ކޮވިޑް މެނޭޖުކުރުމުގައި ސަރުކާރުން ކުރި މަސައްކަތަށް ޑަބްލިއުއެޗްއޯގެ ތައުރީފު
ޑަބްލިއުއެޗްއޯގެ މަންދޫބު ވަނީ ރައީސްގެ އަރިހަށް އިހުތިރާމުގެ ޒިޔާރަތެއް ކުރައްވާފައި
ރައީސުލްޖުމްހޫރިއްޔާ އިބްރާހިމް މުޙައްމަދު ސާލިިހު
ކޮވިޑް-19 އިން އަރައިގަތުމަށް ސަރުކާރުން ކުރި މަސައްކަތަށް ޑަބްލިއުއެޗްއޯއިން ރާއްޖެއަަށް ކަނޑައަޅާފައި ހުންނަވާ މަންދޫބު ޑރ. ނާޒްނީން އަންވަރު ތައުރީފު ކުރައްވައިފިއެވެ.
އެކަމަނާ ސަރުކާރުން ކުރެއްވި މަސައްކަތަށް ތައުރީފު ކުރެއްވީ އަންގާރަ ދުވަހު ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހުގެ އަރިހަށް ކުރެއްވި އިހުތިރާމުގެ ޒިޔާރަތުގައެވެ. މި ބައްދަލުކުރެއްވުން ބައްވާފައިވަނީ ވަނީ ރައީސް އޮފީހުގައެވެ.
މި ބައްދަލުކުރެއްވުމުގައި ނާޒްނީން ވަނީ ކޮވިޑް މެނޭޖްކުރުމުގައި ސަރުކާރުން އެޅި ވިސްނުންތެރި ފިޔަވަޅުތަކާއި، ރާއްޖޭގެ އާބާދީގެ 70 އިންސައްތަ ވެކްސިނޭޓްކުރުމަށް ގެންގުޅުނު ސިޔާސަތުތަކުގެ ސަބަބުން މި ސަރަޙައްދުގެ އެހެން ބައެއް ޤައުމުތަކަށްވުރެ ކުރިން ކޮވިޑް ކޮންޓްރޯލްކުރެވުނު ކަން ފާހަގަކުރައްވައިފައެވެ.
އެ ކަމަނާ ވަނީ މި ސަރަޙައްދުގައި ރަނގަޅު ފެންވަރުގެ ތަޖުރިބާކާރު ސައިކޭޓްރިސްޓުން މަދުކަން ހާމަކުރައްވައި، ޑަބްލިއުއެޗްއޯއިން އިސްނަގައިގެން މެންޓަލް ހެލްތު އެކްޝަން ޕްރޮގްރާމްގެ ތެރެއިން އެކަމަށް ހައްލު ހޯދުމަށް މަސައްކަތްކުރައްވަމުން ގެންދަވާކަމުގައި ވިދާޅުވެފައެވެ. އަދި އެ ޖަމިއްޔާއިން އެޑިއުކޭޝަން މިނިސްޓްރީއާއެކު ސްކޫލް ކުދިންގެ މެދުގައި ނަފްސާނީ ބަލިމަޑުކަމާ ގުޅޭގޮތުން ހޭލުންތެރިކުރުމުގެ ޕައިލެޓް ޕްރޮގްރާމެއް ކުރަމުންދާކަން ވެސް އެކަމަނާ ފާހަގަކުރެއްވިއެވެ.
މި ބައްދަލުކުރެއްވުމުގައި ރައީސް ވަނީ ރާއްޖޭގައި ތިބި ނާޒުކު ގިންތިތަކުގެ މީހުންނަށް އަދި މަސްތުވާތަކެތީގެ ވަބާގައި ޖެހިފައިވާ މީހުންނަށް ބޭނުންވާ އެހީތެރިކަން ދިނުމުގައި ޑަބްލިއުއެޗްއޯއިން ދެއްވާ ސަމާލުކަން ފާހަގަކުރައްވައި ޝުކުރު އަދާކުރައްވާފައެވެ. އަދި ނަފްސާނީ އެހީތެރިކަންދިނުމުގެ ދާއިރާއަކީ މިހާރު ރާއްޖެއަށް އެހީތެރިކަން ބޭނުންވާ ދާއިރާއެއްކަން ވެސް އެމަނިކުފާނު ފާހަގަކުރެއްވިއެވެ.
މީގެ އިތުރުން ޑަބްލިއުއެޗްއޯއަކީ ރާއްޖެއަށް މުހިންމު ބައިވެރިއެއްކަން ވެސް ރައީސް ވިދާޅުވިއެވެ.
