ސަސްޕެންޝަނަށްފަހު އެނބުރި އައި ވިކްޓްރީ އާސީޒަނަށް ތައްޔާރުވާން ހިންނަވަރަށް ހިނގައްޖެއެވެ.
ދެވަނަ ޑިވިޝަންގައި ވާދަކުރަން ތައްޔާރުވަމުން އަންނަ ވިކްޓްރީން ހިންނަވަރުގައި 10 ދުވަހުގެ ތަމްރީނު ޕްރޮގްރާމެއް ފުރިހަމަކުރާނެއެވެ. ވިކްޓްރީގެ ޓެކްނިކަލް ޑައިރެކްޓަރ އަދި މެނޭޖަރ މުޙައްމަދު އާދަމް ވިދާޅުވީ ޓްރެއިނިންގ ކޭމްޕަށް ވިކްޓްރީ ހަމަޖެއްސީ އެރަށަކީ ވަޞީލަތްތައް ހުރި އަދި ވިކްޓްރީގެ ސަޕޯޓަރުން ގިނަ ރަށަކަށްވާތީ ކަމަށެވެ. ދެވަނަ ޑިވިޝަންގައި ވާދަކުރަން ވިކްޓްރީ ތައްޔާރުވަނީ ބިދޭސީ ހަތަރު ކުޅުންތެރިންނާއި, ސްރީލަންކާގެ ކޯޗަކާއެކުގައެވެ. ހަތަރު ކުޅުންތެރިންގެ ތެރެއިން އެއް ކުޅުންތެރިއަކީ ކުރިން ރާއްޖޭގައި ކުޅުނު ކުޅުންތެރިއެކެވެ. ކޯޗަކީ ރާއްޖޭގައި ކުޅެ ކޯޗުކަންވެސް ކުރި ލަންކާގެ ޕަކީރު އަލީއެވެ. ޓީމްގައި ހިމެނޭ އެންމެ ތަޖުރިބާ ބޮޑު އެއް ކުޅުންތެރިއަކީ ކުރިން ޤައުމީ ޓީމަށް ކުޅުނު އަހުމަދު އިމާޒު (އާއްކޮ) އެވެ. އާއްކޮ ވަނީ ފުރަތަމަ ޑިވިޝަންގައި ކުޅުން ހުއްޓާލާފައެވެ.
ވިކްޓްރީގެ ޓެކްނިކަލް ޑައިރެކްޓަރ މުޙައްމަދު އާދަމް ވިދާޅުވީ ޓީމްގެ އަމާޒަކަށް އޮތީ ދެ އަހަރުގެ ތެރޭގައި ފުރަތަމަ ޑިވިޝަނަށް އެރުން ކަމަށާއި, މިއަހަރު އެކަން ވެއްޖެނަމަ އެއީ ބޯނަހެއްކަމަށެވެ. މިއަހަރުވެސް އެކުލަވާލެވުނީ ފުރަތަމަ ޑިވިޝަންއަށް އެރޭވަރުގެ ޓީމް އެއްކަމަށް އޭނާ ވިދާޅުވިއެވެ.
ވިކްޓްރީ އެނބުރި އައީ ކުޅުންތެރިންގެ މުސާރަ ނުދިނުމާއި, އިދާރީ މައްސަލަތަކެއްގެ ސަބަބުން 2019 ވަނަ އަހަރު އެޓީމް ކުރި ސަސްޕެންޝަނަށްފަހުއެވެ. ސްކަލްބެގެ ސަސްޕެންޝަން އުވާލާ އަލުން ވާދަކުރުމުގެ ފުރުޞަތު ދިނީ އާބޯޑެއް އިންތިޚާބުވެ, ކްލަބްގެ ދަރަނިތައްވެސް ދެއްކުމުންނެވެ.
