ޗައިނާއިން ލަންކާއަށް 28 މިލިއަން ޑޮލަރުގެ ބޭހާ ސިއްހީ ސާމާނު
4 ޖޫން 2022 | ހޮނިހިރު 14:23މިއީ ޗައިނާ ސަރުކާރާ އެގައުމުގެ ޖަމިއްޔާ ތަކުން ގުޅިގެން ލަންކާއަށް ފޯރުކޮށްދިން އެހީ
ޗައިނާއިން ލަންކާއަށް ބޭސް ހަދިޔާކުރުން
ޗައިނާއިން ސްރީލަންކާއަށް 28 މިލިއަން ޑޮލަރުގެ ބޭހާ ސިއްހީ ސާމާނު ފޮނުވައިފިއެވެ.
މިއީ ލަންކާއިން މިހާރު ކުރިމަތިލަމުންދާ އިގުތިސާދީ ކާރިސާއާ ގުޅިގެން އެގައުމަށް އެހީވުމަށް ޗައިނާއިން ފޯރުކޮށްދިން އެހީއެކެވެ.
ލަންކާގެ މީޑިއާތަކުން ރިޕޯޓުކޮށްފައިވާ ގޮތުން 28 މިލިއަން އެމެރިކާ ޑޮލަރުގެ ބޭހާ ސިއްހީ ސާމާނު ޗައިނާއިން ވަނީ ހުކުރު ދުވަހު ލަންކާއަށް ފޯރުކޯށްދީފައެވެ. ޗައިނާއިން ފޯރުކޮށްދިން ބޭހުގެ ތެރޭގައި ލަންކާއަށް ކޮންމެހެން މިހާރު ބޭނުންވެފައިވާ 14 ޒަރޫރީ ބޭހެއް ހިމެނޭކަމަށް ރިޕޯޓުތައް ބުނެއެވެ.
ޗައިނާގެ މިއެހީ އާއެކު އެގައުމުގެ ފްލައިޓް ހުކުރު ދުވަހުގެ ރޭގެ ވަގުތެއްގައި ލަންކާއަށް ޖައްސާފައިވާއިރު، އެވަގުތު ލަންކާގެ ހެލްތު މިނިސްޓަރު ކެހެލިޔާ ރަމްބުކްވެއްލާ އާއި ޗައިނާއިން ލަންކާއަށް ކަނޑައަޅުއްވާފައި ހުންނަވާ ސަފީރު ޗީ ޝެންހޮންގގެ އިތުރުން ލަންކާގެ ހެލްތު ސަރވިސް ޑިރެކްޓަރ ޖެނެރަލް ޑރ. އަސޭލާ ގުނަރަޓްނަ އާއި ސަރުކާރުގެ އިސްފަރާތްތަކުން ވަނީ އެހީއާ ހަވާލުވުމަށް އެއަރޕޯޓަށް ވަޑައިގަންނަވާފައެވެ.
މިއެހީއާ ގުޅޭގޮތުން ޗައިނާގެ ސަފީރު ޗީ ޝެންހޮންގ ވަނީ މިއީ ޗައިނާ ސަރުކާރާ އެގައުމުގެ ޖަމިއްޔާ ތަކުން ގުޅިގެން ލަންކާއަށް ފޯރުކޮށްދިން އެހީއެއް ކަން ފާހަގަކުރައްވާފައެވެ.
ލަންކާއަށް ދިމާވެފައިވާ އިގުތިސާދީ ކާރިސާގެ ސަބަބުން އެގައުމަށް ބޭނުންވާ ސިއްހީ ސާމާނާއި ބޭސް ގަތުމަށް ބޭނުންވާ ފައިސާވެސް އެގައުމުގެ ސަރުކާރުގައި މިވަގުތު ނެތެވެ. ސަރުކާރުގެ ފާމަސޫޓިކަލް ކުންފުނިން ގަނެފައިވާ ބޭސްތަކަށް ފައިސާ ނުދެއްކި ހަތަރު މަސް ދުވަސްވެ ބޭރުގެ ކުންފުނިތަކުން އެކުންފުނި ބްލެކްލިސްޓް ކުރަމުންދާކަމަށް ލަންކާގެ ބޮޑުވަޒީރު ރަނިލް ވިކްރަމަސިންގހަ ވަނީ ވިދާޅުވެފައެވެ.
ލަންކާއަށް ދިމާވެފައިވާ ގޮންޖެހުންތަކާ ގުޅިގެން އެކުވެރި ގައުމުތަކުން އެގައުމަށް އެހީ ފޯރުކޮށްދެމުންދާއިރު، ދާދިފަހުން އިންޑިއާ އަދި ފްރާންސުން ވެސް ވަނީ އެގައުމަށް ބޭސް ފޯރުކޮށްދީފައެވެ. އެގޮތުން މިދިޔަ ހަފުތާގެ ތެރޭގައި އިންޑިއާއިން ވަނީ ލަންކާއަށް 24 މެޓްރިކްޓަނުގެ ބޭސް ފޯރުކޮށްދީފައެވެ.
ފްރާންސުން ލަންކާއަށް ހަދިޔާ ކޮށްފައިވަނީ އެނެސްތެޓިކްސް(ނުވަތަ ހޭނެއްތުމާ އައްސި ކުރުމާބެހޭ) އަދި ރެސްޕިރޭޓަރީ(ނުވަތަ ނޭވާލާ ނިޒާމުގެ އެކި ބަލިތަކުގެ) ބޭސްތަކެކެވެ. ފްރާންސުން ހަދިޔާކުރި ބޭހުގެ އަގު 300،000 ޔޫރޯއަށް އަރާކަމަށްވެއެވެ.
