ސެމީފައިނަލުން ޖާގަ ހޯދާފައި އޮތް ޓީސީ އަތުން ބޮޑު މޮޅެއް ހޯދައިގެން ގްރޫޕްގެ އެއްވަނަ ޓީމްގެ ގޮތުގައި ޔުނައިޓެޑް ވިކްޓްރީ ސެމީފައިނަލުން ޖާގަ ހޯދައިފިއެވެ.
ޔުނައިޓެޑް ވިކްޓްރީ ގްރޫޕްގެ އެއްވަނަ ހޯދީ 6-0 ން ޓީސީ ބަލިކޮށްގެންނެވެ. ޔޫވީން ޖެހި ހަ ލަނޑުގެ ތެރެއިން ދެ ލަނޑު ޖެހީ މުޙައްމަދު ރަޒާންއެވެ. ޔޫވީއަށް ދެން ލަނޑުތައް ޖަހައިދިނީ އަހުމަދު އަޒްލާން އަލީ, އަހުމަދު އަލްތާފް އަޒީމް, މުޙައްމަދު އަރުޝަދު ސަލީމް އަދި މުޙައްމަދު މާޔަން ނިޔާޒުއެވެ. މިމޮޅާއެކު ޔޫވީ ވަނީ ތިން މެޗުން ހަތް ޕޮއިންޓް ހޯދާފައެވެ. ޓީސީއަށް ތިން މެޗުން ލިބުނީ ހަ ޕޮއިންޓެވެ. އެހެންކަމުން ދެވަނަ ޓީމްގެ ގޮތުގައި ޓީސީ ސެމީފައިނަލްގައި ވާދަކުރާނީ އަނެއް ގްރޫޕްގެ އެއްވަނަ ހޯދި ވެެލެންސިޔާއާއެވެ. ޔޫވީ ސެމީގައި ވާދަކުރާނެ ޓީމެއް ޔަޤީންވާނީ ބުރާސްފަތި ދުވަހު ހަވީރު ދަ ގްރާންޑޭއާއި އީގަލްސް ވާދަކުރާ މެޗުންނެވެ.
މިގްރޫޕްގެ ތިންވަނަ ޓީމަކީ ބުދަ ދުވަހުގެރޭ 1-0 ން މާޒިޔާ ބަލިކުރި ސުޕަރ ޔުނައިޓެޑް ސްޕޯރޓްސް (ސަސް)އާއެވެ. މެޗުގެ ހަމައެކަނި ލަނޑު ޖެހީ ޝައްފާން މުޙައްމަދެވެ. ސަސްއަށް ތިން މެޗުން ލިބުނީ ހަތަރު ޕޮއިންޓެވެ. މާޒިޔާ މުބާރާތް ނިންމާލީ ޕޮއިންޓެއް ނުލިބިއެވެ.
