ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދިން ހަމަލާއާ ގުޅިގެން، އުފުލާފައިވާ ދައުވާތަކުގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި އަޑުއެހުމަކީ ޝަރީއަތުގެ ކުރީގެ ހުށައެޅުންތަކަށް ގޮތް ނިންމުމަށް ބޭއްވި އަޑުއެހުމެކެވެ.

މި މައްސަލައިގެ ޝަރީއަތުގެ ކުރީގެ ހުށައެޅުންތައް ހުށައަޅާފައިވަނީ 4 ޖޫން 2022 ގައެވެ. އެގޮތުން ދައުލަތުގެ ހުށައެޅުންތަކަށް ބަލާއިރު، މައިގަނޑު ގޮތެއްގައި ސިއްރު ހެކިވެރިންނަކީ ކާކުކަން ނޭނގޭ ގޮތަށް ހެކިބަސް ނެގުމާއި، ޙާދިސާ ހިނގި ތަނުގައި ނެތްކަން ބަޔާން ކޮށްދިނުމަށް ދިފާއުން ހުށައަޅާފައިވާ ހެކިވެރިން ބަލައިނުގަތުމަށް އެދި ހުށައަޅާފައިވާ ހުށައެޅުންތަކަކާއި، ހެކި ރައްކާތެރި ކުރުމުގެ އަމުރު ދާއިމީ ކޮށްދިނުމަށް އެދި ހުށައަޅާފައިވާ ހުށައެޅުންތައް ހިމެނެއެވެ.

ޝަރީއަތުން ވަނީ ދައުލަތުން އެދިފައިވާ ގޮތަށް ހެކި ރައްކާތެރި ކުރުމުގެ ދާއިމީ އަމުރެއް ނެރެދެއްވުމަށާއި، ސިއްރު ހެކިވެރިންނަކީ ކޮންބައެއްކަން ނޭނގޭ ގޮތަށް ހެކިބަސް ނެގުމަށް އެދި ހުށައަޅާފައިވާ ހުށައެޅުން ބަލައިގެންފައެވެ.

އޭގެ އިތުރުން، ޙާދިސާ ހިނގި ތަނުގައި ނެތްކަން ބަޔާންކޮށްދިނުމަށް ދައުވާލިބޭ ފަރާތްތަކުން ހުށައަޅާފައިވާ ހެކިތައްވެސް ޝަރީއަތަށް ބަލައިނުގަތުމަށް ވަނީ ނިންމަވާފައެވެ. އެހެންނަމަވެސް ޖިނާއީ އިޖުރާއަތުގެ ޤާނޫނާ އެއްގޮތަށް ތަހުގީގުގައި ބަޔާންކޮށްފައިވާ ހެކިތައް ބަލައިގަތުމަށް ޝަރީއަތުން ނިންމެވިއެވެ.

ދައުވާލިބޭ ފަރާތްތަކުގެ ގިނަ ހުށައެޅުންތައް ޝަރީއަތަށް ބަލައިގެންފައެއް ނުވެއެވެ. އެހެންނަމަވެސް، ތަހުގީގު ކުރި ފަރާތުގެ ބަޔާން ހެކީގެ ގޮތުގައި ބަލައިނުގަތުމަށް ދައުވާލިބޭ ބައެއް ފަރާތްތަކުން ހުށައެޅި ހުށައެޅުން ޝަރީއަތުން ވަނީ ބަލައިގެންފައެވެ.

އޭގެ އިތުރުން، ބައެއް ހެކިތައް ދިފާއުން އެދިފައިވާ ގޮތަށް ދިފާއަށް ހިއްސާ ކުރެއްވުމަށްވެސް ޝަރީއަތުން ނިންމެވިއެވެ.

ދެން މި މައްސަލައިގެ އަޑުއެހުމެއް އޮންނާނީ 12 ޖޫންގައެވެ. އެ ދުވަހުގެ އަޑުއެހުމުގައި މި މައްސަަލައިގެ ޝަރީއަތް ފަށައި އިފްތިތާޙީ ބަޔާން ހުށައެޅުމަށް ވަނީ ނިންމާފައެވެ.