މިދިޔަ އަހަރުގެ ޖަނަވަރީ މަހުގެ 6 ވަނަ ދުވަހު އެމެރިކާގެ ކޮންގްރެސް ނުވަތަ ރައްޔިތުންގެ މަޖިލީސްކުރާ ގެޔަށް މުޒާހަރާ ކުރަމުން ދިޔަ ބަޔަކު ވައްދާ ހިންގަން އުޅުނީ ބަޢާވާތެއް ކަމަށާ އެކަމުގެ ފަހަތުގައި ވަނީ ކުރީގެ ރައީސް ޑޮނަލްޑް ޓްރަޕް ކަމަށް އެމައްސަލަ ބެލުމަށްއެކުލަވާލާފައިވާ ޚާއްސަ ކޮންގްރެޝަނަލް ކޮމިޓީ އިން ބުނެފި އެވެ.
ކޮމިޓީގެ ވައިސްޗެއަރ ލިޒް ޗޭނީ ވިދާޅުވީ އެދުވަހުގެ ހަމަލާތައް ފެށުމުގެ ގޮތުން "ފުރަތަމަ ހުޅުކޮޅު ރޯކުރެއްވީ" ޑޮނަލްޑް ޓަރަމްޕް ކަމަށެވެ. އަދި އެކަން ހުއްޓުވުމަށް ޓަރަމްޕް އެއްވެސް ކަމެއް ކުރައްވާފައިނުވާކަމަށް އޭނާ ވިދާޅުވިއެވެ.
އެމެރިކާގެ ރިޔާސީ އިންތިޚާބްގައި ޑޮނަލްޑް ޓްރަޕްބަލިވެ ޖޯބައިޑަން އަށް ކުރި ލިބި ވަޑައިގެންނެވުމުން ނަތީޖާ އަނބުރާލެއްވުމަށް ޓްރަމްޕް އެތައް ގޮތަކަން މަސައްކަތް ކުރައްވާފައިވާކަން ކޮމިޓީގެ އަޑުއެހުންތަކުން ހާމަވެފައި ވެއެވެ. މިގޮތުން އެތައް ފަހަރަކު ސޯޝަލް މީޑިޔާ ޕްލެޓްފޯމް ތައް މެދުވެރި ކުރައްވާ ނަތީޖާ ސައްހަ ނޫންކަމަށާ ކާމިޔާބުވީ އޭނާއަށް ކަމަށް ވިދާޅުވުމާއި އަދި އެންމެ ފަހުން އިންތިޚާބްގެ ނަތީޖާ އިއުލާން ކުރުމަށް ކޮންގްރެސްގެ ބައްދަލްވުން ކުރިޔަށް ދިޔަވަގުތު ޓްރަމްޕް ގެ ސަޕޯޓަރުންގެ ގިނަ އަދަދެއްގެ ބަޔަކު ކޮންގްރެސް އިމާރާތައް ވައްދާ އެތަނުގައި ލޭއޮހޮރުވުންވެސް ހިންގާފައި ވެއެވެ. މިކަން ހިނގާފައިވަނީ ޖަނަވަރީ 6ވަނަ ދުވަހުއެވެ. އެހަމަލާގެ ބޭނުމަކަށްވީ ނަތީޖާ ރަސްމީކޮން އިއުލާން ކުރުން ހުއްޓުވުމެވެ.
މައްސަލަ ހިނގިގޮތްބަލަން އެކުލަވާލާފައިވާ ޚާއްސަ ކޮމިޓީ އިން އެއްއަހަރަށް ވުރެ ގިނަ ދުހު މިމައްސަލައިގެ މައުލޫމާތު އެނގޭ ޓްރަމްޕްގެ އަރިސް އެކި ފަރާތްތަކާ ސުވާލު ކޮށް މައުލޫމާތު އެއްކޮށްފައި ވެއެވެ. އަދި ބުރާސްފަތި ދުވަހުގެރޭ ވަނީ ޚާއްސަ ބައްދަލް ވުމެއް ބާއްވާފައެވެ.
މިބައްދަލް ވުމުގައި ހާމަވެފައިވާ ގޮތުގައި އިންތިޚާބްގެ ނަތީޖާ ބްލޮކް ކުރަން ނުވަތަ ހުއްޓުވުމަށް އޭރުގެ ނާއިބު ރައީސް މައިކް ޕެންސް ދެކޮޅު ހެއްދެވުމުން މުޒާހަރާކުރި ފަރާތްތަކުން އޭނާ ދަންޖައްސާ މެރުމަށް ގޮވާލުމުން ޓްރަމްޕް ވަނީ އެއީ ޕެންސް އަށް ހައްގު އަދަބެއް ކަމަށް ވިދާޅުވެފައެވެ. އަދި މުޒާހަރާކުރި ފަރާތްތައް ކޮންގްރެސް އިމާރާތަށް ވަނުން ހުއްޓުވުމަށް ސަލާމަތީ ބާރެއްގެ އެއްވެސް ވެރިޔަކަށް ޓްރަމްޕް ނާންގަވާ ކަން ވަނީ ހާމަވެފައެވެ. ރަޔަޓް ސްކްއަޑް ނެރުމަށް އަމުރު ކުރެއްވީ ނާއިބް ރައީސް މައިކް ޕެންސް އެވެ.
އެދުވަހު ކޮންގްރެސް އިމާރާތަށް ވަދެގަތް މީހުން ވަނީ އިމާރާތުގެ ތަންތަނަށް ގެއްލުން ދީ އަދި ރަޔަޓް ފުލުހުންގެ ތެރެއިން އެމީހުންގެ އަތުޖެހުނު ބަޔެއްގެ ގައިގަތަޅާ ލޭ އޮހޮރުވާފައެވެ. މިގޮތުން ސަތޭކަވަރަކަށް ފުހުންނަށް ބޮޑެތި އަނިޔާތައް ދީފައި ވެއެވެ. އަދި ބައެއް މަޖިލީސް މެމްބަރުންނަށް ވެސް ނުރައްކާ ކުރިމަތި ވެފައި ވެއެވެ.
ބުރާސްފަތި ދުވަހުގެ ރޭ ކޮންރެސް ކޮމިޓީގެ އަޑުއެހުންތައް ފެށުމުގެ ކުރިން ޓްރަމްޕް ވަނީ މި އަޑު އެހުންތަކަކީ ސިޔާސީ ގޮތުން އޭނާއާ ދެކޮޅަށް ކުޅޭ ކުޅިގަނޑެއްކަމަށް ވިދާޅުވެފައެވެ.
ޓްރަމްގެންދަވަނީ 2024 ގެ އިންތިޚާބަށް ކުރިމަތިލައްވާނެ ކަމުގެ އިޝާރާތްތައް ދެއްވަމުންނެވެ.
