މީޑިއާ ކައުންސިލްގެ ރައީސް އިސްތިއުފާ ދެއްވައިފި
ޝަހުބާން އިސްތިއުފާ ދެއްވާފައިވަނީ އަންގާރަ ދުވަހު
މީޑިއާ ކައުންސިލްގެ ރައީސް ޝަހުބާން ފަހުމީ
މޯލްޑިވްސް މީޑިއާ ކައުންސިލްގެ ރައީސް ޝަހުބާން ފަހުމީ މަގާމުން އިސްތިއުފާ ދެއްވައިފިއެވެ.
ޝަހުބާން އިސްތިއުފާ ދެއްވާފައިވަނީ އަންގާރަ ދުވަހުއެވެ.
އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން ޝަހުބާން ވިދާޅުވީ، އިސްތިއުފާ ދެއްވީ ކައުންސިލުގެ ރިޔާސަތުގެ ދަހިވެތިކަމުގައި އޭނާގެ ނަފްސުގެ ރައްކާތެރިކަން ގެއްލޭގޮތަށް ބަޔަކު ކުރަމުންދާ މަސައްކަތްތަކުގެ ސަބަބުން، ކައުންސިލުގެ މަސައްކަތްތައްވެސް ކުރިއަށް ނުގެންދެވޭ ހިސާބަށް ދިއުމުން ކަމަށެވެ.
ޝަހުބާން ވިދާޅުވީ، އޭނާ މަޤާމުން އިސްތިއުފާ ދެއްވުމަށް މަޖުބޫރު ކުރުވުމަށްޓަކައި ބައެއް މެމްބަރުން ކައުންސިލުގެ ޖަލްސާތައް ބޮއިކޮޓްކޮށް، ކޮމިޓީތައް ކުރިއަށް ގެންދިއުމަށް ހުރަސް އަޅަމުން ގޮސްފައިވާ ކަމަށެވެ. އެކަމުގެ ސަބަބުން ކައުންސިލުން ކުރަންޖެހޭ މުހިއްމު މަސައްކަތްތަކާއި، ފާސްކުރަންޖެހޭ މުހިއްމު ނިންމުންތައް މަޑުޖެހިފައިވާކަން ޝަހުބާން ފާހަގަ ކުރެއްވިއެވެ.
މޯލްޑިވްސް މީޑިއާ ކައުންސިލްގެ މެމްބަރުންގެ މެދުގައި ޚިޔާލުތަފާތުވެ, އެ ކައުންސިލުގައި މަރުތަޅު އެޅުވިފައިވާކަމަށް ކައުންސިލުގެ ބައެއް މެމްބަރުންވެސް މީގެ ކުރިން ވަނީ ވިދާޅުވެފައެވެ. އެގޮތުން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި މީޑިއާ ކައުންސިލްގެ މެމްބަރުން ވަނީ, ޝަހުބާން ފަހުމީއާއެކު މަސައްކަތް ކުރަން ބޭނުންނުވާކަމަށް ބުނެ ޚިޔާލު ފާޅުކޮށްފައެވެ.
އެއީ އޭނާގެ ހިއްސާ އޮންނަ ކުންފުންޏަކުން މަނީލޯންޑަރކުރާކަމުގެ ތުހުމަތުކޮށް، ތަހުގީގުގައި އޭނާއާ ސުވާލު ކޮށްފައިވާތީކަމަށް މެމްބަރުން ބުނެއެވެ.
އޭގެ އިތުރުން، ޝަހުބާން މަގާމުން އިސްތިއުފާ ދިނުމަށް ގޮވާލައި އެ ކައުންސިލްގެ ގިނަ މެމްބަރުން ސޮއިކޮށް ޤަރާރެއްވެސް ނެރެފައިވެއެވެ. އޭރު ޝަހުބާން ވިދާޅުވެފައިވަނީ، އެއްވެސް ކުށެއް ކޮށްފައި ނުވާނެ ކަމަށާއި ކުށެއްގެ ތުހުމަތު ކުރެވުމަކީ މަގާމުން އިސްތުފާން ދޭންވީ ސަބަބެއް ނޫން ކަމަށެވެ. އަދި އޭނާގެ މައްޗަށް ދައުވާއެއް ކޮށްފިނަމަ ވަގުތުން އިސްތިއުފާ ދެއްވާނެ ކަމަށް ވެސް އޭނާ ވިދާޅުވެފައިވެއެވެ.
