ވަކި ސަރަހައްދުތަކުން އެކަނި ފެންނަ ބަލިތައް އާންމުވަމުންދާތީ ޑަބްލިޔުއެޗްއޯއިން ކަންބޮޑުވުން ފާޅުކޮށްފި
2 ޖޫން 2022 | ބުރާސްފަތި 02:19މޫސުމަށް އަންނަ ބަދަލުތަކާއި ގުޅިގެން އިންސާނުންނާއި ޖަނަވާރުން ކެއުމުގައި ގެންގުޅޭ އުސޫލުތަކަށް ބަދަލުތަކަށް ގެންނަމުންދޭ
ދުނިޔޭގެ ސިއްހަތު ޖަމިއްޔާ
ވަކި ސަރަހައްދުތަކުން އެކަނި ފެންނަ ބަލިތައް ކަމުގައިވާ މަންކީޕޮކްސް އާއި އެކިއެކި ޖަނަވާރުން އިންސާނުންގެ ގަޔަށް އަރާ ބަލިތައް ގިނަވެ އަވަސް އަވަހަށް އާންމުވަމުންދާތީ އެކަމުގެ ކަންބޮޑުވުން ދުނިޔޭގެ ސިއްހަތު ޖަމިއްޔާ(ޑަބްލިޔުއެޗްއޯ)ން ފާޅުކޮށްފިއެވެ.
އެޖަމިއްޔާގެ އެމަރޖެންސީ ކަންކަމާބެހޭ ޑިރެކްޓަރ މައިކް ރިޔާން ވަނީ ވަކި ސަރަހައްދުތަކުން އެކަނި ފެންނަ ބަލިތައް އާންމުވަމުންދާކަމުގެ އިންޒާރު ދެއްވާފައެވެ.
މައިކް ވިދާޅުވީ މޫސުމަށް އަންނަ ބަދަލުތަކާއި ގުޅިގެން އިންސާނުންނާއި ޖަނަވާރުން ކެއުމުގައި ގެންގުޅޭ އުސޫލުތަކަށް ބަދަލުތަކަށް ގެންނަމުންދާކަމަށެވެ. އެކަމުގެ ސަބަބުން އާންމު ގޮތެއްގައި ޖަނަވާރުންގެ ތެރޭގައި ފެތުރޭ ބަލިތައް އިންސާނުންނާ ހަމައަށް އައުން ގިނަވަމުން އަންނަކަމަށެވެ.
އެހެންކަމުން ބަލިތައް ފެންނަ މިންވަރާއި ބަލިތައް ފެތުރޭ މިންވަރު އިތުރުވަމުން އަންނަކަމަށް މައިކް ވިދާޅުވިއެވެ.
މިހާރު ޔޫރަޕު ސަރަހައްދުގައި ފެތުރެމުން އަންނަ މަންކީ ޕޮކްސް އަކީ މީގެކުރިން އެފްރިކާ ސަރަހައްދުން އެކަނި ފެނިފައިވާ ބައްޔެކެވެ. މިއީ އެފްރިކާއިން ބޭރުން މިހާ ގިނަ އަދަދަކަށް މަންކީޕޮކްސްގެ ކޭސްތައް ފެންނަ ފުރަތަމަ ފަހަރެވެ. އިނގިރޭސިވިލާތުން ވަނީ މަންކީޕޮކްސް އެގައުމުގައި ކޮމިޔުނިޓީ ސްޕްރެޑަކަށް ބަދަލުވެފައިވާކަން އިއުލާންކޮށްފައެވެ.
