އީގަލްސް ބަލިކޮށް ފައިނަލްގެ ފަހު ޖާގަ ޕޮލިސް އަށް

އެސޯސިއޭޝަން ކަޕްގެ ތިން ވަނަ ސެމީ ފައިނަލްގައި ކުލަބް އީގަލްސް ބަލިކޮށް ޕޮލިސް ކުލަބުން ފައިނަލްގެ ފަހު ޖާގަ ހޯދައިފިއެވެ.

ތިން ވަނަ ސެމީގައި ކުޅުނީ ފުރަތަމަ ސެމީން ބަލިވި ޓީމާއި ދެ ވަނަ ސެމީން މޮޅުވި ޓީމެވެ. ޕޮލިސް ވަނީ ފުރަތަމަ ސެމީގައި ކުލަބް ވެމްކޯ އަތުން ތިން ސެޓު ދެ ސެޓުން ބަލިވެފައެވެ. އެއާއެކު ވެމްކޯ ވަނީ މުބާރާތުގެ ފައިނަލުން ޖާގަ ހޯދާފައެވެ. ދެވަނަ ސެމީގައި އީގަލްސް ވަނީ ކުލަބް ވޮލީބޯލްގެ މައްޗަށް ސީދާ ތިން ސެޓުން ކުރި ހޯދާފައެވެ.

ޒުވާނުންގެ މަރުކަޒުގެ އެތެރޭ ހޯލުގައި މިރޭ ކުޅުނު ތިން ވަނަ ސެމީ މެޗު ޕޮލިހުން ކާމިޔާބުކުރީ ތިން ސެޓު އެއް ސެޓުންނެެވެ. މެޗުގެ ފުރަތަމަ ސެޓު 14-25 ން ހޯދީ ޕޮލިހެވެ. ނަމަވެސް އީގަލްސް އިން ވަނީ ކުޅުން ރަނގަޅުކޮށް 17-25 ން ޖެހިގެން އައި ދެވަނަ ސެޓު ހޯދާފައެވެ. ޕޮލިހުން ވަނީ ޖެހިގެން އައި ދެ ސެޓު ހޯދާ މެޗުން މޮޅުވެފައެވެ. ތިން ވަނަ ސެޓާއި ހަތަރު ވަނަ ސެޓު ޕޮލިހުން ހޯދީ 20-25 ންނެވެ. މެޗުގެ މޮޅު ކުޅުންތެރިޔަކަށް ހޮވުނީ ޕޮލިހުގެ އައިޝަތު ޝަހާ ޝާމިންއެވެ.

މިރޭގެ ސެމީ މެޗުން ބަލިވި އީގަލްސް އަށް ލިބުނީ މުބާރާތުގެ ތިން ވަނަ އެވެ. އަދި އެ ޓީމަށް ވަނީ މިރޭ މެޑަލް ހަވާލުކޮށްފައެވެ.

މުބާރާތުގެ ފައިނަލްގައި ބުރާސްފަތި ދުވަހުގެ ރޭ ޕޮލިސް ނިކުންނާނީ ވެމްކޯއާ ދެކޮޅަށެވެ.