ވިކްޓްރީ ސްޕޯޓްސް ކުލަބުގެ ކޯޗިން ޓީމަށް އެ ޓީމުގެ ދެ ލެޖެންޑުން ކަމަށްވާ އިސްމާއިލް ޝަރީފް އާއި އިސްމާއިލް އަނިލް ހަމަޖައްސައިފިއެވެ.
މިއަދު މެންދުރު ސޯލްޓް ކެފޭގައި އޮތް ނޫސްވެރިންގެ ބައްދަލުވުމެއްގައި ޝަރީފް އާއި އަނިލް ހަމަޖެއްސީ އެ ޓީމުގެ އެސިސްޓެންޓް ކޯޗުކަމުގެ މަގާމަށެވެ. އަދި އެ ޓީމުގެ ކޯޗު ޕަކީރު އަލީއާ މިއަދު ވަނީ ރަސްމީކޮށް ޓީމު ހަވާލުކޮށްފައެވެ. އެ ޓީމުގެ މެނޭޖަރެއްގެ ގޮތުގައި ހަމަޖެއްސީ މުހައްމަދު އާދަމްއެވެ. މީގެ އިތުރުން ގޯލްކީޕަރު ޓްރެއިނަރެއްގެ ގޮތުގައި ލަންކާގެ ގައުމީ ޓީމުގެ ކުރީގެ ގޯލް ކީޕަރު ޓްރެއިނަރު ވަނީ ހަމަޖައްސާފައެވެ. ބިދޭސީ ކޯޗާއެކު ވިކްޓްރީގެ ފަރިތަކުރުންތައް މާދަމާ ފަށާނެއެވެ.
ދަރަނިތަކުގެ މައްސަލައިގައި އެފްއޭއެމުން އޮތީ ވިކްޓްރީ ސަސްޕެންޑުކޮށްފައެވެ. ވިކްޓްރީއަށް ކުޅެފައިވާ ދިވެހި ކުޅުންތެރިންނާއި ބިދޭސީ ކުޅުންތެރިންނަށް ދޭންޖެހޭ މުސާރަ ދިނުމަށްޓަކައި އެފައިސާ އެފްއޭއެމްއާ މިދިޔަ މަހުގެ ތެރޭގައި ވަނީ ހަވާލުކޮށްފައެވެ. އަދި އެ ފައިސާ މިހާރު ކުޅުންތެރިންނަށް ދެމުންދާކަމަށް ވިކްޓްރީއިން މިއަދު ބުންޏެވެ.
ދަރަނިތައް ހަމަޖެއްސުމުގެ އިތުރުން، ކުރިއަށް އޮތް ދެވަނަ ޑިވިޝަނުގެ މުބާރާތުގައި ބައިވެރިވުމަށް ވިކްޓްރީން ވަނީ ވާދަވެރި ޓީމެއް އެކުލަވާލާފައެވެ. އެ ޓީމަށް ގެނައުމަށް ހަމަޖެހުނު ބިދޭސީ ހަތަރު ކުޅުންތެރިން ވެސް މިހާރު ވަނީ ޓީމާ ގުޅިފައެވެ. އެ ޓީމަށް ގެނައި ބިދޭސީ ކުޅުންތެރިންނަކީ މިޑްފީލްޑަރު މުހައްމަދު އޮސާމާ ސަބާ، ޑިފެންޑަރު މުހައްމަދު އެލްބާލީ، ސްޓްރައިކަރ މަހްމޫދް މުހައްމަދު އަދި ގޯލް ކީޕަރު އަހުމަދު ސަޔެދް ބަދަވީއެވެ.
