އޭޕްރިލް މަހު ގްރީން ޓެކްސްގެ ގޮތުގައި 87 މިލިއަން ރުފިޔާ ލިބިއްޖެ

ނިމިދިޔަ އޭޕްރިލް މަހު ގްރީން ޓެކްސްގެ ގޮތުގައި 87،253،884.94 (އަށްޑިހަ ހަތް މިލިއަން ދެލައްކަ ފަންސާސް ތިންހާސް އަށްސަތޭކަ އަށްޑިހަ ހަތަރު ރުފިޔާ ނުވަދިހަ ހަތަރު ލާރި) ދައުލަތަށް ލިބިއްޖެއެވެ.

ފިނޭންސް މިނިސްޓްރީން ވަނީ އޭޕްރިލް މަހުގެ ގްރީން ފަންޑު ރިޕޯޓު އާންމުކޮށްފައެވެ.

މި ރިޕޯޓުން ދައްކާގޮތުން ރިސޯޓުތަކުން އެކަނި ގްރީން ޓެކްސްގެ ގޮތުގައި 81.2 މިލިއަން ރުފިޔާ ވަނީ ލިބިފައެވެ. ހޮޓެލްތަކުން 1.08 މިލިއަން ރުފިޔާ ލިބިފައިވާއިރު، ގެސްޓްހައުސްތަކުން 2.7 މިލިއަން ރުފިޔާ ލިބިފައިވެއެވެ. ގެސްޓްހައުސްތަކުންނާއި، ހޮޓާ އަދި ރިސޯޓުތަކުން ގްރީން ފަންޑުގެ ގޮތުގައި 85.1 މިލިއަން ރުފިޔާ ލިބިފައިވާއިރު، ލިވްއަބޯޑް އަދި އުޅަނދުތަކުން 2.1 މިލިއަން ރުފިޔާ ލިބިފައިވެއެވެ. އޭޕްރިލް މަހު ޖުމްލަ 87.2 މިލިއަން ރުފިޔާ ވަނީ ގްރީން ފަންޑުގެ ގޮތުގައި ދައުލަތަށް ލިބިފައެވެ.

މިއީ މިއަހަރު ފާއިތުވި އެހެން މަސްތަކަށްވުރެ ދަށް އަދަދެއް ކަމަށް ރިޕޯޓުން ވަނީ ދައްކާފައެވެ. މިގޮތުން ޖެނުއަރީ މަހު 95،1 މިލިއަން ރުފިޔާ ގްރީން ޓެކްސްގެ ގޮތުގައި ލިބިފައިވާއިރު، ފެބްރުއަރީ މަހު 91.4 މިލިއަން ރުފިޔާ ލިބިފައިވެއެވެ. އަދި މާރޗް މަހު 105.7 މިލިއަން ރުފިޔާ ދައުލަތަށް ވަނީ ލިބިފައެވެ. މިއާއެކު މިއަހަރުގެ މިހާތަނަށް ގްރީން ޓެކްސްގެ ގޮތުގައި 379.5 މިލިއަން ރުފިޔާ ދައުލަތަށް ވަނީ ލިބިފައެވެ.

އޭޕްރިލް މަހު ގްރީން ފަންޑުން ޚަރަދުކޮށްގެން ގިނަ މަޝްރޫއުތަކެއް ހިންގާފައިވާކަމަށް މި ރިޕޯޓުން ދައްކައެވެ. ގޮނޑުދޮށް ހިމާޔަތްކުރުމާއި، ފެނާއި ނަރުދަމާގެ މަޝްރޫއުތަކާއި، ބަނދަރުގެ މަޝްރޫއުތައް ފަދަ މުހިންމު މަޝްރޫއުތަކެއް ހިމެނޭހެން މުޅި ޖުމްލަ 31 މަޝްރޫއަކަށް ޚަރަދުކޮށްފައިވާކަމަށް މި ރިޕޯޓުން ދައްކައެވެ. މި 31 މަޝްރޫއަށް 59.6 މިލިއަން ރުފިޔާ ވަނީ ޚަރަދުކޮށްފައެވެ.

އޭޕްރިލް މަހު ގްރީން ފަންޑުގެ ފައިސާ ބޭނުންކޮށްފައިވާ މިންވަރު ފެބްރުއަރީ އަދި މާރޗް މަހާ އަޅާ ބަލާއިރު ނިސްބަތުން ވަނީ ދަށްވެފައެވެ. ފެބްރުއަރީ މަހު 107.8 މިލިއަން ރުފިޔާ އެކި މަޝްރޫއުތަކަށް ހޭދަކޮށްފައިވާއިރު، މާރޗް މަހު މަޝްރޫއުތަކަށް ހޭދަކޮށްފައިވަނީ 140.5 މިލިއަން ރުފިޔާއެވެ. ޖެނުއަރީ މަހު ގްރީން ފަންޑުން ހޭދަކުރި 11.8 މިލިއަން ރުފިޔާއާއެކު އަހަރުގެ އޭޕްރިލް މަހުގެ ނިޔަލަށް ގްރީން ފަންޑުން ހޭދަކުރި މިންވަރު ވަނީ 319.8 މިލިއަން ރުފިޔާއަށް އަރާފައެވެ.

ގްރީން ޓެކުހަކީ ރާއްޖެ އަންނަ ފަތުރުވެރިންގެ އަތުން ނަގާ ޓެކުހަކަށް ވުމުން، ފަތުރުވެރިން އައުން މަަދުވާނަމަ ގްރީން ފަންޑަށް ޖަމާވާ ފައިސާ މަދުވާނެއެވެ. ރާއްޖެ އަންނަ ފަތުރުވެރިންގެ ތެރެއިން ސަފާރީ، ރިސޯޓް އަދި ހޮޓެލްތަކަށް އަންނަ ފަތުރުވެރިންގެ އަތުން ގްރީން ޓެކުހުގެ ގޮތުގައި ދުވާލަކަށް 6 ޑޮލަރު ނަގައެވެ. އަދި ގެސްޓް ހައުސްތަކަށް ޒިޔާރަތްކުރާ ފަތުރުވެރިންގެ އަތުން ގްރީން ޓެކުހުގެ ގޮތުގައި ނަގަނީ ދުވާލަކަށް 3 ޑޮލަރެވެ.