މާލޭގެ ރައްޔިތުންނަށް ހުޅުމާލެއިން ގޯތި ދޭނެ ސަރަހައްދު ކަނޑައަޅައިފި

މާލޭގެ ރައްޔިތުންނަށް ހުޅުމާލެއިން ގޯތި ދޭނެ ސަރަހައްދު ކަނޑައަޅައި، ޒަރޫރީ ވަސީލަތްތައް ފޯރުކޮށްދިނުމަަށް ކުރަންޖެހޭ މަސައްކަތް ކުރަމުން އަންނަކަމަށް މިނިސްޓަރ އޮފް ނޭޝަނަލް ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.

މިނިސްޓަރު މިހެން ވިދާޅުވީ، ރައްޔިތުންގެ މަޖިލީގެ ގަލޮޅު އުތުރު ދާއިރާގެ މެމްބަރު އީވާ ޢަބްދުﷲ ކުރައްވާފައިވާ ސުވާލަށް ލިޔުމުން ޖަވާބު ދެއްވަމުންނެވެ. މިނިސްޓަރު ވިދާޅުވީ، ހުޅުމާލެއިން ދޫކުރުމަށް ކަނޑައަޅާ 1000 ގޯތި ދިނުމަށް ސައިޓް ވަނީ ކަނޑައެޅިފައިވާ ކަމަށާއި، އެ ސަރަހައްދުގެ މަގުތައް ހެދުމާއި، ފެނާއި ނަރުދަމާ އާއި ކަރަންޓުލުމަށް އެޗްޑީސީ، އެމްޑަބްލިއުއެސްއީ އަދި ސްޓެލްކޯއާއެކު މަޝްވަރާ ކުރެވި ތާވަލެއް ހެދުމުގެ މަސައްކަތް ކުރަމުން އަންނަ ކަމަށެވެ. ގޯތި ދިނުމުގެ މަސައްކަތް ޖޫން މަހުގެ ނިޔަލަށް ނިންމަވާނެ ކަމަށް ހައުސިންގ މިނިސްޓަރު އަސްލަމް ވިދާޅުވިއެވެ.

Advertisement

މިނިސްޓަރު ވަނީ ގުޅީފަޅާއި، ގިރާވަރުން ދޫކުރުމަށް ހަމަޖެހިފައިވާ ގޯތި ދިނުމުގެ މަސައްކަތް ގޮސްފައިވާ ހިސާބުގެ ތަފްސީލްވެސް ދެއްވާފައެވެ. ގުޅީފަޅު 2،000 ގޯތި ދިނުމަށް ލޭންޑް ޔޫސް ޕްލޭން ހަދައި، ބިން ހިއްކުމުގެ މަސައްކަތުގެ ތައްޔާރީތައްވަމުން އަންނަ ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ، ފައިނޭންސް ހަމަޖެހި ލޯން އެގްރީމެންޓް ކުރުމުގެ މަސައްކަތްވެސް ކުރަމުން އަންނަ ކަމަށެވެ.

ގިރާވަރު ބިން ހިއްކުމަށް ވާން ޖެހޭ ތައްޔާރީތައް މިހާރުވެސް ކުރަމުން އަންނަ ކަމަށާއި، ފައިނޭންސް ހޯދުމުގެ މަސައްކަތް ކުރިއަށްދާ ކަމަށް މިނިސްޓަރު ވިދާޅުވިއެވެ.

ފާއިތުވި ހަފްތާގައި މަޖިލީހުގައި މިނިސްޓަރު ވިދާޅުވީ، ގޯތި ދޫކުރާނެ މީހުންނަށް އުސޫލު ފައިނަލް ކުރުމުގެ މަސައްކަތް ކުރަމުން އަންނައިރު، ގޯތި ދޫކުރުމަށް އޮތީ މައިގަނޑު ހަތަރު ޝަރުތެއް ކަމަށެވެ.

މިނިސްޓަރު އަސްލަމް ވިދާޅުވީ، އެ ޝަރުތުތަކަކީ، މާލެއަށް އުފަން މާލެ ރައްޔިތަކަށްވުމާއި، އެ މީހެއްގެ ނަންމަތީ، 600 އަކަފޫޓަށް ވުރެ ބޮޑު ބިމެއް ނެތުން އަދި ވާރުތަކުރަން ވެސް ނެތް އެވަރުގެ ބިމެއް ނެތުން އަދި އެވަރުގެ ބިމެއް ލިބިއްޖެ ނަމަ ދައުލަތަށް ދޫކޮށްލުން ނުވަތަ ވާރުތަވާން އޮތްތަނެއް ވެސް ދޫކޮށްލުމެވެ. ތިންވަނަ ޝަރުތެއްގެ ގޮތުގައި ވިދާޅުވީ، ދަފްތަރަށް އުފަން މީހުންނަށް ވެސް ކުރިމަތިލެވޭނެ ކަމަށެވެ. މީގެ އިތުރުން މާލޭގައި ދިރިއުޅޭނެ އެއްވެސް ތަނެއް ނެތް މާލެ މީހުންނަށް ވެސް ގޯއްޗަށް ކުރިމަތިލެވޭނެ ކަމަށެވެ.

ދަފްތަރުގައި ތިބޭ މީހުންނަށް ކުރިމަތި ލެވޭނެ ކަމަށް ވިދާޅުވެ، އެކަން ތަފްސީލް ކޮށްދެއްވަމުން މިނިސްޓަރު އަސްލަމް ވިދާޅުވީ، ރަށްރަށުން މާލެއަށް ހިޖުރަ ކުރުމަށް ފަހު ދަފްތަރުގައި ތިބި މީހުންގެ ތެރެއިން ބައެއް މީހުންނަށް ދަރިން ލިބިފައިވާ ކަމަށާއި އެގޮތަށް ދަފްތަރަށް އުފަން މީހުން ވެސް ކުރިމަތިލެވޭނެ ކަމަށެވެ.

މި އަހަރުގެ ޖޫންމަހު މި މަސައްކަތްކޮށް ނިންމޭނެ ކަމުގެ ޔަގީންކަން ހައުސިންގ މިނިސްޓަރު އަސްލަމް ވަނީ ދެއްވާފައެވެ.