ވަޒީރުންގެ މަޖިލީހުން ބޭނުން ބަޔަކަށް މަޝްރޫއުތައް ދެވޭގޮތަށް މާލިއްޔަތު ގަވައިދަށް ބަދަލު ގެނެސްފި
މިނިސްޓްރީ އޮފް ފިނޭންސް އެންޑް ޕްލޭނިންގއިން ގެނައި އިސްލާހުގެ ދަށުން މަޝްރޫޢުތައް ސިންގަލް ސޯސް ޕްރޮކިއުމަންޓް އުސޫލުން ކުރިއަށް ގެންދެވޭނެ
ބިޑަކާއި ނުލާ އެޑްވާންސް ފައިސާވެސް ދެވޭގޮތަށް ސިންގަލް ސޯސް ޕްރޮކިއުމެންޓް އުސޫލަށް ބަދަލު ގެނެސް ކެބިނެޓުން ގޮތް ނިންމުމުގެ ބާރު ދީފި
ވަޒީރުންގެ މަޖިލީހުން ނުވަތަ ވަޒީރުންގެ މަޖިލީހުގެ ކޮމިޓީއަކުން ބޭނުން ބަޔަކަށް ބިޑަކާ ނުލައި މަޝްރޫއުތައް ދެވޭގޮތަށް މާލިއްޔަތު ގަވައިދު އިސްލާހުކޮށްފިއެވެ.
މާލިއްޔަތު ގަވާއިދުގައި އިސްލާހު ކޮށްފައިވަނީ ސިންގަލް ސޯސް ޕްރޮކިއުމެންޓްގެ އުސޫލުން ތަކެތި ގަތުން ނުވަތަ ހިދުމަތް ހޯދުމުގެ މާއްދާއެވެ. މިއީ މި ސަރުކާރުން މި މާއްދާ އިސްލާހު ކުރި 3 ވަނަ ފަހަރެވެ.
މި މާއްދާގެ (ށ) ގައި ބުނެފައި ވަނީ "ސިންގަލް ސޯސް ޕްރޮކިއުމަންޓް" ގެ އުސޫލުން ތަކެތި ނުވަތަ ޚިދުމަތް ހޯދުން ނުވަތަ މަސައްކަތެއް ކުރުވުމުގެ މަގުސަދަކީ ވާދަވެރި ބީލަމަކަށް ވަގުތުނެތް ހާލަތްތަކުގައި ނުވަތަ އޭގެ އަގުގެގޮތުން ވާދަވެރި މާޙައުލެއްގައި އެ ބީލަމަކަށް ތަރުޙީބު ލިބިދާނެ ކަމަށް ނުފެންނަ ހާލަތްތަކުގައި ހޯދަން ބޭނުންވާ އެއްޗެއް ނުވަތަ ޚިދުމަތެއް އެކަށީގެންވާ ގޮތެއްގައި ހޯދުން، ނުވަތަ ކުރުވަން ބޭނުންވާ މަސައްކަތެއް އެކަށީގެންވާ ގޮތެއްގައި ކުރުމެވެ.
ނަމަވެސް 26 ފެބްރުއަރީ ގައި އަނެއްކާވެސް ސިންގަލް ސޯސް ޕްރޮކިއުމެންޓް މާއްދާއަށް އިސްލާހު ގެނެސް (ށ) ގެ ފަހަތަށް (ށ-1) އަކުރު އިތުރުކޮށްފައިވެއެވެ.
އެ އަކުރުގައި ބުނެފައިވަނީ (ށ) ގައި އެހެން ބަޔާންކޮށްފައި އޮތް ނަމަވެސް، އާންމު ރައްޔިތުންގެ އަސާސީ ބޭނުންތަކާއި، ދިރިއުޅުމުގެ ފެންވަރު ރަނގަޅުކޮށްދޭ ބާވަތުގެ މަޝްރޫޢުތަކާއި، ސަލާމަތީ ޚިދުމަތްތަކަށް ޚާއްޞަ މަޝްރޫޢުތަކުގެ ގޮތުގައި ކަމާގުޅޭ ދައުލަތުގެ އޮފީހަކުން މިނިސްޓްރީ އަށް ހުށަހަޅައި މިނިސްޓްރީން ކަނޑައަޅާ އުސޫލެއްގެ ދަށުން، ވަޒީރުންގެ މަޖިލީހުން ނުވަތަ ވަޒީރުންގެ މަޖިލީހުގެ ކޮމިޓީއަކުން ކަނޑައަޅާ މަޝްރޫޢުތައް "ސިންގަލް ސޯސް ޕްރޮކިއުމަންޓް" ގެ އުސޫލުން ކުރިއަށް ގެންދެވިދާނެ ކަމަށެވެ.
މި މާއްދާގެ (ރ) ގެ (7) ވަނަ ނަންބަރު އިސްލާހުކޮށް އެ މާއްދާގައި މިހާރު ބުނަނީ އާންމު ރައްޔިތުންގެ އަސާސީ ބޭނުންތަކާއި، ދިރިއުޅުމުގެ ފެންވަރު ރަނގަޅުކޮށްދޭ ބާވަތުގެ މަޝްރޫޢުތަކާއި، ސަލާމަތީ ޚިދުމަތްތަކަށް ޚާއްޞަ މަޝްރޫޢުއެއްގެ ގޮތުގައި ވަޒީރުންގެ މަޖިލީހުން ނުވަތަ ވަޒީރުންގެ މަޖިލީހުގެ ކޮމިޓީއަކުން ވަކި ބަޔަކު ނުވަތަ ވަކި ފަރާތެއް ކަނޑައެޅިދާނެ ކަމަށެވެ.
މީގެ އިތުރުން 10.20 ވަނަ މާއްދާގެ (ބ) ގެ ފަހަތަށް 3 ވަނަ ނަންބަރެއްގެ ގޮތުގައި ނަންބަރު އިތުރުކޮށް (ރ) ގެ (7) ވަނަ ނަންބަރުގައި ބަޔާންކޮށްފައިވާ ހާލަތުގައި ހުއްދަ ދޭނީ، ވަޒީރުންގެ މަޖިލީހުންގެ ނުވަތަ ވަޒީރުންގެ މަޖިލީހުގެ ކޮމިޓީއަކުން ކަމަށް ބުނެފައިވެއެވެ.
މީގެ އިތުރުން "ޕަބްލިކް ސެކްޓަރ އިންވެސްޓްމަންޓް ޕްރޮގްރާމު" ގެ ތެރެއިން، ދައުލަތުގެ އޮފީހަކުން މިނިސްޓްރީއަށް ހުށަހަޅައި، މިނިސްޓްރީގެ ލަފާގެ މަތީން، ވަޒީރުންގެ މަޖިލީހުން ނުވަތަ ވަޒީރުންގެ މަޖިލީހުގެ ކޮމިޓީއަކުން ކަނޑައަޅާ ވަކި މަޝްރޫޢެއް، މި ގަވާއިދުގެ 10.22 ވަނަ މާއްދާގެ (ހ) ގެ ދަށުން ހަވާލުކުރުމަށް ނިންމައިފި ނަމަ، އެ މަޝްރޫޢަށް ބިޑު ސެކިއުރިޓީ އާއި ޕަރފޯމަންސް ގެރެންޓީ ނުވަތަ އެޑްވާންސް ޕޭމަންޓް ގެރެންޓީ ނެގުން އިސްތިސްނާ ކުރުމުގެ އިޚުތިޔާރު މިނިސްޓަރަށް ލިބެގެންވާ ކަމަށްވެސް ވަނީ ބުނެފައެވެ.
މީގެ އިތުރުން މަޝްރޫޢު ހަވާލުވާ ފަރާތުން އެޑްވާންސްގެ ގޮތުގައި ފައިސާ ދޫކޮށްދިނުމަށް އެދިއްޖެ ނަމަ، ޖުމުލަ އަގުގެ 15 އިންސައްތަ އަށްވުރެ ބޮޑުނުވާ އަދަދަކަށް ފައިސާ ދެވިދާނެ ކަމަށް ބުނެއެވެ.
ސަރުކާރު ބަދަލުވި ފަހުން މާލިއްޔަތު ގަވާއިދަށް މި ސަރުކާރުން 4 ފަހަރެއްގެ މަތިން އިސްލާހު ވަނީ ގެނެސްފައެވެ.
