އުތުރު ކޮރިއާގައި ކޮވިޑް-19ގެ ހާލަތު ރަނގަޅުވަމުން ނުދާކަމަށާއި, އެގައުމުގައި ބަލީގެ ހާލަތު ދަނީ ގޯސްވަމުންކަމަށް ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ)އިން ބުނެފިއެވެ.
ޑަބްލިއުއެޗްއޯއިން ވަނީ އުތުރު ކޮރިއާގެ ހާލަތު ރަނގަޅަށް ދެނެގަންނާނެ ފުރުސަތު ނެތި އެގައުމުގެ ކޭސްތަކުގެ އަދަދު ދެނެނުގަނެވޭތީ އެކަމުގެ ކަންބޮޑުވުން ފާޅުކޮށްފައެވެ.
ދުނިޔޭގެ ސިއްހަތު ޖަމްއިއްޔާއިން މިގޮތަށް ކަންބޮޑުވުން ފާޅުކޮށްފައި މިވަނީ އެގައުމުގައި ކޮވިޑް-19ގެ ހާލަތު ރަނގަޅުވަމުންދާކަމަށް އުތުރު ކޮރިއާގެ ސަރުކާރުން ބުނެފައިވަނިކޮށެވެ. ދެ ހަފުތާގެ ތެރޭގައި ދެކުނު ކޮރިއާގައި 390،000ށް ވުރެގިނަ ކޮވިޑް ކޭސް ރިޕޯޓުކޮށްފައިވާއިރު، މިހާރެ ކޭސްތަކުގެ އަދަދު ދަށަށް ދާން ފަށާފައިވާކަމަށް އެގައުމުން ބުނެއެވެ.
އުތުރު ކޮރިއާއިން ބައްޔަށް ޓެސްޓުކޮށްފައި ވަނީ ސީދާ ކިހާ އަދަދެއްގެ މީހުންކަމެއް އެގައުމުން ހާމަކޮށްފައެއް ނުވެއެވެ. ގިނަ އަދަދެއްގެ ބަޔަކު ބައްޔަށް ޕޮޒިޓިވްވެފައިވާއިރު، އެގައުމުގެ ސަރުކާރުން މިހާރު ހާމަކޮށްފައިވާ މަދު މައުލުމާތުތަކާއެކު ގައުމުގެ ހަގީގީ ހާލަތު ދެނެގަންނަށް އުނދަގޫކަން މާހިރުން ފާހަގަކުރެއެވެ. އެގޮތުން ޑަބްލިއުއެޗްއޯގެ އެމެޖީސް ޗީފް، މައިކަލް ރިޔަން ވަނީ، އެގައުމުގެ ހާލަތު ރަނގަޅުވަމުން ނުދާކަމަށާއި ގައުމުގެ ހާލަތު ދަނީ ގޯސްވަމުން ކަމަށް އެޖަމްއިއްޔާއަށް ގަބޫލުކުރެވޭކަމަށް ވިދާޅުވެފައެވެ.
އޭނާ ވަނީ ސަރުކާރުން ހާމަކޮށްފައިވާ ނަންބަރުތައް ނޫން އެހެން އެއްވެސް މައުލޫމާތެއް އެޖަމްއިއްޔާއަށްވެސް ނުލިބޭކަން ފާހަގަކުރައްވާފައެވެ. އެކި ފަހަރު މަތިން އެހީ ފޯރުކޮށްދިނުމަށް ޑަބްލިއުއެޗްއޯއިން ހުށަހެޅިނަމަވެސް އެކަމަށް އުތުރު ކޮރިއާއިން އެއްބަސްވެފައެއްނުވެއެވެ.
ބުރާސްފަތި ދުވަހު އުތުރު ކޮރިއާއިން ވަނީ އެގައުމުން އިތުރު 96،610 ކޮވިޑް ކޭސް ފެނިފައިވާކަމަށް ރިޕޯޓުކޮށްފައެވެ. އެހެން ނަަމަވެސް ބަލީގައި އިތުރު މީހަކު މަރުވެފައިވާކަމެއް ހާމައެއްނުކުރެއެވެ.
މިއަހަރުގެ ތެރޭގައި ގައުމުގެ ބޯޑަރު ހުޅުވާލިނަމަވެސް ޗައިނާގައި ކޮވިޑް-19ގެ ހާލަތު ގޯސްވެ, އެގައުމުން ހަރުކަށި ފިޔަވަޅުތަކެއް އަޅަން ފެށުމާއެކު އުތުރު ކޮރިއާއިން ވަނީ އަނެއްކާވެސް އެގައުމުގެ ބޯޑަރު ބަންދުކޮށްފައެވެ. އަދި އެގައުމުން ކޮވިޑްގެ ކޭސްތައް ފެންނަން ފެށުމާއެކު މުޅި ގައުމު ވަނީ ލޮކްޑައުންކޮށްފައެވެ.
