ތެލުގެ ޑިއުޓީން ފަސް ޕަސެންޓް ދަށްކުރުމަށް ގާނޫނަށް އިސްލާހު ހުށަހަޅުއްވައިފި

ރާއްޖެ އެތެެރެކުރާ ތެލުން އިމްޕޯޓް ޑިއުޓީގެ ގޮތުގައި ނަގަމުންއައި 10 ޕަސެންޓްގެ ޑިއުޓީ، ފަސް ޕަސެންޓަށް ދަށްކުރުމަށް މަޖިލީހަށް ހުށަހަޅައިފި އެވެ.

ސަރުކާރުގެ ފަރާތުން ސަރުކާރު ކޯލިޝަންގެ ޕާލިމެންޓްރީ ގްރޫޕްގެ ލީޑަރު އަހުމަދު ނިހާނު ހުސައިން މަނިކު، ދިވެހިރާއްޖޭގެ އެކްސްޕޯޓް އިމްޕޯޓްގެ ގާނޫނަށް އިސްލާހު ހުށަހަޅުއްވާފައިވަނީ އެ ގާނޫނުގެ 7 ވަނަ މާއްދާގެ (ހ)ގައި ބަޔާންކޮށްފައިވާ ޗެޕްޓަރުތަކުގެ ތެރެއިން ޗެޕްޓަރު 27 އަށެވެ.

އެ އިސްލާހުގައި ވަނީ ބިމުން ނަގާ ހަކަތައިގެ ބާވާތްތަކާއި، ބިމުން ނަގާ ތެލާއި، އަދި އެފަދަ އެއްޗެހި ސާފުކޮށްގެން ތައްޔާރުކޮށްފައި ހުންނަ ބާވާތްތައް، އަދި ތާރުގެ ބާވަތްތަކާއި، ބިމުންނަގާ ތަކެތިން އުފައްދާ އުށެވެ.

އެމާއްދާގެ ދަށުން މިހާރު ތެލުގެ ބާވާތްތަކުން ޑިއުޓީގެ ގޮތުގައި ނަގަމުން އަންނަ 10 ޕަސެންޓްގެ ބަދަލުގައި ޑިއުޓީގެ ގޮތުގައި ފަސް ޕަސެންޓް ނެގުމަށް އެބިލްގައި ވެއެވެ.

މީގެއިތުރުން ބިލްގައިވާ ގޮތުން އެ ޗެޕްޓަރުގައި ހިމެނޭ ބާވަތްތަކުގެ ތެރެއިން ތެލުގެ ބާވަތްތައް ފިޔަވާ، މި ޗެޕްޓަރުގައި ހިމެނޭ އެހެނިހެން ތަކެތިން ޑިއުޓީން ސުން ޕަސެންޓް ނެގުމަށް ވެސް އެއިސްލާހުގައި ވެއެވެ.

އެބިލްގައިވާ ގޮތުން، މި އިސްލާހު ހުށަހަޅާފައިވަނީ އާއްމު ބޭނުންތަކާއި އަސާސީ ހިދްމަތްތައް ރައްޔިތުން ބޭނުންކުރުމުގައި ހިނގާ ޚަރަދު ކުޑަކޮށްދީ، ރައްޔިތުންނަށް ލުއިފަސޭހަ ގޮތްތަކެއް ހަމަޖައްސައި ދިނުމަށްޓަކައި ތެލުގެ ބާވާތްތަކުން މިހާރު ނަގަމުންދާ ޑިއުޓީގެ މިންވަރުގެ ދެބައިކުޅައެއްބައި ކުޑަކޮށްދިނުމަށްޓަކައި ހުށަހަޅާފައިވާ އިސްލާހެއް ކަމަށެވެ.

ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާއަށް އެބިލް އެޖެންޑާކޮށްފައިވާއިރު، އެޖެންޑާ ކޮށްފައިވަނީ އެބިލްގެ ފުރަތަމަ ކިޔުން އިއްވުމަށްފަހު، އެ ބިލުގެ އިބްތިދާއީ ބަހުސް ފެށުމަށްޓަކައި، މަޖިލީހުގެ ގަވާއިދުގެ 75 ވަނަ މާއްދާގެ (ނ) ގައިވާ ގޮތުގެމަތިން ވޯޓަށް އަހާ، އެބިލަށް ބަހުސް ކުރުމަށް ފާސްވެއްޖެ ނަމަ، ބަހުސްކުރުގާ ގޮތަށެވެ.