މި ނޫނީ ބިލުތަކަށް ފައިސާ ދޭނެ ތާރީޚެއް ނުދޭ ސަރުކާރަކާ ދިމަލެއް ނުވޭ، މި ނާގާބިލު ސަރުކާރުގެ ސަބަބުން ޕްރައިވެޓް ސެކްޓަރ ނެތި ހިނގައިދާނެ: ވިޔަފާރިވެރިއެއް
ސަރުކާރުން ދޭންޖެހޭ ފައިސާ ނުދީ ލަސްކުރުމުގެ ސަބަބުން އަމިއްލަ ވިޔަފާރިތަކަށް ނުހަނު ބޮޑެތި ގެއްލުންތަކާ ކުރިމަތިލާން ޖެހި އެތައް ކުންފުންޏެއް ބަނގުރޫޓުވުމާ ކުރިމަތިލާން ޖެހިފައިވާ ކަމަށް ވިޔަފާރިވެރިން އަންނަނީ ބުނަމުން.
މިނިސްޓަރ އޮފް ފިނޭންސް އެންޑް ޕްލޭނިންގ މޫސާ ޒަމީރު
އަމިއްލަ ކުންފުނިތަކަށް ސަރުކާރުން ދޭން ޖެހޭ ފައިސާ ދިނުމުގައި މި ނޫނީ ތާރީޚެއް ނުދޭ ސަރުކާރަކާ އަދި ދިމާ ނުވާ ކަމަށް ވިޔަފާރިވެރިއަކު ބުނެފިއެވެ.
އޭނާ ބުނީ މި ވެތުވެދިޔަ ވޭތުވެދިޔަ 9 އަހަރުގެ ތެރޭގައި 3 ސަރުކާރަކާ އެކު މަސައްކަތްކުރި ކަމަށާއި، ހުރިހާ ސަރުކާރަކަށް ވެސް ފައިސާ ދެއްކުމުގައި ލަސްވުން ދިމާވާ ކަމަށެވެ. އެހެން ނަމަވެސް، ކޮވިޑްގެ ބަލިމަޑުކަން ފަދަ އިޤްތިޞާދީ ހީނަރުކަމުގެ ދުވަސްވަރުގައި ވެސް، ފައިސާ ދައްކާނެ ތާރީޚެއް އަބަދުވެސް ދޭ ކަމަށް އޭނާ ބުންޏެވެ. އޭނާ ފާހަގަ ކުރި ގޮތުގައި ވޭތުވެދިޔަ 2 މަހުގެ ތެރޭގައި، މިނިސްޓްރީ އޮފް ފިނޭންސް އިން އެމީހުންގެ ފައިސާ ދެއްކުމުގެ ތާވަލު މުޅިން އުވާލަފައިވާ ކަމަށެވެ.
"އަޅުގަނޑުމެންގެ ފައިސާ ދައްކާނެ އެއްވެސް ތާރީޚެއް އެމީހުންނަށް ދޭކަށް ނޭނގެ،" އޭނާ ބުންޏެވެ.
މިއާއެކު، އަނެއްކާވެސް މަހެއް ނިމި، ކުންފުނިތަކުން މުވައްޒަފުންގެ މުސާރަ ދޭންޖެހޭ ކަމަށާއި އަދި އަނެއްކާވެސް ކުއާޓަރެއް ނިމި، ސަރުކާރުން ކުންފުނިތަކަށް ފައިސާ ނުދެއްކި ހުއްޓަސް، ކުންފުނިތަކުން ސަރުކާރަށް ދައްކަންޖެހޭ ބޮޑު އަދަދެއްގެ ޓެކްސް ބިލަކާ ކުރިމަތިލާންޖެހޭކަން އޭނާ ފާހަގަ ކުރިއެވެ. އޭނާ ސިފަ ކުރި ގޮތުގައި މއިީ ސަރުކާރުން ކުދި އަދި މެދުފަންތީގެ ވިޔަފާރިތަކަށް ކުރާ އަނިޔާވެރި މަލާމާތެކެވެ.
މިފަދަ ދަ ނާޤާބިލު ސަރުކާރެއްގެ ސަބަބުން ޕްރައިވެޓް ސެކްޓަރ ނެތިދާނެ ކަމަށް އޭނާ ބުންޏެވެ.
މައުލޫމާތު ލިބިފައިވާ ގޮތުގައި މިދިޔަ ދެ އަހަރުގެ ތެރޭގައި ޕްރައިވެޓް ސެކްޓަރުގެ ގިނަ ކުދި އަދި މެދުފަންތީގެ ވިޔަފާރިތަކަށް މި ހާލަތު ވަނީ ދިމާވެފައެވެ.
އެހެން ވިޔަފާރިވެރިއަކު ބުނި ގޮތުގައި އޭނާ ދުވާލުގެ ބޮޑު ބައި ހޭދަ ކުރަނީ ބިލުތަކަށް ފައިސާ ހޯދަން ފިނޭންސް ގެ އެކި ފަންތީގެ ވެރިންނަށް ވަޓްސްއަޕް މެސެޖު ކުރުމުގައެވެ. އޭނާ ބުނާ ގޮތުގައި ކޮށްފައިވާ މަސައްކަތްތަކަށް ފައިސާ ނުދީގެން އެތައް މުވައްޒަފުންނެއް ވަކި ކޮށް ފޮނުވާލަން ވެސް ޖެހުނެވެ.
ސަރުކާރުން ފައިސާ ނުދީ ހިފަހައްޓާ މައްސަލަ ކުރިމަތިވެ ކުރިން ރަނގަޅަށް ހިނގަމުން އައި އެތައް ކުންފުންޏެއް ބަނގުރޫޓުވަމުންދާ ވާހަކަ އަކީ މިހާރު އާންމު ވާހަކަ އެކެވެ.
އާދައިގެ ކުންފުންޏެއް ހިންގާ މީހަކު ބުނީ އޭނާ އަށް ލިބެންވާ ފައިސާ ފިނޭންސުން ނުދީގެން މުވައްޒަފުންނަށް މުސާރަ ދީފައި ވާނީ އެހެން މީހެއްގެ އަތުން ދަރަންޏަށް ފައިސާ ނަގައިގެން ކަމަށެވެ.
ކުންފުނިތަކަށް ސަރުކާރުން ދޭން ޖެހޭ ފައިސާ ދިނުމުގައި އިންތިހާ އަށް ލަސްވުމުގެ މައްސަލަ ބޮޑުވެފައިވަނިކޮށް، ބުދަ ދުވަހުގެ ރޭ ޕީއެންސީގެ ހަރުގެ ޖަލްސާ ގައި ވާހަކަ ދައްކަވަމުން ރައީސް މުއިއްޒު ވިދާޅުވީ، ރާއްޖޭގެ އިގްތިސާދީ ދުވެލި ހުރީ ރަނގަޅަށް ކަމުގައެވެ. އަދި ދަރަނި ދެއްކުމުގައި އެއްވެސް ހާސް ކަމެއް ނެތް ކަމުގައެވެ.
ރައީސް މުއިއްޒުގެ ސަރުކާރުގެ ފުރަތަމަ ދެ އަހަރަށް 100 ބިލިއަނަށް ވުރެ ބޮޑު އަދަދެއް ދައުލަތުގެ ބަޖެޓުން ޚަރަދު ކުރާ އިރު، އިދިކޮޅު ފަރާތްތަކުން އަންނަނީ އެ ފައިސާ އިން ރައްޔިތަކަށް ފައިދާ އެއް ހުރި ކަމެއް ކުރާތަން ނުފެންނަ ކަމަށް ބުނެ ފާޑު ކިޔަމުންނެވެ.
