ހީނުކުރާ ވަރުގެ ބަދަލެއް މުޅި ދާއިރާއަށް ގެނެވިއްޖެ: މަޚްލޫފް

ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙު ކުޅިވަރުގެ ދާއިރާއާއި ޒުވާނުންނަށް ވެޑައިގެންނެވި ވައުުދުތަކަށްވުރެ، އިތުރަށް ކަންކަން ކުރެވިއްޖެކަމަށް ޔޫތު މިނިސްޓަރު އަޙުމަދު މަޚްލޫފް ވިދާޅުވެއްޖެއެވެ.

މިނިސްޓަރު މިހެން ވިދާޅުވީ ރައްޔިތުންގެ މަޖިލީހަށް މިއަދު މިނިސްޓަރު ހާޒިރުކޮށް މެމްބަރަކު ކުރެއްވި ސުވާލަށް ޖަވާބުދެއްވަމުންނެވެ. މިއަދުގެ ޖަލްސާއަށް މިނިސްޓަރު ހާޒިރުކުރީ މާވަށު ދާއިރާގެ މެންބަރު މުޙައްމަދު ސަޢީދު ހުށަހަޅާފައިވާ ސުވާލަކާ ގުޅިގެންނެވެ.

އިތުރު ސުވާލުކުރުމަށް ލިބުނު ފުރުސަތުގައި ކަނޑިތީމު ދާއިރާގެ މެމްބަރު ޢަބްދުﷲ ޝަހީމް ޢަބްދުލް ޙަކީމް ކުރެއްވި ސުވާލަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ޒުވާނުންނަށް ވެވަޑައިގެންފައިވާ ވައުދުތައް މި ދައުރު ނިމެންވާއިރަށް ފުއްދާދެވޭނެ ކަމުގެ ކިހާ ޔަގީންކަމެއް މިނިސްޓަރަށް އޮތްތޯއެވެ. ޖަވާބުގައި މިނިސްޓަރު މަޚްލޫފް ވިދާޅުވީ ރައީސް ޞާލިޙު ވައުދުވެވަަޑައިގެންނެވި ކަންކަމަށްވުރެ ވެސް މާ ރަނގަށް ކަންކަން ކުރެވިއްޖެކަމަށެވެ.

މީގެ އިތުރުން މިނިސްޓަރު ވިދާޅުވީ ޤައުމުގެ ކެރި ފޯރުންތެރިކަން ހުރި ވަރަކުން ވީހާ ވެސް ބޮޑަށް ބަދަލު ގެނެވޭތޯ މަސައްކަތް ކުރަމުން ދާ ކަމަށެވެ. މިއަދުގެ ޖަލްސާގައި އިތުރު މެމްބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު ވިދާޅުވީ މުއްދަތަށް މަސައްކަތްތައް ނިންމުމުގައި ދަތިތަކާ ދިމާވާ ކަމަށެވެ. އޭގެ ތެރޭގައި މަސައްކަތް ހަވާލުކުރެވޭ ފަރާތުގެ ލަސްކަމާ ހެދި، ކުޑަ މުއްދަތަކުން ނިންމަން ހަވާލުކުރާ މަސައްކަތް ވެސް އަހަރު ދުވަހަށް ދިގު ދެމިގެންދާކަން މިނިސްޓަރު ފާހަގަކުރެއްވިއެވެ.