ހައި ސްޕީޑް ފެރީ ނިޒާމު: ޓިކެޓް ބުކް ކުރުމަށް ޕޯޓަލް އަދި މޮބައިލް އެޕް
ޚާއްސަ އެހީއަށް ބޭނުންވާ ފަރާތްތަކުން އާރްޓީއެލްގެ ފެރީތަކުން ހިލޭ ދަތުރުކުރެވޭނެ
ހައި ސްޕީޑް ފެރީ
ހައި ސްޕީޑް ފެރީ ނިޒާމަކުން ރާއްޖެ ގުޅާލުމުގެ ފުރަތަމަ ފިޔަވަހި ފަށާފައިވާއިރު، ޓިކެޓް ބުކް ކުރުމަށް ޕޯޓަލްގެ އިތުރުން މޮބައިލް އެޕްލިކޭޝަން ތައާރަފުކޮށްފިއެވެ.
ޕްލޭނިންގ މިނިސްޓްރީން ކޮށްފައިވާ ޓުވީޓެއްގައި ވަނީ ޕޯޓަލްއަށް ވަންނަ ގޮތް ކިޔައިދީ ވީޑިއޯއެއް އަޕްލޯޑްކޮށްފައެވެ. އަދި ޚާއްސަ އެހީއަށް ބޭނުންވާ ފަރާތްތަކުން އާރްޓީއެލްގެ ފެރީތަކުން ހިލޭ ދަތުރުކުރެވޭނެ ކަމަށް ވެސް ވަނީ ބުނެފައެވެ. ދަތުރު ކުރާ ކޮންމެ މީހަކާއެކު އުމުރުން 3 އަހަރުގެ ދަށުގެ އެއް ކުއްޖަކުގެ ގެންދެވިދާނެ ކަމަށާއި އުނގުގައި ބައިންދާ ގޮތަށް ހިލޭ އެ ކުއްޖަކަށް ދަތުރު ކުރެވޭނެ ކަމަށް ވެސް ވަނީ ބުނެފައެވެ.
ހައި ސްޕީޑް ފެރީ ނިޒާމަކުން ރާއްޖެ ގުޅާލުމުގެ ފުރަތަމަ ފިޔަވަހި ފަށާފައިވާއިރު، ފުރަތަމަ 11 ދުވަސް ތެރޭގައިވެސް 3000 ދަތުރުވެރިން ދަތުރުކޮށްފައިވާކަމަށް މިނިސްޓަރ އޮފް ނޭޝަނަލް ޕްލޭނިންގ، އެންޑް އިންފްރާސްޓްރަކްޗަރ މުޙައްމަދު އަސްލަމް ވަނީ މެއި މަހު ވިދާޅުވެފައެވެ.
މިނިސްޓަރ ވިދާޅުވީ، ޖޫން މަސް ނިމެންވާއިރަށް ހއ ނިންމައި، ޖުލައި މަސް ނިމެންވާއިރަށް ހއ ހދ އަދި ށ ގައި ފެރީގެ ޚިދުމަތް ފެށޭނެކަމަށް އުއްމީދު ކުރައްވާ ކަމަށެވެ.
އެ މަސައްކަތް ނިމުމަށްފަހު ދެކުނުގައި އެ ޚިދުމަތް ފެށުމަށް ވިސްނަވާކަމަށްވެސް މިނިސްޓަރ ވިދާޅުވިއެވެ. މިނިސްޓަރ ވަނީ އެ މަސައްކަތް އެންމެ އެކަށީގެންވާ ސްޕީޑުގައި ކުރިއަށް ނުދާކަން ފާހަގަކުރައްވާފައެވެ.
މީގެ އިތުރުން، ދަތުރުފަތުރާ ނުލައި ލާމަރުކަޒީވެސް ނުކުރެވޭނެ ކަމަށާއި، ޤައުމު އެއްކޮށް ތަރައްޤީ ނުކުރެވެނެކަަމަށްވެސް މިނިސްޓަރ ވިދާޅުވިއެވެ. އެގޮތުން ތަރައްޤީއަކީ ހަމައެކަނި ކަނޑުން ވެލި ނަގައިގެން ބިން ހިއްކުން ނޫންކަން ފާހަގަ ކުރައްވައި މިނިސްޓަރ ވަނީ އެއް ރަށް އަނެއްރަށާ ގުޅި ލާމެހެންޖެހޭކަމަށް ވިދާޅުވެފައެވެ. މިނިސްޓަރ ވިދާޅުވާ ގޮތުގައި އެކަން ކުރެވޭނެ ގޮތަކީ ދަތުރުފަތުރުގެ ނިޒާމު ރަނގަޅުކުރުމެވެ.
ދިވެހިރާއްޖެ ހައި-ސްޕީޑް ފެރީ ނިޒާމަކުން ގުޅާލުމަށް ފަރުމާކޮށްފައިވާ "އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވޯރކް" މަޝްރޫޢުގެ ދަށުން ފޯރުކޮށްދިނުމަށް ހަމަޖެހިފައިވާ ރާއްޖެ ޓްރާންސްޕޯޓް ލިންކް (އާރް.ޓީ.އެލް) ގެ ދަށުން، މެއި މަހުގެ 2 ވަނަ ދުވަހުގެ މެންދުރުފަހުން ފެށިގެން ހދ އަތޮޅުގެ 13 ރަށް ހިމެނޭހެން 5 ރޫޓުގެ ދަތުރުތައް ވަނީ ފަށާފައެވެ.
