ކުނި މެނޭޖްކުރުމުގެ ދާއިރާއާއި އިތުރު ދެ ދާއިރާއެއްގެ ޕަރފޯމަންސް އޮޑިޓް ހަދަނީ
މި އޮޑިޓުތަކަށް އާންމުންގެ ޚިޔާލު ހޯދަން ވަނީ ހުޅުވާލާފައި
ކުނިތަކެއް
ތިން ދާއިރާއެއްގެ ޕަރފޯމަންސް އޮޑިޓް ހަދަން އޮޑިޓަރ ޖެނެރަލް އޮފީހުން ނިންމައިފިއެވެ.
އޭޖީ އޮފީހުން ޕަރފޯމަންސް އޮޑިޓް ހަދަން ނިންމާފައިވާ ދާއިރާތަކަކީ ތިމާވެށީގެ ގޮތުން ހިމާޔަތްކޮށްފައިވާ ސަރަހައްދުތަކާއި، ސާފު ފެނާއި ނަރުދަމާ ގާއިމްކުރުމުގެ ދާއިރާއާއި، ކުނި މެނޭޖްކުރުމުގެ ދާއިރާއިންނެވެ.
މި ދާއިރާތަކުން ދޭ ޚިދުމަތްތަކުގެ ފެންވަރު ރަނގަޅުކުރުމަށް ހަދާ މި އޮޑިޓްތަކަށް އާންމުން މި ޚިދުމަތްތަކާއިމެދު ދެކޭ ގޮތުގެ ޚިޔާލު ހޯދުމަށް ވަނީ ހުޅުވާލާފައެވެ. މިގޮތުން އާންމުންނަށް ފެންނަ މައްސަލައެއް ވާނަމަ އެކަމެއް ހިއްސާކުރުމަށާއި، އޮޑިޓުގެ ތެރެއިން ވަކިން ޚާއްސަ ސަމާލުކަމެއް ދޭންވީ ބައެއް ވާނަމަ އެބައި ހިއްސާކުރުމަށާއި، އޮޑިޓުން ނެރެން ބޭނުންވާ ނަތީޖާ ހިއްސާކުރުމަށް ވަނީ ހުޅުވާލާފައެވެ. ބޭނުންނަމަ ނަން ހާމަނުކޮށް މިކަމުގައި ބައިވެރިވެވޭނެ ކަމަށް އޭޖީ އޮފީހުން ބުނެފައިވެއެވެ.
އޭޖީ އޮފީހުން ބުނީ މި އޮޑިޓްތަކަކަކީ ކާމިޔާބު އޮޑިޓްތަކަކަށް ހެދުމަށް އާންމުންގެ އެހީތެރިކަން ބޭނުންވާ ކަމަށެވެ.
މި ތިން ދާއިރާއަކީ ރާއްޖޭގެ ތަރައްގީއާ ތިމާވެއްޓާ ގުޅުންހުރި ދާއިރާތަކެކެވެ. މިގޮތުން ރާއްޖޭގެ ރަށްރަށުގައި ފެނާއި ނަރުދަމާ ގާއިމްކުރުމަށް މަސައްކަތްކުރަމުންދާއިރު މިކަންވެސް ތިމާވެއްޓާ ރައްޓެހި ގޮތަކަށް ކުރުމަށް ސަރުކާރުން ޚާއްސަ އިސްކަމެއް ދެއެވެ.
ރާއްޖޭގައި ގިނަ ސަރަހައްދުތަކެއް ހިމާޔަތްކޮށްފައިވާއިރު، މިއީ އިގްތިސާދާވެސް ސީދާ ގުޅުން އޮތް ކަމަކަށް ވާތީ ސަރުކާރުން މަސައްކަތްކުރަމުންދަނީ ވަކި ޚާއްސަ ޕްލޭންތަކެއްގެ ތެރެއިން މިކަން ކުރުމަށެވެ.
މީގެ އިތުރުން، ޒަމާންވީ ކުނީގެ މައްސަލައަށް ހައްލު ހޯދުމަށް ކުނި މެނޭޖްކުރުމުގެ މަސައްކަތް ސަރުކާރުން ފަށާފައިވާއިރު، މި މަސައްކަތް ކުރަމުންދަނީ މިކަމަށް ދާއިމީ ހައްލެއް ހޯދުމަށެވެ. މިގޮތުން ޕްލޭންތަކެއް އެކުލަވާލައި، ގޭބީސީތަކުން ކުނި ނެރޭއިރު ކުނި ވަކިކޮށްގެން ނެރެން މިހާރު ވަނީ އަންގާފައެވެ. މިއީ ކުނިން ހަކަތަ އުފެއްދުމުގެ ނިޒާމަށް ބޭނުންވާ ކޮލިޓީގެ ކުނި ހޯދުމަށް ފަށާފައިވާ މަސައްކަތެކެވެ.
