ރާއްޖޭގެ ފުޓްބޯޅައިގެ ކުރީގެ ގަދަބާރު ކަމަށްވާ ވިކްޓްރީއަށް ގެންނަން ނިންމާފައިވާ ބިދޭސީ ހަ ކުޅުންތެރިންގެ ތެރެއިން ފަސް ކުޅުންތެރިން މާލެ އައިސް, ޕްރެކްޓިހުގައި ބައިވެރިވާން ފަށައިފިއެވެ.

ދެވަނަ ޑިވިޝަނުގައި ވާދަކުރަން ތައްޔާރުވާ ވިކްޓްރީން ވަނީ، ބިދޭސީ ކުޅުންތެރިންގެ އިތުރުން ގޯލް ކީޕަރު ޓްރެއިނަރަކު ގެނެސްފައެވެ. ސްރީލަންކާގެ ސަމްޕަތު ބުޑިކާވެސް މިހާރު ވަނީ ވިކްޓްރީގެ ކީޕަރުން ތަމްރީނުކުރުމާ ހަވާލުވެފައެވެ. ވިކްޓްރީގެ ގޯލް ބަލަހައްޓާނީ ޕާކިސްތާނުގެ ގައުމީ ކީޕަރު ސާގިބު ހަނީފެވެ. އޭނާއަކީ ކުރިންވެސް ރާއްޖޭގެ ކްލަބްތަކަށް ކުޅުނު ކީޕަރެކެވެ. ސާގިބުވެސް ވަނީ ވިކްޓްރީއާ ގުޅިފައެވެ, ވިކްޓްރީއާ ގުޅުނު އެހެން ބިދޭސީ ކުޅުންތެރިންނަކީ މާޒިޔާއަށް ފުރަތަމަ ގެނައި، ނަމަވެސް ފަހުން ޔުނައިޓެޑް ވިކްޓްރީއަށް ކުޅުނު މިލޯސްއާއި, ދެވަނަ ޑިވިޝަނުގައި ނިއުރޭޑިއަންޓަށް ކުޅުނު މިޑްފީލްޑަރު ހަސަން ބޮއޭވްއާއި, އުޒްބެކިސްތާންގެ ފަރުހު ހައިދަރޯވްއާއި, ބެލަރޫސްގެ އިވާނެވެ. އިވާނަކީވެސް މީގެކުރިން ރާއްޖޭގައި ކުޅުނު ކުޅުންތެރިއެކެވެ. ކިރިގިސްތާނުގެ އެނަޓޮލީ ވުލަސިޗޭވް ޓީމާ ގުޅޭނީ މިމަހުގެ 10 ވަނަ ދުވަހު ކަމަށް ވިކްޓްރީން ބުނެއެވެ.

ވިކްޓްރީން އަލުން ފުރަތަމަ ޑިވިޝަނުގެ ޖާގަ ހޯދަން މަސައްކަތްކުރާއިރު، ރާއްޖޭގެ ގައުމީ ޓީމަށް ކުރިން ކުޅުނު ކުޅުންތެރިން ޓީމުގައި ހިމެނެއެވެ. އޭގެތެރޭގައި ގައުމީ ޓީމުގެ ކުރީގެ ކެޕްޓަން އަކްރަމާއި އުމައިރުގެ އިތުރުން ޑިފެންޑަރު އަހުމަދު އަބްދުﷲ (ލިލީ) ހިމެނެއެވެ. ކޯޗަކީ ސޮބާހު މުހައްމަދެވެ. އޭނާއަށް އެހީވުމަށް މެނޭޖަރެއްގެ ގޮތުގައި ގޯލްޑް ކެޕްޓަން އަސްއަދުވެސް މަސައްކަތްކުރެއެވެ.