މާލޭގައި ރަޖިސްޓްރީވެފައި ނުވާ ނަމަވެސް މާލޭގައި ދިރިއުޅެމުން ގެންދާތާ 15 އަހަރު ވެފައިވާ ފަރާތްތަކާއި، މާލޭގައި ރަޖިސްޓްރީވެފައިވާތާ 15 އަހަރުވެފައި ނުވާ ނަމަވެސް މާލޭގައި ދިރިއުޅެމުން ގެންދާތާ 15 އަހަރުވެފައިވާ ފަރާތްތަކަށް ވިނަރެސް ފްލެޓްތަކުން 100 ފްލެޓް ޚާއްސަކޮށްފައިވާކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން ބުނެފިއެވެ.

އެޗްޑީސީން ވަނީ ވިނަރެސް ފްލެޓްތައް ލިބޭނެ މީހުންގެ ޝަރުތުތައް އާންމުކޮށްފައެވެ. ބަލާނެ އާންމު އުސޫލުގެ ތެރޭގައި ހިމެނެނީ ދިވެހި ރައްޔިތަކަށްވުމާއި އުމުރުން 18 އަހަރުފުރުމާއި މާލޭގައި ރެޖިސްޓްރީވެފައިވާ ރައްވެއްސަކަށްވުމެވެ. މި އެޕްލިކޭޝަން ހުށަހެޅުމުގެ ކުރިން މާލެސިޓީ އިން ނުވަތަ ޕްރައިވެޓް ރިއަލްއެސްޓޭޓް މާރކެޓްއިން ހައުސިންގ ޔުނިޓެއް ނުވަތަ ބިމެއް އެއީ 600 އަކަފޫޓަށްވުރެ ބޮޑު ތަނެއް ގަނެ ނުވަތަ ގަތުމަށް، އެއްބަސްވުމެއްގައި ސޮއިކޮށް ފައިސާ ދައްކަން ފަށާފައި އޮވެގެންނުވުމަކީވެސް ޝަރުތެކެވެ. މި އެޕްލިކޭޝަންގެ ދަށުން އެވޯޑް ކުރެވޭ ހައުސިންގ ޔުނިޓް ލިބޭފަރާތަކުން މާލެ ސިޓީގައި ޕްރައިވެޓް ރިއަލްއެސްޓޭޓް ހައުސިންގ ޑިވެލޮޕްމަންޓަކަށް އެއްބަސްވުމެއްގައި ސޮއިކޮށް ފައިސާ ދައްކަންފަށާނަމަ، މި މަޝްރޫއުގެ ދަށުން ލިބިފައިވާ ބޯހިޔާވަހިކަން ދަޢުލަތަށް އަނބުރާ ނެގޭނެއެވެ. މީގެއިތުރުން މައި އެޕްލިކަންޓް ގޮތުގައި ހިމެނޭ ފަރާތް ވޭތުވެދިޔަ 3 އަހަރުގެ ތެރޭގައި، މާލެސިޓީގައި ދިރިއުޅުމަށް ހޯދިފައިވާ އެއްވެސް ތަނެއް އެއީ 600 އަކަފޫޓު ނުވަތަ އެއަށްވުރެ ބޮޑު ތަނެއް ވިއްކާފައި އޮވެގެން ނުވާނެއެވެ.

މި އެޕްލިކޭޝަން ހުށަހަޅާ ތާރީޚުގައި މައި އެޕްލިކަންޓް އަދި ކޯއެޕްލިކަންޓްއަކީ ސަރުކާރުގެ ބޯހިޔާވަހިކަމުގެ އެއްވެސް މަޝްރޫޢަކުން މީގެ ކުރިން ބޯހިޔާވަހިކަމެއް ލިބިފައިވާ ފަރާތަކަށް ވެގެންނުވާނެއެވެ. މަހަކަށްޖެހޭ ޖުމްލަ އާމްދަނީ 61000ރ (ފަސްދޮޅަސް އެއްހާށް) އަށްވުރެ އިތުރަށް ލިބޭ ފަތާތްތަކަށް މި ސްކީމްގައި ބައިވެރިއެއް ނުވެވޭނެއެވެ. މައި އެޕްލިނަންޓްއަކީ މާލެސިޓީއިން ފުރަތަމަ ފަހަރަށް އެޕާޓްމަންޓެއް ގަންނަ ފަރާތަކަށް ވާންޖެހޭއިރު ފުރަތަމަ ފަހަރަށް އެޕާޓްމަންޓް ގަންނަ ފަރާތަކީ ފްލެޓެއް، އެޕާޓްމެންޓެއް ނުވަތަ މާލެ ސިޓީގައި 600 އަކަފޫޓަށް ވުރެއް ބޮޑު ބިމެއް ނެތް ފަރާތްތައްކަމަށް ވާންވާނެއެވެ.

މިހާތަނަށް ވިނަރެސް ފްލެޓުތައް ހޯދުމަށް ފުރުސަތު ދީފައިވަނީ ހިޔާ މަޝްރޫއުގެ ދަށުން ފަންނީ ކެޓަގަރީތަކުން ފްލެޓު ލިބުނު މީހުންގެ ތެރެއިން ވިނަރެސްއަށް ބަދަލުވާން ބޭނުންވާ މީހުން، ސީލައިފްއިން ފްލެޓު ގަތް މީހުން އަދި ގުޅީފަޅުން ފްލެޓު ގަތުމަށް ފައިސާ ދައްކާފައިވާ މީހުންނަށެވެ.

އެ ފްލެޓުތައް ގަންނަން ޝައުގުވެރިވާ މީހުންނަށް ފްލެޓުތައް ބަލަން ދިޔުމުގެ ފުރުސަތާއި ފްލެޓުތަކާ ބެހޭ މައުލޫމާތު ދޭ ސެޝަންގައި ބައިވެރިވުމުގެ ފުރުސަތު އެޗްޑީސީން ވަނީ މިހާރު ހުޅުވާލާފައެވެ. މިސެޝަންތަކުގައި ބައިވެރިވެވޭނީ އެކަމަށް ރަޖިސްޓްރީކުރާ ފަރާތްތަކަށް އެކަންޏެވެ.

ވިނަރެސް ފްލެޓްތަކުގައި ހަތަރު ބާވަތެއްގެ އެޕާޓްމެންޓު ހުންނާނެއެވެ. އެއީ މެރީނާ ވިއު، އިނާ ވިއު، އައުޓާ ވިއު އަދި ސްޓޭންޑާޑް ވިއު އެޕާޓްމެންޓުތަކެވެ. އޭގެ ތެރެއިން ސްޓޭންޑާޑް ވިއު އެޕާޓްމެންޓުގައި ހުންނާނީ 883 އަކަފޫޓެވެ. ނަމަވެސް ބާކީ ތިން ބާވަތުގެ އެޕާޓްމެންޓުގައި 902 އަކަފޫޓު ހުންނާނެއެވެ.

އޭގެ ތެރެއިން ކޮންމެ އެޕާޓްމެންޓެއްގެ އަގު ވެސް 2.5 މިލިއަން ރުފިޔާއިން މަތީގައި އުޅޭ އިރު އެންމެ އަގު ބޮޑީ މެރީނާ ސައިޑް އެޕާޓްމެންޓްތަކެއްގައެވެ. އެ އެޕާޓްމެންޓްތަކުގެ އަގު ތިން މިލިއަން ރުފިޔާއަށް އަރައެވެ.

މި ފްލެޓުތަކަށް ކުލިދެއްކުމަށް ދެ ގޮތެއް އެޗްޑީސީން ވަނީ ކަނޑައަޅާފައެވެ. ފުރަތަމަ ގޮތަކީ އެޕާޓްމަންޓްގެ އަގުގެ 15 ޕަސެންޓާއި 19 ޕަސެންޓާ ދެމެދުގެ އަދަދެއް ޑައުންޕޭމެންޓްގެ ގޮތުގައި ދެއްކުމެވެ. އެއަށްފަހު ބާކީ އަދަދު 20 އަހަރަށް ބަހާލައިގެން ދެއްކުމެވެ.

ދެވަނަ ގޮތަކީ އެޕާޓްމެންޓްގެ އަގުގެ 20 ޕަސެންޓް ނުވަތަ އެއަށްވުރެއް މަތީ އަދަދެއް ޑައުންޕޭމެންޓްގެ ގޮތުގައި ދެއްކުމަށް ފަހު ބާކީ އަދަދު 25 އަހަރަށް ބަހާލައިގެން ދެއްކުމެވެ.

އެޗްޑީސީން ބުނީ އެ ދެ ގޮތަށްވެސް އެޕާޓްމަންޓްގެ ޑައުންޕޭމެންޓް އެއްފަހަރާ ނުވަތަ މަޝްރޫއު ނިމޭ ތާރީޚާއި ހަމައަށް ބަހާލައިގެން ދެއްކޭނެ ކަމަށެވެ. އެޕާޓްމެންޓްގެ މަހު ކުލި ދައްކަންޖެހޭނީ އެޗްޑީސީން ނިންމާފައިވާ ގޮތުގެ މަތިން މަޝްރޫއު ނިމި އެޕާޓްމަންޓާއި ހަވާލުވާން ފަށާ ތާރީޚުން ފެށިގެންނެވެ.

ވިނަރެސް މަޝްރޫއުގެ ދަށުން ތައްޔާރުކުރާ 1،344 ފްލެޓް ހުންނާނީ 10 ޓަވަރަށް ބަހާލާފައެވެ. އަދި ކޮންމެ ޓަވަރެއްގައި 13 ފަންގިފިލާ ހުންނައިރު، ކޮންމެ އެޕާޓްމެންޓެއްގައި 3 ކޮޓަރިއާއި 3 ފާޚާނާގެ އިތުރުން ބެލްކަންޏެއް ހުންނާނެއެވެ. 

ވިނަރެސް ފްލެޓުތަކުގެ މަސައްކަތް ނިންމައި އަންނަ ޖުލައި މަހުގެ ތެރޭގައި އެޗްޑީސީއާ ހަވާލުކުރާނެ ކަމަށް މިނިސްޓަރ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗާ މުހައްމަދު އަސްލަމް ވަނީ ވިދާޅުވެފައެވެ.