އިންޑިއާގެ އެންމެ ބޮޑު އެހީއެއް ލިބޭ ވުޒާރާއަކަށް ޔޫތު މިނިސްޓްރީ ވާނެ: މަޚްލޫފް
ދެން އަންނަ ސަރުކާރަކުން ފެސިލިޓީސްތައް ބަލަހައްޓައި އެ ތަންތަނުގައި ޕްރޮގްރާމް ހިންގޭ ވަރަށް ރާއްޖޭގެ ކުޅިވަރު ވަސީލަތްތައް ގާއިމުވެގެންދާނެ
މިއަދުގެ ޖަލްސާގައި މިނިސްޓަރު މަޚްލޫފް
އިންޑިއާ ސަރުކާރުން ރާއްޖެއަށް ވަރަށް ބޮޑު އެހީތެރިކަމެއް ފޯރުކޮށްދޭކަމަށާއި، އެ ގައުމުގެ އެންމެ ބޮޑު އެހީތެރިކަން ލިބޭ ވުޒާރާއަކަށް ޔޫތު މިނިސްޓްރީވާނެ ކަމަށް މިނިސްޓަރު އަޙުމަދު މަޚްލޫފް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާއަށް މިނިސްޓަރު ހާޒިރުކޮށް މެމްބަރަކު ކުރެއްވި ސުވާލަކަށް ޖަވާބު ދެއްވަމުންނެވެ. ނައިފަރު ދާއިރާގެ މެމްބަރު އަޙުމަދު ޝިޔާމް ކުރެއްވި ސުވާލަކީ ނައިފަރުގެ އިންޑޯ ސްޕޯޓްސް ކޮމްޕްލެކްސްގެ މަސައްކަތް ކިހާ ހިސާބަކު ފެށޭނެތޯއެވެ. މީގެ އިތުރުން ޝިޔާމް ކުރެއްވި ސުވާލަކީ އިންޑިއާ މެދުވެރިކޮށް ވަރަށް ގިނަ ކުޅިވަރު ވަސީލަތްތައް ގާއިމުކުރުމަށް ނިންމާފައިވާ ކަމަށާއި، އިންޑިއާގެ ފަރާތުން ކިހާ ފައިސާއެއް މިނިސްޓްރީގެ ޕްރޮޖެކްޓްތަކަށް ލިބިފައިވޭތޯއެވެ.
ޖަވާބުގައި މިނިސްޓަރު ވިދާޅުވީ ނައިފަރުގެ އިންޑޯ ކޮމްޕްލެކްސްގެ މަސައްކަތް މިހާރު ވަނީ ޓެންޑަރ ބޯޑަށް ފޮނުވާފައިކަމަށެވެ. އަދި އުންމީދުކުރެވޭ ގޮތުގައި މި މަހުގެ ފަހުކޮޅު ޓެންޑަރ ބޯޑުން ބިޑަށް ނަގާނެކަމަށެވެ. މިނިސްޓަރު ވިދާޅުވީ އެކަން ވެގެންދާނީ ނައިފަރަށާއި، އެ މުޅި ސަރަހައްދަށް ވަރަށް ބޮޑު ފައިދާތަކެއް ލިބިގެންދާނެ ކަމެއް ކަމަށެވެ. މީގެ އިތުރުން މިނިސްޓަރު ވިދާޅުވީ އިންޑިއާއިން ރާއްޖެއަށް ވަރަށް ބޮޑު އެހީތެރިކަމެއް ވެދޭ ކަމަށާއި، އޭގެ ތެރެއިން އެންމެ ބޮޑު ސަޕޯޓެއް ލިބޭ މިނިސްޓްރީއަކަށް ޔޫތު މިނިސްޓްރީ ވާނެ ކަމަށެވެ.
މިނިސްޓަރު ވިދާޅުވީ އެ އެހީގެ ތެރެއިން ކުރިއަށްގެންދާ ކަންކަމުގެ ތެރޭގައި ގައުމީ ޓޭބަލް ޓެނިސް ސެންޓަރ، ގައުމީ ބާސްކެޓު ސެންޓަރ، ގަލޮޅު ރަސްމީ ދަނޑުގެ އިތުރުން ކުޅުދުއްފުށި، ތިނަދޫ، ހިތަދޫ، އަދި ފުވައްމުލަކުގެ ސިންތެޓިކް ޓްރެކް ކަހަލަ ވަރަށް ރަނގަޅު ކަންކަން ހިމެނޭކަމަށެވެ. އަދި މިނިސްޓަރު ވިދާޅުވީ މިކަމުގެ ތެރެއިން ދެން އަންނަ ސަރުކާރަކުން ވަރަށް ރަނގަޅަށް އެ ފެސިލިޓީސްތައް ބަލަހައްޓައި އެ ތަންތަނުގައި ޕްރޮގްރާމް ހިންގޭ ވަރަށް ރާއްޖޭގެ ކުޅިވަރު ވަސީލަތްތައް ގާއިމުވެގެންދާނެކަމަށެވެ.
