ކުރިއަށް އޮތް ތިން ހަފުތާ ވަރަށް ދަތިވާނެ ކަމަށާއި, ޕެޓްރޯލާއި ތެޔޮ ގިނައިން ގަނެ، ފޮރުވައިފާ ނުބެހެއްޓުމަށް ލަންކާގެ ބޮޑުވަޒީރު ރަނިލް ވިކްރަމަސިންގހަ ގޮވާލައިފިއެވެ.

ވިކްރަމަސިންގހަ ވަނީ ކުރިއަށް އޮތް ތިން ހަފުތާގައި ލަންކާއަށް ޕެޓްރޯލާއި ތެލުގެ ސަޕްލައި ހޯދަން ދަތިވާނެކަމަށް ވިދާޅުވެފައެވެ. އެހެންކަމުން ޕެޓްރޯލާއި ތެޔޮވެސް ވަރަށް ބަލައިގެން، މުހިންމު ކަންކަމުގައި ނޫނީ ބޭނުން ނުކުރުމަށް ބޮޑުވަޒީރު ވަނީ އިލްތިމާސްކުރައްވާފައެވެ.

ކުރިއަށް އޮތް ދުވަސްތަކަކީ ދަތި އުދަނގޫ ދުވަސްތަކަކަށް ވާނެކަމުގެ އިންޒާރާއެކު، މިދުވަސް ތަކުގައި ބޭނުންވާވަރަށްވުރެ ގިނައިން ޕެޓްރޯލްގަނެ ފަހަށް ރައްކާކޮށްފައި ނުބެހެއްޓުމަށް އެދިވަޑައިގަންނަވަމުން ބޮޑުވަޒީރު ވަނީ، ރައްޔިތުންނަށް ދަތި ނުވާނެހެން ތެލާއި ކާބޯތަކެތި ފޯރުކޮށްދެއްވާނެކަމަށް ވިދާޅުވެފައެވެ. އެގޮތުން މިކަންތައް މިގޮތަށް ކުރުމަށް ގިނަ މަޝްވަރާތައް ކުރަމުންދާކަމަށް ބޮޑުވަޒީރު ވިދާޅުވިއެވެ.

ބޮޑުވަޒީރު ވިކްރަމަސިންގހަ ވަނީ ހުރިހާ އެންމެ ގުޅިގެން ކެތްތެރިކަމާއެކު މިކަންކަމާ ކުރިމަތިލުމަށް ގޮވާލައްވާފައެވެ.

ލަންކާއިން މަހެއްގެ މައްޗަށް 500 މިލިއަން ޑޮލަރު ތެލަށް ޚަރަދުކުރެއެވެ. ދުނިޔޭގެ ބާޒާރުގައި ތެލުގެ އަގު އުފުލެމުންދާކަން ފާހަގަކުރައްވައި ބޮޑުވަޒީރު ވަނީ، މި އަގު މިއަހަރު ނިމޭއިރު އިތުރު 40 އިންސައްތައަށް އުފުލިގެންދާނެކަމަށް ލަފާކުރައްވާކަމަށް ވިދާޅުވެފައެވެ.

ގައުމަށް މިހާރު ބޭނުންވާ ޒަރޫރީ މުދަލަށް ދާނެ ޚަރަދު މަޖިލީހުގައި ހިއްސާކުރައްވަމުން ބޮޑުވަޒީރު ރަނިލް ވިކްރަމަސިންގހަ ވަނީ، ތެލުގެ އިމްޕޯޓަށް ޚަރަދުކުރަން 3.3 ބިލިއަން ޑޮލަރު ބޭނުންވާނެކަމަށް ވިދާޅުވެފައެވެ. އަދި ކާނާގެ އެކި ބާވަތްތަކުގެ އިމްޕޯޓަށް 900 މިލިއަން ޑޮލަރު ބޭނުންވާނެ ކަމަށާއި، ކައްކާ ގޭހަށް ފައިސާ ދެއްކުމަށް 250 މިލިއަން ޑޮލަރު ބޭނުންވާނެކަމަށް ބޮޑުވަޒީރު ވިދާޅުވިއެވެ. މީގެ އިތުރުން ފަރޓިލައިޒަރއަށް ޚަރަދުކުރުމަށް 600 މިލިއަން ޑޮލަރު ބޭނުންވާނެ ކަމަށް ވިދާޅުވިއެވެ.

ބޮޑުވަޒީރު ވިކްރަމަސިންގހަ ވަނީ އެގައުމަށް ބޭނުންވާ ޒަރޫރީ ޚަރަދުތައް ކުރަން ކުރިއަށް އޮތް 6 މަސް ދުވަހުގެ ތެރޭގައި ޖުމްލަ 5 ބިލިއަން ޑޮލަރު ބޭނުންވާކަން ފާހަގަކުރައްވާފައެވެ.