކާއޯ ޖިންގް؛ އެސޯސިއޭޓް ރިސާޗް ފެލޯ
މި މޭރުމުން ވާހަކަދައްކަވަމުން ކާއޯ ވަނީ ދުނިޔޭގެ އެކި ހިސާބުތަކުގައި ހަރަކާތްތެރިވާ ސުލްހަ ބަލަހައްޓާ މިޝަންތަކަށް، ޗައިނާގެ އަސްކަރިއްޔާއިން ފޯރުކޮށްދޭ އެހީ ފާހަގަ ކުރައްވާފައެވެ. އެގޮތުން އދއިން ހިންގާ ސުލްހަބަލަހައްޓާ މިޝަންތަކުގެ 25 މިޝަންއަކަށް، ޗައިނާއިން 50000 ހިދުމަތްތެރިން ފޮނުވާފައި ވާނެ ކަމަށް ކާއޯ ވިދާޅުވިއެވެ. އަދި ޗައިނާއަކީ ސަރަހައްދީ ސަލާމަތާއި ހަމަޖެހުމަށް މަސައްކަތް ކުރަމުން ދާނެ ގައުމެއް ކަންވެސް އޭނާ ވަނީ ފާހަގަ ކުރައްވާފައެވެ.
އޭޝިއާގެ އެންމެ ވަރުގަދަ ޑިފެންސް ސަމިޓް ނުވަތަ 19 ވަނަ ޝަންގްރިއްލާ ޑައެލޮގްސް، ސިންގަޕޫރުގައި 3 ދުވަހުގެ މުއްދަތަށް ފެށީ، މިދިޔަ ހުކުރު ދުވަހުއެވެ. އެ ސަމިޓްގެ ބައިވެރިންގެ ތެރޭގައި އޭޝިއާ ސަރަހައްދުގެ އިތުރުން ވިލާތާއި އެމެރިކާގެ ދިފާއީ ވަޒީރުންނާއި އަސްކަރީ ލީޑަރުން ބައިވެރިވެވަޑައިގަންނަވައެވެ.
އޭޝިއާ ސަރަހައްދުގައި ޗައިނާއިން ގަދަބަދަވިކަމާއެކު ބިރު ދައްކާ، އަދާވާތްތެރިކަމުގެ އަމަލުތައް ހިންގާ މިންވަރު އިތުރު ކުރަމުން ދިޔަ ކަމުގައިވީ ނަމަވެސް، މަސްރަހު ނުތަނަވަސް ނުކޮށްވޭތޯ ބެލުމަށް، އެމެރިކާއިން އަދާ ކުރަން ޖެހޭ ދައުރު އަދާ ކުރާނެ ކަމަށް، އެމެރިކާގެ ދިފާއީ ވަޒީރު ލޮއިޑް އޮސްޓިން ވަނީ ޝަންގްރިއްލާ ޑައެލޮގްސްގައި ވާހަކަދައްކަވަމުން ފާހަގަ ކުރައްވާފައެވެ. އެމެރިކާއިން އުޅެނީ އިތުރު ކުރިމަތިލުމެއް ނުވަތަ އާ "ފިނި ހަނގުރާމަ" އެއް ކުރަން ނޫން ކަން ސާބިތު ކޮށްދެއްވުމަށް އެމެރިކާގެ ދިފާއީ ވަޒީރު ވަނީ މަސައްކަތް ކުރައްވާފައެވެ. ގޯހެއް ހެދިދާނެ ކަމަށް ބަލާ، މަޝްވަރާއާއި މުއާމަލާތުގެ ހުރިހާ ވިއުގާއެއް ޗައިނާއަށް ހުޅުވާލާފައި ވާނެ ކަމަށްވެސް އެމެރިކާގެ ދިފާއީ ވަޒީރު ވަނީ އިޝާރާތް ކުރައްވާފައެވެ.
