ޕްޓްރޯލް ލިބެންހުރި ސްޓޭޝަންގެ ނަންތަކާއެކު ހާއްސަ އޮންލައިން ސިސްޓަމެއް ލަންކާގައި ތައާރަފުކޮށްފި
11 ޖޫން 2022 | ހޮނިހިރު 05:41ކޮންމެ ދުވަހެއްގެ ހެނދުނު 09:00 ގައި އެންމެ ފަހުގެ މައުލޫމާތުތައް ވެބްސައިޓަށް އަޕްކުރެވިގެންދާނެ
ކައްކާ ގޭހާއި ކަރާސީން ތެޔޮ ގަތުމަށް މީހުން ކިއުތަކުގައި
ލަންކާގައި ޕެޓްރޯލް ލިބެންހުރި ސްޓޭޝަންތައް އޮންލައިންކޮށް ބަލައިލެވޭ ސިސްޓަމެއް އެގައުމުގެ، ސިލޯން ޕެޓްރޯލިއަމް ސްޓޯރޭޖް ޓަރމިނަލްސް ލިމިޓެޑް (ސީޕީއެސްޓީއެލް) އިން ތައާރަފުކޮށްފިއެވެ.
ލަންކާއަށް ކުރިމަތިވެފައިވާ އިގުތިސާދީ ކާރިސާއާއެކު އެގައުމަށް ވަނީ ތެލުގެ އިމްޕޯޓަށް ޚަރަދުކުރާނެ ގާބިލުކަން ގެއްލިފައެވެ. މިއާއެކު ރައްޔިތުންނަށް ވަނީ ޕެޓްރޯލް އާއި އެހެނިހެން ބާވަތްތަކުގެ ތެޔޮ ހޯދުމަށް ގޮންޖެހުންތަކާ ކުރިމަތިވެފައެވެ. ކޮންމެ ފަހަރަކުވެސް މަދު އަދަދުން ބޭރުގެ އެހީއާއެކު ތެލުގެ ޝިޕްމެންޓްތައް ގައުމަށް ލިބުމުން، އެހޯދުމަށް އެތައް ބަޔަކު ދިގު ކިއުތަކުގައި ޖެހި ގިނަ ވަގުތުތަކެއް އެކަމުގައި ހޭދަކުރެއެވެ.
މިނިމުނު ހަފުތާގެ ތެރޭގައި ގައުމުގެ ބޮޑުވަޒީރު ރަނިލް ވިކްރަމަސިންގހަ ވަނީ ކުރިއަށް އޮތް ދެތިން ހަފުތާގައި ޕެޓްރޯލްގެ ތަދުކަމާ ކުރިމަތިލާން ޖެހޭނެ ކަމަށް ވިދާޅުވެފައެވެ.
ސީޕީއެސްޓީއެލްގެ ވެބްސައިޓުން ސްޓޭޝަންތަކުން ލިބެންހުރި ތެލުގެ ސަޕްލައި، ޕެޓްރޯލް، ޑީސަލް އަދި ކަރާސީންގެ ސަޕްލައި އާއި އެމީހަކު ބޭނުންވާ ތެޔޮ ލިބެންހުރި އެންމެ ކައިރި ސްޓޭޝަންއެއް ބަލާލެވޭނެ ކަމަށް އެކުންފުނިން ބުނެއެވެ. އެހެންކަމުން ސްޓޭޝަންތަކަށް ތެޔޮ ގަތުމަށް ކިއުގައި ޖެހުމުގެ ކުރިން ވެބްސައިޓަށް ވަދެ ޗެކްކުރުމަށް އެކުންފުނިން އިލްތިމާސްކުރެއެވެ.
ކޮންމެ ދުވަހެއްގެ ހެނދުނު 09:00 ގައި އެންމެ ފަހުގެ މައުލޫމާތުތައް ވެބްސައިޓަށް އަޕް ކުރެވިގެންދާނެ ކަމަށް އެކުންފުނިން ބުނެއެވެ.
