ވިނަރެސް ފްލެޓްތަކުގެ މައުލޫމާތު ސެޝަންތަކާއި މޮކްއަޕް އެޕާޓްމަންޓް ދެއްކުމަށް އާންމުންނަށް ހުޅުވާލައިފި
ވިނަރެސް ފްލެޓުތަކުގެ މަސައްކަތް ނިންމައި، އަންނަ ޖުލައި މަހުގެ ތެރޭގައި އެޗްޑީސީއާ ހަވާލުކުރާނެ
ހުޅުމާލެ ދެވަނަ ފިޔަވަހީގައި އަޅަމުންގެންދާ ވިނަރެސް އެޕާރޓްމެންޓްތައް
ހުޅުމާލެ ދެވަނަ ފިޔަވަހީގައި ތަރައްގީކުރަމުން އަންނަ ވިނަރެސް ފްލެޓް ހައުސިންގ މަޝްރޫއުގެ މަޢުލޫމާތު ސެޝަންތަކާއި މޮކްއަޕް އެޕާޓްމަންޓް ދެއްކުމަށް އާންމުކޮށް ހުޅުވާލައިފިއެވެ.
ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން ކޮށްފައިވާ އިއުލާނެއްގައި ބުނެފައިވަނީ، އެކަމަށް ޝައުގުވެރިވާ ފަރާތްތަކުން ރަޖިސްޓްރީކުރުމަށް އެދޭކަމަށެވެ. އެގޮތުން މައުލޫމާތު ސެޝަންތަކުގައި ބައިވެރިވުމަށާއި މޮކްއަޕް އެޕާޓްމަންޓް ބަލާލުމަށް ވަކިން ރަޖިސްޓްރީކުރެވޭނެ އިންތިޒާމު އެޗްޑީސީން ވަނީ ހަމަޖައްސާފައެވެ.
ވިނަރެސް ފްލެޓުތަކުގެ މަސައްކަތް ނިންމައި، އަންނަ ޖުލައި މަހުގެ ތެރޭގައި އެޗްޑީސީއާ ހަވާލުކުރާނެކަމަށް މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވަނީ މިދިޔަ މަހު ރައްޔިތުންގެ މަޖިލީހުގައި ވިދާޅުވެފައެވެ. މިނިސްޓަރު ވިދާޅުވީ ހުޅުމާލޭގައި އެންމެ އަވަހަށް މީހުން ވަންނާނީ މިހާރު މަސައްކަތް ނިމެމުން އަންނަ ވިނަރެސް ފްލެޓްތަކަށް ކަމަށާއި، ޖުލައި މަހުގެ ތެރޭގައި ކޮންޓްރެކްޓަރު އެތަން އެޗްޑީސީއާ ހަވާލުކުރާނެކަމަށެވެ.
މީގެއިތުރުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން އެޗްޑީސީގެ މެނޭޖިންގ ޑިރެކްޓަރު ސުހައިލް އަހުމަދު ވިދާޅުވީ، ފްލެޓް ބޭނުންވާ ފަރާތްތަކަށް ޕޯޓަލް މެދުވެރިކޮށް އެމީހަކު ބޭނުންވާ ފްލެޓަކަށް އެދުމުގެ ފުރުސަތު ލިބޭނެކަމަށެވެ. އަދި އެމީހަކު ބޭނުންވާ ފްލެޓް އެހެން މީހަކު ނަގާފައިވާނަމަ ވެއިޓް ލިސްޓުވެސް ކުރެވޭނެކަމަށް ސުހައިލް ވިދާޅުވިއެވެ. އެގޮތުން ކޮންމެ މީހަކަށްވެސް މަދުވެގެން އެމީހަކު ބޭނުންވާ 5 ފްލެޓެއް އިޚްތިޔާރުކުރުމުގެ ފުރުސަތު ލިބޭނެކަމަށް ސުހައިލު ވިދާޅުވިއެވެ. ފްލެޓަށް އެދޭއިރު، އެމީހަކު އެންމެ ބޭނުންވާ ފްލެޓް އެހެން މީހަކު ނުނަގާ ހުރިނަމަ އެމީހަކަށް އެފްލެޓް ލިބޭނެކަމަށް ސުހައިލު ވިދާޅުވިއެވެ. ސުހައިލު ވިދާޅުވީ ޕޯޓަލް ހުޅުވާލުމުގެ ކުރިން ޕޯޓަލްއަށް ބޭނުންވާ މައުލޫމާތުތައް ހާމަކުރާނެކަމަށެވެ.
ސުހައިލު ވިދާޅުވީ ފްލެޓްތަކުގެ އަގުތައް ކަނޑައަޅާފައިވަނީ ތިރީ ފްލޯރތަކަށް އަގު ކުޑަކޮށް، މަތީ ފްލޯރތަކުގެ ފްލެޓްތަކުގެ އަގު ބޮޑުވާގޮތަށްކަމަށެވެ. މީގެއިތުރުން ފްލެޓް ހުރި ގޮތުން ވިއުއަށް ބަލައިގެންވެސް އަގުތައް ކަނޑައަޅާފައިވާނެކަމަށެވެ. އެހެންކަމުން ސީދާ މިވެނި ފްލެޓެއްގެ އަގު އުޅޭނީ މިވެނި އަގަކަށޭ ވިދާޅުވާން ދަތިކަމަށެވެ.
ވިނަރެސް މަޝްރޫއުގެ ދަށުން ތައްޔާރުކުރާ 1،344 ފްލެޓް ހުންނާނީ 10 ޓަވަރަށް ބަހާލާފައެވެ. އަދި ކޮންމެ ޓަވަރެއްގައި 13 ފަންގިފިލާ ހުންނައިރު، ކޮންމެ އެޕާޓްމެންޓެއްގައި 3 ކޮޓަރިއާއި 3 ފާޚާނާގެ އިތުރުން ބެލްކަންޏެއް ހުންނާނެއެވެ. ވިނަރެސް ފްލެޓުތަކުގެ ޖާގަ ބޮޑުވެފައި، އޭގެ އަގު ހިޔާ ފްލެޓުތަކަށް ވުރެ ބޮޑުވާނެ ކަމަށް ހައުސިންގ މިނިސްޓްރީން ވަނީ މީގެ ކުރިން ބުނެފައެވެ.
ވިނަރެސް އެޕާޓްމެންޓްތަކުގައި ހަތަރު ބާވަތެއްގެ އެޕާޓްމެންޓު ހުންނާނެއެވެ. އެއީ މެރީނާ ވިއު، އިނަރ ވިއު، އައުޓަރ ވިއު އަދި ސްޓޭންޑާރޑް ވިއު އެޕާޓްމެންޓުތަކެވެ. އޭގެ ތެރެއިން ސްޓޭންޑާރޑް ވިއު އެޕާޓްމެންޓުގައި ހުންނާނީ 883 އަކަފޫޓެވެ. ނަމަވެސް ބާކީ ތިން ބާވަތުގެ އެޕާޓްމެންޓުގައި 902 އަކަފޫޓު ހުންނާނެއެވެ.
