ލަންކާގައި ހުކުރު ދުވަހަކީ ގޭގައި މަސައްކަތްކުރާ ދުވަސްކަމަށް ކަނޑައަޅަނީ

ސްރީލަންކާއިން ހުކުރު ދުވަހަކީ އެޤައުމުގެ ސަރުކާރު މުވައްޒަފުން ގޭގައި މަސައްކަތްކުރާ ދުވަސްކަމަށް ކަނޑައެޅުމުގެ މަސައްކަތް ފަށައިފިއެވެ.

ލަންކާގެ ޕަބްލިކް އެޑްމިނިސްޓްރޭޝަން، ހޯމް އެފެއަރސް، ޕްރޮވިޝަނަލް ކައުންސިލްސް އަދި ލޯކަލް ގަވަމެންޓް މިނިސްޓަރު، ޑިނެޝް ގުނަވަރްދަނާ ވަނީ ސަރުކާރުގެ އޮފީސްތަކުގެ މުވައްޒަފުންނަށް ހުކުރު ދުވަހަކީ ގޭގައި މަސައްކަތްކުރާ ދުވަހުގެ ގޮތުގައި ކަނޑައަޅަން މަސައްކަތް ފަށާފައިވާކަމަށް ވިދާޅުވެފައެވެ.

މިނިސްޓަރު ވަނީ މިގޮތަށް ކަނޑައެޅުމުން މުވައްޒަފުން އޮފީހަށް ހާޒިރުވެ މަސައްކަތްކުރަންޖެހޭ ދުވަސްތަކުގެ އަދަދު ހަތަރު ދުވަހަށް މަދުވެގެން ދާނެކަން ފާހަގަކުރައްވާފައެވެ.

މިނިސްޓަރު ގުނަވަރްދަނާ ވަނީ މިނިންމުން ނިންމަން ކެބިނެޓަށް ހުށަހަޅުއްވާނެ ކަމަށާއި މިކަން ކަނޑައެޅުމަށް ޕޮލިސީ ލެވެލްގެ ނިންމުމަކަށް ދާނެ ކަމަށް ވިދާޅުވެފައެވެ.

ލަންކާއަށް މިހާރު ދިމާވެފައިވާ އިގުތިސާދީ ކާރިސާގެ ސަބަބުން އެގައުމަށް ބޭނުންވާ ވަރަށް ތެޔޮ ހޯދުމަށް ވަނީ ގޮންޖެހުންތަކާ ކުރިމަތިލާން ޖެހިފައެވެ. ކަރަންޓު ފޯރުކޮށްދޭން ބޭނުންވާ ވަރަށް ގޭހާއި ތެޔޮ ލިބުމުގައި ދަތިތަކާ ކުރިމަތިލާން ޖެހޭ އިރު، އުޅަނދުތަކަށް ބޭނުންވާ ޕެޓްރޯލް ހޯދުމަށް ވެސް ވަނީ ގޮންޖެހުންތަކާ ކުރިމަތިލާން ޖެހިފައެވެ. މިއާއެކު ސަރުކާރުގެ ހަރަދު ކުޑަކުރުމަށާއި، ކަރަންޓު ބޭނުންކުރާ ވަރު މަދުކުރުމަށް ކޮންމެހެން ބޭނުން ނެތް ވަގުތުތަކުގައި ސަރުކާރުގެ މުވައްޒަފުން އޮފީހަށް ހާޒިރުކޮށް މަސައްކަތް ނުކުރުމަށް ސަރުކާރުން ދަނީ މަސައްކަތްކުރަމުންނެވެ. އަދި ޕެޓްރޯލް ލިބުމުގައި ހުރި ދަތިތަކާއެކު ދަތުރުފަތުރު ކުރަމީ ފަސޭހަ ކަމެއް ނޫންކަމުން މިކަމަށް އެހީވުމުގެ މަސައްކަތްތައް ކުރުމަށްވެސް ސަރުކާރުން ދަނީ މަސައްކަތްކުރަމުންނެވެ.

ލަންކާއަށް މިހާރު ދިމާވެފައިވާ އިގުތިސާދީ ކާރިސާއަކީ އިނގިރޭސިންގެ އަތުން އެގައުމަށް މިނިވަންކަން ލިބުނުފަހުން ކުރިމަތިވި އެންމެ ބޮޑު އިގުތިސާދީ ކާރިސާއެވެ. އެގައުމުގެ ބޮޑުވަޒީރު ރަނިލް ވިކްރަމަސިންގހަ ވަނީ ކުރިއަށް އޮތް ދުވަސްތަކަކީ ރައްޔިތުންނަށް ދަތިއުނދަގޫ ދުވަސްތަކަކަށް ވެގެންދާނެ ދުވަސްތަކެއް ކަމަށްވެސް ވިދާޅުވެފައެވެ.