ބަޖެޓް 2026: ބަޖެޓުގެ 62 އިންސައްތަ ހިންގުމުގެ ޚަރަދަށް

އަންނަ 2026 ވަނަ އަހަރަށް ލަފާކޮށް ދައުލަތުން ހުށަހެޅި 64.2 ބިލިއަން ރުފިޔާގެ ބަޖެޓުގެ 62 އިންސައްތަ ރިކަރަންޓް ޚަރަދަށް ކަނޑައަޅައިފި އެވެ.

ބުރާސްފަތި ދުވަހުގެ ރައްޔިތުންގެ މަޖިލީހުގެ ޖަލްސާގައި އަންނަ އަހަރަށް ދައުލަތުން ލަފާ ކުރާ ބަޖެޓު ހުށަހަޅުއްވައި ދެއްވީ ފިނޭންސް މިނިސްޓަރު މޫސާ ޒަމީރު އެވެ. މިނިސްޓަރު ވިދާޅުވީ ރިކަރަންޓު ޚަރަދުގެ ގޮތުގައި ޖުމްލަ ބަޖެޓުގެ 39.9 ބިލިއަން ރުފިޔާ ޚަރަދު ވާނެ ކަމަށެވެ.

މީގެ ތެރެއިން މުވައްޒަފުންގެ މުސާރަ އާއި އިނާޔަތްތަކަށް 15.7 ބިލިއަން ރުފިޔާ ޚަރަދުކުރަން ބަޖެޓުގައި ހިމަނާފައި ވެއެވެ. އިދާރީ ޚަރަދަށް 6.2 ބިލިއަން ރުފިޔާ، އިންޓްރެސްޓް ޕޭމަންޓަށް 5.6 ބިލިއަން ރުފިޔާ، ސަބްސިޑީއަށް 2.9 ބިލިއަން ރުފިޔާ އަދި ސޯޝަލް ކޮންޓްރިބިއުޝަނަށް 6.2 ބިލިއަން ރުފިޔާ ޚަރަދު ކުރަން ވެސް ހިމަނާފައި ވެއެވެ.

ޒަމީރު ވިދާޅުވީ މި ބަޖެޓު އަމާޒުކުރެވިފައި ވަނީ ދިވެހިންގެ ދިރިއުޅުމަށް ފައިދާކުރާނެ ދާއިރާތަކަށް ކަމަށެވެ. އެއީ ތައުލީމާއި، ސިއްހަތާއި، ބޯހިޔާވަހިކަމާއި، ވަޒީފާ އަދި ދިރިއުޅުމުގެ އަގުތަކަށް ހެޔޮ ބަދަލުތަކެއް ގެނުވާނެ ދާއިރާތައް ކަމަށް ވެސް މިނިސްޓަރު ވިދާޅުވި އެވެ.

ބަޖެޓް ތަފްސީލުތަކުން ދައްކާ ގޮތުގައި، 2026 ވަނަ އަހަރު ދައުލަތުގެ ޖުމްލަ އާމްދަނީ އާއި އެހީގެ ގޮތުގައި ލިބޭނެ ކަމަށް ލަފާކުރެވެނީ 40.4 ބިލިއަން ރުފިޔާ އެވެ. މީގެ ތެރެއިން ޓެކްސްގެ ގޮތުގައި ލިބޭނެ ކަމަށް ލަފާ ކޮށްފައިވަނީ 31.3 ބިލިއަން ރުފިޔާ އެވެ. ނޮން-ޓެކްސް އާމްދަނީގެ ގޮތުގައި 8.7 ބިލިއަން ރުފިޔާ ލިބޭނެ ކަމަށް ލަފާކޮށްފައިވެ އެވެ.

އަންނަ އަހަރު ދައުލަތުގެ އޯވަރޯލް ބަޖެޓް ޑެފިސިޓް 8.8 ބިލިއަން ރުފިޔާއަށް އަރާނެ ކަމަށް ލަފާ ކޮށްފައި ވެއެވެ. މިއީ ޖީޑީޕީގެ 7.1 ޕަސެންޓެވެ.

މި ތަފާސްހިސާބުތަކުން ދައްކާ ގޮތުގައި، ސަރުކާރުގެ ޚަރަދުތައް އަންނަ އަހަރުތަކުގައި އިތުރުވެގެން ދާއިރު، އާމްދަނީ އިތުރުކުރުމަށް ވެސް ބޮޑެތި މަސައްކަތްތަކެއް ކުރަން ވަނީ ޖެހިފަ އެވެ.

ބަޖެޓް ޑެފިސިޓް ފުއްދުމަށް، 2026 ވަނަ އަހަރު 26.3 ބިލިއަން ރުފިޔާގެ ފައިނޭންސިންގް ހޯދަން ޖެހޭނެ ކަމަށް އަންދާޒާ ކޮށްފައިވެ އެވެ. މީގެ ތެރެއިން ބޭރު ފަރާތްތަކުންގެ އެހީގައި 16.8 ބިލިއަން ރުފިޔާ އެހެނިހެން ގޮތްގޮތުން 9.1 ބިލިއަން ރުފިޔާ ހޯދަން ބަޖެޓުގައި ހިމަނާފައި ވެއެވެ.