ބަޖެޓް ސަރޕްލަސް ކަމަށް ދައްކަނީ ޝާއިއު ކުރާ ރިޕޯޓްތަކުގައި މަކަރު ހަދައިގެން: އަމީރު

ސަރުކާރުގެ ބަޖެޓް ސަރޕްލަސް ކަމަށް ދައްކަނީ ޝާއިޢުކުރާ ރިޕޯޓުތަކުގައި މަކަރު ހަދައިގެން ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

ރާއްޖެޓީވީގެ ޓީވީ ޓޯކް ޕްރޮގްރާމުގައި ވާހަކަ ދައްކަވަމުން އަމީރު ވިދާޅުވީ މިދިޔަ އަހަރު ޖޫން މަހުން ފެށިގެން ސެޕްޓެންބަރާ ހަމައަށް ފިނޭންސް މިނިސްޓްރީން ނެރޭ ޕަބްލިކޭޝަންތައް ހުއްޓާލާފައިވާ ކަމަށެވެ. އަދި މިއަހަރު ބޮޑަށް ފާހަގަވަނީ ހުންނަ ހިސާބުތައްވެސް ހިސާބުތަކަށް ނުވައްދާ، ހިސާބުތައް އޮޅުވާލަން މަސައްކަތްކުރާ މަންޒަރު ކަމަށާއި، ބޭރުން ފަންޑު ލިބިގެން ކުރިއަށްދާ ޕްރޮޖެކްޓްތަކުގެ ތެރޭގައި ބްރިޖާއި އެއަރޕޯޓުގެ މަސައްކަތްތައް ނުހުއްޓި ކުރިއަށްދާ ކަމަށެވެ.

ވީކްލީ ފިސްކަލް ޑިވެލޮޕްމަންޓްސް ރިޕޯޓުތައް ޝާއިޢުކުރުން ލަސްކުރަމުންދާ ކަމަށް އަމީރު ފާހަގަކުރެއްވިއެވެ. މީގެ އިތުރުން، ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮޖެކްޓްތައް މިހާރު ވަނީ ހުއްޓިފައި ކަމަށާއި، ގާތްގަނޑަކަށް 12 ބިލިއަން ރުފިޔާގެ ބިލުތައް ޕްރައިވެޓް ސެކްޓަރގެ ކޮންޓްރެކްޓަރުންނަށް ނުދައްކާ ހުރި ކަމަށް އޭނާ ވިދާޅުވި އެވެ.

މިހާރު ހަމަ އެއްކޮށްހެން ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮޖެކްޓްސްތައް ހުއްޓިފައި މިހިރީ. ދެން އޭގެއިން މި ވަނީ، ދެ ގޮތެއް. އެއީ އެއްވެސް ގޮތަކަށް ބިލަށް ފައިސާއެއް ނުދެއްކޭ. ގާތްގަނޑަކަށް ދިހަބާރަވަރަކަށް ބިލިއަން ރުފިޔާގެ ބިލުތައް އެބަހުރި ޕްރައިވެޓް ސެކްޓަރގެ ކޮންޓްރެކްޓަރުންނަށް ފައިސާ ނުދީ. ދެން ފައިސާ ނުދޭނަމަ މި ވާ ގޮތަކީ، ޕްރޮޖެކްޓް އިތުރަށް ކުރިއަށް ގެންދަންވެސް އަނެއްކާ ޕްރޮގްރެސިވް ޕޭމަންޓްސް ހޯދަން އެ ބޭފުޅުން ބިލުތައް ފިނޭންސަށް ފޮނުވަންވެސް، ސަރުކާރަށް ފޮނުވަންވެސް އެ ބޭފުޅުންނަށް ދެން އެކަމެއްވެސް ނުކުރެވޭނެތާ ޕްރޮޖެކްޓުން އޮންނާނީ ހުއްޓިފަތާ. އެހެންވީމާ، އެގޮތަށް އެ މަސައްކަތް އެދަނީ. އެހެންވީމާ، ހަމަ ސަރޕްލަސް ބޮޑުކަމަށް ދައްކާނެ. ދެން އަޅުގަނޑުމެން މިހާރު 2025 ވަނަ އަހަރު ބަޖެޓުގައި އެ ބޭފުޅުން މަޖިލީހުން ފާސްކުރި ބަޖެޓުގައި 9 ބިލިއަން ރުފިޔާގެ ޑެފިސިޓެއް އޮންނާނެ ކަމަށް އެ ބޭފުޅުން މަޖިލީހުން ފާސްކުރި ބަޖެޓުގައި އޮތީ. އެހެންވީމާ، އަޅުގަނޑު ދެކޭގޮތުގައި ހަމަ އަހަރު ނިމޭއިރު، ގާތްގަނޑަކަށް ހަމަ 9 ބިލިއަން ރުފިޔާގެ ޑެފިސިޓެއްގައި ހަމަ މިއަހަރުވެސް ނިމިގެންދާނީ އިނގޭތޯ.

ކުރީގެ ފިނޭންސް މިނިސްޓަރު އިބްރާހިމް އަމީރު

2025 ވަނަ އަހަރުގެ ބަޖެޓުގައި 9 ބިލިއަން ރުފިޔާގެ ޑެފިސިޓެއް އޮންނާނެ ކަމަށް މަޖިލީހުން ފާސްކޮށްފައިވާއިރު، 2024 ވަނަ އަހަރުވެސް ނިމިގެންދާނީ މިވަރުގެ ޑެފިސިޓެއްގައި ކަމަށް އަމީރު ލަފާކުރައްވައެވެ. 2024 ވަނަ އަހަރު 20 ބިލިއަނަށްވުރެ ގިނަ ރުފިޔާ ދަރަނީގެ ގޮތުގައި ނަގާފައިވާ ކަމަށްވެސް އޭނާ ފާހަގަކުރެއްވި އެވެ.

މިއަހަރުގެ ބަޖެޓުގައި ބޭރުން 432 މިލިއަން ޑޮލަރު ބަޖެޓް ސަޕޯޓުގެ ގޮތުގައި އަދި 100 މިލިއަން ޑޮލަރު ހިލޭ އެހީގެ ގޮތުގައި ހޯދާނެ ކަމަށް ބަޔާންކޮށްފައިވީ ނަމަވެސް، މިއިން އެއްވެސް ފައިސާއެއް ނުލިބޭ ކަމަށް އަމީރު ވިދާޅުވިއެވެ. މިކަމުގެ ސަބަބުން ޚަރަދުތައް ކުރަމުންދަނީ ރާއްޖޭގެ ބޭންކުތަކާއި ކުންފުނިތަކުގެ ކޭޝް ފްލޯ ބޭނުންކޮށްގެން ކަމަށާއި، މިކަމުގެ ސަބަބުން ބްލެކް މާކެޓުގެ ރޭޓްތައް މައްޗަށް ދާނެ ކަމަށްވެސް އޭނާ ވިދާޅުވި އެވެ.