އަންނަ އަހަރަށް ދައުލަތުން ލަފާ ކުރާ ބަޖެޓު ރައްޔިތުންގެ މަޖިލީހަށް ހުށަހަޅަން މަސައްކަތް ކުރަމުން އަންނައިރު، ޖަލްސާ ނުބޭއްވި ލަސްވަމުން ދަނީ ބަޖެޓް ފޮތް ޗާޕު ނުކުރެވިގެން ކަން ހާމަވެއްޖެ އެވެ.

ރައްޔިތުންގެ މަޖިލީހަށް ސަރުކާރުން ބަޖެޓު ހުށަހަޅަން ތާވަލު ކޮށްފައި އޮތީ ބުރާސްފަތި ދުވަހަށެވެ. އެކަމަށްޓަކައި އެންމެ ފުރަތަމަ ރައްޔިތުންގެ މަޖިލީހުގެ ޖަލްސާ ތާވަލު ކުރީ ބުރާސްފަތި ދުވަހުގެ ހެނދުނު 09:00 އަށެވެ. އެ ޖަލްސާގެ އެޖެންޑާގައި ވެސް އޮތީ 2026 ވަަނަ އަހަރަށް ދައުލަތުން އަންދާޒާ ކުރާ ބަޖެޓު ހުށަހެޅުމެވެ.

ނަމަވެސް، ފަހުން އެ ޖަލްސާ ވަނީ ބުރާސްފަތި ދުވަހުގެ މެންދުރު ފަހަށް ބަދަލު ކޮށްފަ އެވެ. އެކި އެކި މަސްދަރު ތަކުން މައުލޫމާތު ލިބިފައިވާ ގޮތުގައި އެ ޖަލްސާ ފަސް ކުރަން ޖެހުނީ، ފިނޭންސް މިނިސްޓްރީ އަށް ބަޖެޓު ތައްޔާރު ނުކުރެވިގެންނެވެ. ބަޖެޓު ފޮތުގެ މަސައްކަތް އެއްކޮށް ނިންމިފައި ނުވާ ކަމަށް މައުލޫމާތު ލިބޭއިރު، އަދި ވެސް މަޖިލީހުގެ މެމްބަރުންނަށް ބަޖެޓު ފޮތް ހިއްސާ ނުކުރެ އެވެ.

އެކަމާ ގުޅިގެން މިހާތަނަށް ފިނޭންސް މިނިސްްޓްރީ އިން ވެސް ވަކި އެއްޗެއް ހާމަކޮށްފައި ނުވެ އެވެ. އެގޮތުން ބަޖެޓާ ގުޅޭ އެއްވެސް ތަފްސީލެއް ހާމަ ކޮށްފައި ނުވާއިރު، މަޖިލީހަށް ހުށަހަޅީ ކިހާ ވަރެއްގެ ބަޖެޓެއް ކަމެއް ވެސް ހާމަ ކޮށްފައި ނުވެ އެވެ. އެކި އެކި މަސްދަރު ތަކުން މައުލޫމާތު ލިބިފައިވާ ގޮތުގައި އަންނަ އަހަރަށް ލަފާ ކޮށް ހުށަހަޅާ ބަޖެޓަކީ، ރެކޯޑު ބަޖެޓަކަށް ވާނެ އެވެ.

އަންނަ އަހަރުގެ ބަޖެޓާ ގުޅިގެން ވާހަކަ ދައްކަވަމުން މީގެ ކުރިން ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވިދާޅުވެފައި ވަނީ، 2026 ވަނަ އަހަރުގެ ބަޖެޓުގައި އެންމެ ބޮޑު އިސްކަމެއް ދޭނީ ސިއްހީ ދާއިރާއާ ގުޅުންހުރި ކަންކަމަށް ކަމަށެވެ.

މި އަހަރުގެ ބަޖެޓު ހުށަހަޅަމުން ސަރުކާރުން ބުނީ މި އަހަރުގެ ބަޖެޓަކީ ބޯހިޔާވަހި ކަމުގެ ބަޖެޓެއް ކަމަށެވެ. އަދި މި އަހަރަށް ކަނޑައެޅީ ރާއްޖޭގެ މުޅި ތާރީޚުގައި ވެސް ބޯހިޔާވަހި ކަމުގެ މައްސަލަ ހައްލު ކުރަން ކަނޑައެޅި އެންމެ ބޮޑު ބަޖެޓު ކަން ބަޖެޓު ހުށަހަޅުއްވަމުން ފިނޭންސް މިނިސްޓަރު ވިދާޅުވި އެވެ.

ބޯހިޔާވަހި ކަމުގެ މަޝްރޫއު ތަކަށް 1.8 ބިލިއަން ރުފިޔާ މިއަހަރުގެ ބަޖެޓުގައި ހިމެނި ނަމަވެސް، ފިނޭންސް މިނިސްޓްރީ އިން އާންމު ކުރާ ފިސްކަލް ޑިވެލޮޕްމަންޓްސް ރިޕޯޓުގައިވާ ގޮތުން ބޯހިޔާވަހިކަމަށް މިހާތަނަށް ޚަރަދު ކުރީ ބަޖެޓު ކުރި އަދަދުގެ އެންމެ ނުވަ އިންސައްތަ އެވެ.