ސެނެގާލްގެ ބޫނާ ސަރއަށް ވޯލްޑް ކަޕްގައި ނުކުޅެވޭނެ

ސެނެގާލްގެ ޑިފެންޑަރު ބޫނާ ސަރއަށް މިފަހަރުގެ ވޯލްޑް ކަޕްގައި ނުކުޅެވޭނެ ކަމަށް އޭނާ ބުނެފިއެވެ.

ސަރއަށް ނުކުޅެވޭނެކަން އޭނާ ހާމަކުރީ އިންސްޓަގްރާމުގައި ކުރި ޕޯސްޓެއްގައެވެ. އެޕޯސްޓުގައި އޭނާ ވަނީ ކަކުލަށް ލިބުނު އަނިޔާއިން ސަލާމަތްވުމަށް އޮޕަރޭޝަން ކުރުމުގެ ސަބަބުން ވޯލްޑް ކަޕްގައި ނުކުޅެވޭނެ ކަމަށް ބުނެފައެވެ.

އުމުރުން 30 އަހަރުގެ ޑިފެންޑަރަށް ވަނީ ކަކުލަށް ލިބުނު އަނިޔާގެ ސަބަބުން ފާއިތުވި ދެއަހަރެއްހާ ދުވަހު ކުޅުމުގެ ބޮޑު ބައެއް ގެއްލިފައެވެ. ވާއަތު ފައިގެ ކަކުލަށް އަނިޔާވުމާއެކު މިދިޔަ ސީޒަންގައި އޭނާއަށް ކުޅެވުނީ ބަޔާން މިއުނިކްގެ އެންމެ 12 މެޗުގައެވެ. މި ސީޒަންގެ އެއްވެސް މެޗެއްގައި ސަރއަށް ނުކުޅެވެއެވެ. މިއަހަރުގެ ކުރީކޮޅު އެފްރިކާ ކަޕް އޮފް ނޭޝަންސްގައި ސެނެގާލް ކުޅުނު ހަތް މެޗުގެ ފުރަތަމަ 11 ގައިވެސް ސަރ ވަނީ ކުޅެފައެވެ.

އޮޕަރޭޝަން ކުރުމަށްފަހު ނަގާފައިވާ ފޮޓޯއެއް އިންސްޓަގްރާމުގައި ހިއްސާކޮށް ސަރ ބުނީ ވޯލްޑް ކަޕްގައި ނުކުޅެވުމަކީ އޭނާއަށް ލިބުނު ބަޔާން ކުރަން ދަތި ހިތްދަތިކަމެއް ކަމަށެވެ. އަދި މިއީ ވަރަށް އުނދަގޫ ނިންމުމެއްކަން ފާހަގަކޮށް ސަރ ބުނީ މިހާރު އޮޕަރޭޝަން ކުރަން ނިންމީ އޭނާގެ ކެރިއަރުގެ ކުރިމަގަށް ވިސްނާފައި ކަމަށެވެ.

ފްރާންސްގެ މާސޭއަށް ކުޅުމަށްފަހު ސަރ, ބަޔާންއަށް ބަދަލުވީ 2020 ވަނަ އަހަރުގެ އޮކްޓޫބަރު މަހުއެވެ. އޭގެ ފަހުން އޭނާ ވަނީ ބަޔާންއަށް 27 މެޗު ކުޅެދީފައެވެ. ސެނެގާލްގެ ޤައުމީ ޓީމަށް ސަރ ވަނީ މިހާތަނަށް 12 މެޗު ކުޅެދީފައެވެ.