ރާއްޖޭގެ ތިން ސަރަހައްދެއްގައި ވިކްޓްރީގެ އެކަޑަމީ ފަށަނީ

ރާއްޖޭގެ ތިން ސަރަހައްދެއްގައި ވިކްޓްރީގެ އެކަޑަމީ ފަށަން ނިންމާފައިވާކަމަށް އެކްލަބުން ބުނެފިއެވެ.

ދަރަނިތައް ދައްކާ ސަސްޕެންޝަނުން ސަލާމަތްވެ, ދެވަނަ ޑިވިޝަންގައި ވާދަކުރަން ޕްރެކްޓިސް ކުރަމުން އަންނަ ކްލަބްގެ ޓެކްނިކަލް ޑައިރެކްޓަރ މުޙައްމަދު އާދަމް ވިދާޅުވީ ވިކްޓްރީގެ ފުޓްބޯޅަ ބަލަހައްޓާ ކޮމިޓީން އެނިންމުން ނިންމާފައިވާކަމަށެވެ.

މުހައްމަދު ވިދާޅުވީ ވިކްޓްރީ އެނބުރި އައުމާއެކު ފުރަތަމަ ކަމަކަށް އޮތީ ދެވަނަ ޑިވިޝަންގައި ވާދަކުރުންކަމަށެވެ. އެއާއެކު އެކަޑަމީ ފަށަން މަސައްކަތްތައް ކުރާނެކަމަށް ވިދާޅުވިއެވެ. އެކަމަކު އެކަޑަމީ ފަށާ ތިން ސަރަހައްދެއް އޭނާ ވިދާޅެއް ނުވެއެވެ.

ދެވަނަ ޑިވިޝަންގައި ވާދަކުރާއިރު ވިކްޓްރީއަށް ރަނގަޅު ޓީމެއް އެކުލަވާލެވިއްޖެކަމަށާއި, އިތުރަށްވެސް ޒުވާން ކުޅުންތެރިން ލިބޭތޯ މަސައްކަތްކުރަމުންދާކަމަށް މުޙައްމަދު ވިދާޅުވިއެވެ. އަދި ބޭރުން ގެނައި ހަތަރު ކުޅުންތެރިންވެސް ފެންވަރު ރަނގަޅުކަން މުޙައްމަދު ފާހަގަކުރެއްވިއެވެ.