މާލޭގެ ދަނޑުތައް ދޫކުރާ އަގު ބޮޑުކަމަށާއި، އަގު ކޮންޓްރޯލް ކުރަން މަސައްކަތް ކުރައްވާ ކަމަށް ޔޫތު މިނިސްޓަރު އަޙުމަދު މަޚްލޫފް ވިދާޅުވެއްޖެއެވެ.

މިނިސްޓަރު މިހެން ވިދަޅުވީ މަޖިލީހުގެ މިއަދުގެ ޖަލްސާގައި ހެންވޭރު އުތުރު ދާއިރާގެ މެމްބަރު އިބްރާހިމް މުއިއްޒު ކުރެއްވި ސުވާލަށް ޖަވާބު ދެއްވަމުންނެވެ. މެމްބަރު މުއިއްޒު ކުރެއްވި ސުވާލަކީ ފުޓުބޯޅަ ކުޅުމަށް ބޭނުންވާ ފަރާތްތަކަށް މާލޭގައި ދަނޑު ހޯދުމުގެ ދަތިތަކެއް ހުރިކަމަށާއި، ދަނޑުތަކުގެ އަގު ވެސް ބޮޑު ކަމަށެވެ. އަދި މިކަމުގައި ޔޫތު މިނިސްޓްރީގެ ވިސްނުމަކީ ކޮބައިތޯއެވެ.

މެމްބަރުގެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ މާލޭގައި މީހުން ފުޓްސެލް ކުޅުމަށް ނުވަތަ ފުޓުބޯޅަ ކުޅެލަން ދިޔުމަކީ ދަތިކަމަކަށް ވެއްޖެކަމަށެވެ. ލިބޭ ފުރުސަތު މަދުކަމަށާއި، ދައްކަން ޖެހޭ ފައިސާ ގިނަވުމުގެ އިތުރުން ހުރި ވަސީލަތްތައް މަދު ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ އެކަމަށް ހައްލެއް ގެނައުމުގެ ގޮތުން ދަނޑުތައް ނެގުމުގެ ވިސްނުން މިނިސްޓްރީން ގެންގުޅޭކަމަށެވެ. އަދި އެ ތަންތަނަކީ އޮންލައިންކޮށް ބުކްކޮށްގެން މީހުންނަށް ދެވޭނެ ގޮތެއް ހެދުމަށް މަޝްވަރާކުރަމުންދާ ކަމަށެވެ. މީގެ އިތުރުން މިނިސްޓަރު ވިދާޅުވީ އެމަނިކުފާނު ވެސް ކުޅެން ދަނީ އަގުބޮޑުކޮށް ދަނޑަށް ފައިސާ ދައްކައިގެން ކަމަށެވެ.

މާލޭ ސަރަހައްދުގެ ދަނޑުތަކުން އަގު ބޮޑެތިކޮށް ކުލި ނަގަމުންދާ މައްސަލައަކީ އެތައް ދުވަސްވީ މައްސަލައެކެެވެ. މިހާތަނަށް އަދި އެެއްވެސް ސަރުކާރަކަށް އެ މައްސަލައަށް ހައްލެއް ހޯދިފައެއް ނުވެއެވެ.