އުރީދޫ މޯލްޑިވްސް އެމް-ފައިސާ މެދުވެރިކޮށް އިންޓަރނޭޝަނަލް މަނީ ޓްރާންސްފަރ ޚިދުމަތުގެ ޓްރަޔަލް ރަސްމީކޮށް ފަށައިފިއެވެ.

އަންގާރަ ދުވަހު އުރީދޫއިން ބޭއްވި ޕްރެސް ކޮންފަރެންސްގައި މިކަން އިއުލާނުކޮށްފައިވާއިރު، އިންޓަރނޭޝަނަލް މަނީ ޓްރާންސްފަރ ޚިދުމަތް ފޯރުކޮށްދިނުމަށް ބޭނުންވާ ލައިސަންސް، މޯލްޑިވްސް މަނިޓަރީ އޮތޯރިޓީން ގައުމީ ޕޭމަންޓް ސިސްޓަމްގެ ގާނޫނުގެ ދަށުން މި އަހަރު ކުރީކޮޅު އެ ކުންފުންޏަށް ވަނީ ދީފައެވެ.

މި ލައިސަންސް ދޫކުރެވުނު ދުވަހުން ފެށިގެން އުރީދޫ މޯލްޑިވްސްގެ ސިސްޓަމްތައް ބައިނަލްއަގުވާމީ ޕާޓްނަރުންނާ އިންޓަރގްރޭޓްކޮށް، މި ސިސްޓަމްގެ ތަފާތު ޓެސްޓުތައް ކުރުމުގެ މަސައްކަތް ކުރަމުންދާކަމަށް އުރީދޫއިން ވަނީ ބުނެފައެވެ. މި ޚިދުމަތް ރަސްމީކޮށް އިފްތިތާހުކުރެވުމުން، އެމް-ފައިސާ ކަސްޓަމަރުންނަށް ފަސޭހަކަމާއެކު ބައިނަލްއަގުވާމީ މަނީ ޓްރާންސްފަރގެ ޚިދުމަތް ފޯރުކޮށްދެވުމަކީ މޮބައިލް މަނީ ދާއިރާއިން ހާސިލުކުރެވޭ މުހިންމު ލަނޑުދަނޑިއަކަށް ވާނެކަމަށް އުރީދޫއިން ބުނެއެވެ.

ކުރިއަށް އޮތް މަސްތަކުގައި މި ޚިދުމަތް ރަސްމީކޮށް ތައާރަފްވުމުން، އެމް-ފައިސާ ކަސްޓަމަރުންނަށް، ދުނިޔޭގެ އެކި ކަންކޮޅުތަކުގައި ތިބި އާއިލާއާއި ރައްޓެހިންނަށް ކޮންމެ ތަނަކުން، އަދި ކޮންމެ ވަގުތެއްގައިވެސް ފަސޭހަކަމާއެކު ފައިސާ ފޮނުވާލެވޭނެއެވެ. އެމް-ފައިސާ ވޮލެޓުން ރާއްޖެއިން ބޭރަށް ފައިސާ ފޮނުވޭނީ ދިވެހި ރުފިޔާއިންނެވެ. އަދި ފައިސާ ލިބޭ ފަރާތަށް ފައިސާ ލިބޭނީ އެމީހެއްގެ އެކައުންޓަށް ނުވަތަ ޑިޖިޓަލް ވޮލެޓްތަކަށް ޑޮލަރު ނުވަތަ އެ ގައުމެއްގެ ފައިސާއިންނެވެ.

މި ޚިދުމަތުގެ ޓްރަޔަލް ފެށުމާގުޅިގެން އުރީދޫ މޯލްޑިވްސްގެ ޗީފް ކޮމާޝަލް އޮފިސަރ ހުސައިން ނިޔާޒް ވިދާޅުވީ، ޑިޖިޓަލް ރާއްޖެއެއް ބިނާކުރުމަށް އުރީދޫއިން ކުރާ ދަތުރުގައި މިއަދު މުހިންމު ކަމެއް ހާސިލްކުރުމަށް ބޮޑު ފިޔަވަޅެއް ނެގުނީކަމަށެވެ. އެ ކުންފުނީގެ އަމާޒަކީ ޑިޖިޓަލް ޚިދުމަތްތައް މެދުވެރިކޮށް ކަސްޓަމަރުންގެ މުއާމަލާތްތަކާއި ފުރުސަތުތައް ފަހިކޮށްދިނުން ކަމަށާއި، އެމް-ފައިސާ މެދުވެރިކޮށް އިންޓަނޭޝަނަލް މަނީ ޓްރާންސްފަރ ރަސްމީކޮށް އިފްތިތާހު ކުރުމާއެކު، ފަސޭހަކަމާއެކު ރާއްޖޭގެ އެކި ކަންކޮޅުތަކުގައި ތިބި ރައްޔިތުންނަށް މާލީ ފުރުސަތުތައް ފުޅާވެ، ކޮންމެ ތަނެއްގައި އަދި ކޮންމެ ވަގުތެއްގައިވެސް، ބޭރު ގައުމުތަކުގައި ދިރިއުޅޭ އާއިލާއާއި ރައްޓެހިންނަށް ފައިސާ ޓްރާންސްފަރކުރެވޭނެ ކަމަށް އުރީދޫއިން ބުނެއެވެ.

އެމް-ފައިސާ މެދުވެރިކޮށް އިންޓަނޭޝަނަލް މަނީ ޓްރާންސްފަރ ޚިދުމަތް ހޯދުމަށް، ކޮންމެ ނެޓްވޯރކެއްގެ ކަސްޓަމަރަކަށް ވެސް އެމް-ފައިސާ ވޮލެޓެއް ރެޖިސްޓަރ ކޮށްލުމުން ފައިސާ ފޮނުވޭނެއެވެ.