ޚަރަދުކުޑަކުރުމަށް ލަންކާގެ ގާނޫނު ހަދާ މަޖިލީހުގައި ކަރުދާސް ބޭނުންކުރުން ހުއްޓާލަނީ
9 ޖޫން 2022 | ބުރާސްފަތި 01:53ކޮމިޓީގެ މިނިންމުމާއެކު ހުރިހާ ރިޕޯޓްތައް ދެން ފޮނުވާނީ މެއިލް މެދުވެރިކޮށް
ލަންކާގެ ގާނޫނު ހަދާ މަޖިލިސް
ސްރީލަންކާއަށް މިހާރު ކުރިމަތިވެފައިވާ އިގްތިޞާދީ ކާރިސާއާއެކު އެގައުމުގެ ގާނޫނު ހަދާ މަޖިލީހުގައި ކަރުދާސް ބޭނުންކުރުން އެއްކޮށް ހުއްޓާލުމަށް ގާނޫނު ހަދާ މަޖިލީހުގެ ކަންކަމާބެހޭ ކޮމިޓީން ނިންމައިފިއެވެ.
ކޮމިޓީގެ މިނިންމުމާއެކު ގާނޫނުހަދާ މަޖިލީހުގެ ރައީސް މަހިންދަ ޔަޕާ އަބޭވަރްދޭނާ ވިދާޅުވީ ކޮމިޓީގެ މިނިންމުމާއެކު ހުރިހާ ރިޕޯޓްތައް މެއިލް މެދުވެރިކޮށް ފޮނުވާގޮތަށް ނިންމާފައިވާކަމަށެވެ. އޭގެތެރޭގައި އަހަރީ ރިޕޯޓްވެސް ހިމެނެއެވެ.
މި ނިންމުމަކީ ލަންކާއަށް ކުރިމަތިވެފައިވާ އިގްތިޞާދީ ކާރިސާއާއެކު ގާނޫނު ހަދާ މަޖިލީހުގެ ޚަރަދުތައް ކުޑަކުރުމާއެކު ތިމާވެއްޓަށް ގެއްލުންވާ މިންވަރު ކުޑަކުރުމަށް ނިންމި ނިންމުމެކެވެ.
ލަންކާއަށް ވަނީ ކަރުދާހާއި ޗާޕުކުރަން ބޭނުންވާ ޒަރޫރީތަކެތި ލިބުމުގެ ދަތިކަން ކުރިމަތިވެފައެވެ. ކަރުދާސް ގަނެވޭ ވަރަށް ފައިސާ ނެތުމުގެ ސަބަބުން އެގައުމުގެ ހުޅަނގު ޕްރޮވިންސްގެ ދަރިވަރުންގެ ޓެސްޓުތަކެއްވެސް މީގެކުރިން ކެންސަލްކޮށްފައިވެއެވެ. ޕްރިންޓަރަށް ބޭނުންވާ ދެއްޔާއި ކަރުދާސް އެކަށީގެންވާ މިންވަރަށް އެތެރެ ނުކުރެވޭތީ ގްރޭޑް 9،10,11ގެ ކުދިންގެ ޓެސްޓްތައް އޭރު ކެންސަލްކުރިއެވެ.
ގާނޫނު ހަދާ މަޖިލީހުގެ މިނިންމުމާއެކު ރިޕޯޓްތަކާއި އެނޫންވެސް ޑޮކިޔުމެންޓްތައް ދެން މެމްބަރުންނަށް ފޮނުވާނީ އީމެއިލް މެދުވެރިކޮށެވެ. މީގެއިތުރުން ކޮމިޓީން ވަނީ ގާނޫނު ހަދާ މަޖިލީހުގެ ވެބްސައިޓްގައި މިކަމަށް ޚާއްސަކޮށް ޕޯޓަލްއެއް ހިމެނުމަށްވެސް ނިންމާފައެވެ.
