ޤާނޫނުއަސާސީ އާއި ބަޖެޓާއި ޚިލާފަށް ސަރުކާރައި އެމްއެމްއޭ އިން ކުރާ ކަންކަމާއި މެދު މެމްބަރުން ދެކޭ ގޮތްް ހޯދުމަށް މަޖިލީހަށް ޤަރާރެއް ހުށަހަޅައިފި

ޤާނޫނުއަސާސީ އާއި ބަޖެޓާއި ޚިލާފަށް ސަރުކާރާއި މޯލްޑިވްސް މަނިޓަރޯ އޮތޯރިޓީ (އެމްއެމްއޭ) އިން ކުރަމުންދާ ކަންކަމާއި މެދު މަޖިލީހުގެ މެމްބަރުން ދެކެވަޑައިގަންނަވާ ގޮތެއް ދެނެގަތުމަށް ރައްޔިތުންގެ މަޖިލީހަށް ގަރާރެއް ހުށަހަޅައިފިއެވެ.

މަޖިލީހަށް އެ ގަރާރު ހުށަހަޅުއްވާފައި ވަނީ ހުޅުމާލެ ދެކުނު ދާއިރާގެ މެމްބަރު ޑރ.އަހުމަދު ޝަމްހީދުއެވެ.

އެ ގަރާރުގައި ބުނެފައި ވަނީ އެ މައްސަލަ ހުށަހަޅަނީ ޤާނޫނުއަސާސީ އާއި މޯލްޑިވްސް މަނިޓަރީ ޤާނޫނާއި، ދައުލަތުގެ މާލިއްޔަތު ޤާނޫނާއި، ދައުލަތުގެ ފިސްކަލް ޒިންމާގެ ޤާނޫނާއި، މާލީ އުސޫލުތަކާއި ޚިލާފަށް އަދި މަޖިލީހުން ފާސްކުރި 2025 ވަނަ އަހަރުގެ ބަޖެޓާއި ޚިލާފަށް މި ސަރުކާރުން ކުރާ ކަންކަމާއި މެދު މެމްބަރުން ދެކޭ ގޮތެއް ދެނެގަތުން ކަމަށެވެ.

އެ ގަރާރުގައި ބުނެފައި ވަނީ ޤާނޫނުއަސާސީގެ 96 ވަނަ މާއްދާގެ (ށ)ގައި މަޖިލީހުގެ ހުއްދަ ނުހޯދާ ބަޖެޓަށް ވުރެ އިތުރަށް ޚަރަދުކޮށްގެން ނުވާނެ ކަމަށާއި އަދި ބަޖެޓްގައި ކަމަކަށް އޮތް ފައިސާ އެއް ޚަރަދުކުރަން ވާނީ އެކަމަކަށް އެކަނި ކަމަށް ބަޔާންކޮށްފައިވާ ކަމަށެވެ. މީގެ އިތުރުން މަނިޓަރީ ޤާނޫނުގެ މައިގަނޑު މަސައްކަތާއި ބާރަކީ މަނިޓަރީ ސިޔާސަތު ކަނޑައެޅުމާއި، އިންޓްރެސްޓް ރޭޓާއި ފައިސާ ލިބެން ހުންނަ ގޮތާއި ގުޅޭ ގޮތުން އެކަށީގެންވާ ނިންމުންތައް ކަނޑައެޅުން ކަމަށް ވެސް އެ ގަރާރުގައި ވަނީ ބުނެފައެވެ.

ދައުލަތުގެ މާލިއްޔަތު ޤާނޫނުގައި ނުވަތަ މާލިއްޔަތު ޤަވައިދުގައި ބަޔާންކުރާ ގޮތަށް ނޫން ގޮތަކަށް ދައުލަތުގެ ފައިސާ އިން ޚަރަދުކުރުން ނުވަތަ ދައުލަތުގެ މުދަލެއް ވިއްކާލުން، ނައްތާލުން ނުވަތަ ދޫކޮށްލުން އެއީ ހުއްދަ ނޫން އަމަލެއް ކަމަށް އެ ޤާނޫނުގެ ދަށުން ބެލެވޭ ކަމަށް ވެސް ޑރ.ޝަމްހީދު ހުށަހެޅުއްވި ގަރާރުގައި ބަޔާންކޮށްފައިވެއެވެ.

އެހެންކަމަށް ވާއިރު އެމްއެމްއޭ އިން ފައިސާ ނެގުމުގެ ބޭނުމަށް، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މިލްކިއްޔާތުގައިވާ ބިމެއް އެމްއެމްއޭ އަށް ގަތުމުގެ މުއާމަލާތެއް ހިންގުމަށް ފަހު، އެ ފައިސާ އެޗްޑީސީ މެދުވެރިކޮށް ސަރުކާރަށް ދިނުމަށް ހުޅުމާލެ އިން ބިން ގަތުމަށް ނިންމި ކަމުގެ މައުލޫމާތު ލިބިވަޑައިގެންފައިވާ ކަމަށް ޑރ.ޝަމްހީދު ވަނީ ފާހަގަކުރައްވާފައެވެ.

އެމްއެމްއޭ އަށް ބޭނުންވާ ވަރަށް ވުރެ އިތުރަށް އިމާރާތްތަކާއި ބިންތައް ހޯދަން ޖެހޭ މަގްބޫލް ސަބަބެއް ނެތްކަމަށާއި އޭގެ ފަހަތުގައި ފިރުވިފައިވާ ކަންތައްތަކެއް އޮތް ކަމަށް ބެލެވޭ ކަމަށް އެ ގަރާރުގައިވެއެވެ. އެއީ މާލީ އުސޫލުތަކާއި ޤާނޫނާއި ޤަވާއިދުތައް އެއް ފަރާތްކުރުން ކަމަށް އެ ގަރާރުގައި ބަޔާންކޮށްފައިވެއެވެ.

ހަމައެހެންމެ އެއީ އެމްއެމްއޭގެ މިނިވަންކަން ގެއްލި މުޅި މާލީ ނިޒާމަށް ވެސް އިތުބާރު ގެއްލިދާނެ ކަމެއްކަމަށް ފާހަގަކޮށްފައިވެއެވެ. މިކަމުގެ ސަބަބުން ދިވެހި ރުފިޔާގެ އަގު ދަށްވެ، މުދަލާއި ތަކެތީގެ އަގު އުފުލޭނެ ކަމަށް ވެސް އެ ގަރާރުގައިވެއެވެ. އެހެންކަމުން އެ ކަންކަމާއި މެދު ޖަވާބުދާރީކުރުވުމަށް މަޖިލީހުން ދެކޭ ގޮތެއް ދެނެގަތުމަށް އެ ގަރާރު ހުށަހަޅަނީ ކަމަށް އެ ގަރާރުގައި ބަޔާންކޮށްފައިވެއެވެ.

މާރޗް 10 ވަނަ ދުވަހު ހުށަހެޅި އެ ގަރާރުގެ ފުރަތަމަ ކިޔުން އިއްވުން، 18 މާރޗް 2025ގެ އެޖެންޑާގައި ވަނީ ހިމަނާފައެވެ.