އެސޯސިއޭޝަން ކަޕްގެ އަންހެން ޑިވިޝަންގެ ސެމީ ފައިނަލްގައި ކުލަބް ވެމްކޯއާއި ޕޮލިސް ކުލަބް އަދި ކުލަބް ވޮލީބޯލްއާއި ކުލަބް އީގަލްސް ކުރިމަތިލާން ޖެހިއްޖެއެވެ.

ވެމްކޯ ސެމީއަށް ދަތުރުކުރީ ކުޅުނު ހުރިހާ މެޗަކުން މޮޅުވެ ލިބުނު 12 ޕޮއިންޓާއެކު ޕޫލްގެ އެއް ވަނަ މަގާމު ހޯދައިގެންނެވެ. ކުލަބް ވޮލީބޯލް ސެމީއިން ޖާގަ ހޯދީ ކުޅުނު ހަތަރު މެޗުގެ ތެރެއިން ތިން މެޗުން މޮޅުވެ ލިބުނު ނުވަ ޕޮއިންޓާއެކުއެވެ. އެ ޓީމަށް ލިބެނީ ޕޫލްގެ ދެވަނަ މަގާމެވެ. ޕޫލް ބީގެ އެއްވަނަ މަގާމު ލިބެނީ ޕޮލިހަށެވެ. އެއީ ކުޅުނު ހުރިހާ މެޗަކުން މޮޅުވެގެން ލިބުނު 12 ޕޮއިންޓުންނެވެ. މި ޕޫލްގެ ދެވަނަ މަގާމު ލިބުނީ ކުލަބް އީގަލްސްއަށެވެ. އެއީ ތިން މެޗުން މޮޅުވެގެންނެވެ. އީގަލްސް ބަލިވީ ޕޮލިސް އަތުންނެވެ.

މުބާރާތުގެ ގްރޫޕް ސްޓޭޖުގެ ފަހު މެޗުތައް ކުޅުނީ ރޭގައެވެ. ރޭގެ ފުރަތަމަ މެޗުގައި ބައްދަލުކުރީ ވެމްކޯއާއި ކުލަބް ވޮލީބޯލްއެވެ. މިމެޗަށް ނިކުތްއިރު ވެސް މި ދެ ޓީމު ވަނީ ސެމީން ޖާގަ ހޯދާފައެވެ. ނަމަވެސް، ގްރޫޕްގެ އެއްވަނަ ހޯދުމަށް ދެ ޓީމަށް އެ މެޗު މުހިންމުވިއެވެ. މި މެޗު ފަސޭހަކަމާއެކު ސީދާ ތިން ސެޓުން ކާމިޔާބުކުރީ ވެމްކޯއެވެ. އެ ޓީމުން މެޗުގެ ސެޓުތައް ހޯދީ 9-25، 9-25 އަދި 16-25 ންނެވެ. މެޗުގެ މޮޅު ކުލުންތެރިޔަކަށް ހޮވުނީ ވެމްކޯގެ ބިދޭސީ ކުޅުންތެރިޔާ ސިޓިސަޑްއެވެ.

ރޭގެ ދެވަނަ މެޗުގައި ބައްދަލުކުރީ ޕޫލް ބީގެ ޕޮލިހާއި ވޮލީބޯލް ޔޫތު ނިއު ޖެނަރޭޝަންއެވެ. މި މެޗަށް ނިކުތްއިރު ވެސް ޕޮލިހުން ވަނީ ސެމީން ޖާގަ ހޯދާފައެވެ. މި މެޗުން ސީދާ ތިން ސެޓުން ނުވަތަ ތިން ސެޓު އެއް ސެޓުން މޮޅުވެ ސެމީން ޖާގަ ހޯދުމުގެ ފުރުސަތު ވޮލީބޯލް ޔޫތު ނިއު ޖެނަރޭޝަނަށް އޮތެވެ. ފޯރި ގަދަ އަދި ވާދަވެރި ކުޅުމެއް ފެނުނު މި މެޗުގެ ފުރަތަަމަ ސެޓު 18-25 ން ހޯދީ ޕޮލިހެވެ. ނަމަވެސް ވޮލީބޯލް ޔޫތު ނިއު ޖެނަރޭޝަނުން ވަނީ ދެ ވަނަ ސެޓުގައި ރަނގަޅު ކުޅުމެއް ދައްކައި، 18-25 ން ސެޓު ހޯދާފައެވެ. މެޗުގެ ތިން ވަނަ ސެޓާއި ހަތަރު ވަނަ ސެޓު ހޯދީ ޕޮލިހުންނެވެ. ޕޮލިހުން މި ދެ ސެޓު ހޯދީ 14-25 އަދި 6-25 ންނެވެ. މެޗުގެ މޮޅު ކުޅުންތެރިޔަކަށް ހޮވުނީ ޕޮލިހުގެ ހައްވާ ރާޝިދާއެވެ. މެޗުން ބަލިވުމާއެކު ޔޫތު ނިއު ޖެނަރޭޝަން ވަނީ މުބާރާތުން ކަޓާފައެވެ. އެއާއެކު މި ޕޫލްގެ ދެ ވަނަ ލިބުނީ ކުލަބް އީގަލްސްއަށެވެ.

މުބާރާތުގެ ސެމީ މެޗުތައް ފަށާނީ މާދަމާ ހަވީރުއެވެ. ފުރަތަމަ ސެމީގައި ބައްދަލުކުރާނީ ވެމްކޯ އާއި ޕޮލިހެވެ. މި ސެމީން މޮޅުވާ ޓީމެއް ސީދާ ފައިނަލަށް ދާނެއެވެ. ދެ ވަނަ ސެމީގައި މާދަމާ ރޭ ބައްދަލުކުރާނީ ކުލަބް ވޮލީބޯލް އާއި ކުލަބް އީގަލްސްއެވެ. ތިން ވަނަ ސެމީ އޮތީ އަންގާރަ ދުވަހުގެ ރޭއެވެ. މި ސެމީގައި ބައްދަލުކުރާނީ ފުރަތަމަ ސެމީން ބަލިވާ ޓީމަކާއި ދެ ވަނަ ސެމީން މޮޅުވާ ޓީމެކެވެ. ޖުމުލަ 12 ކުލަބަކުން ބައިވެރިވި މި މުބާރާތުގެ ފައިނަލް އޮންނާނީ ބުރާސްފަތި ދުވަހުގެ ރޭއެވެ.