ކޮވިޑުގެ ސަބަބުން މެސީގެ ކުޅުމަށް ބޮޑު އަސަރުތަކެއްކުރި
31 މެއި 2022 | އަންގާރަ 12:37އެކަށީގެންވާ މުއްދަތަކު މަޑުނުކޮށް ކުޅެން ފެށުމުން ހާލަތު އިތުރަށް ގޯސްވި
ޕީއެސްޖީއަށް ކުޅެމުން އަންނަ ލިއޮނެލް މެސީ
ކޮވިޑް-19ގެ ސަބަބުން ޕީއެސްޖީއަށް ކުޅެމުން އަންނަ ލިއޮނެލް މެސީގެ ކުޅުމަށް ބޮޑެތި ނޭދެވޭ އަސަރުތަކެއް ކުރިކަމަށް އޭނާ ބުނެފިއެވެ.
ދުނިޔޭގެ އެންމެ މޮޅު އެއް ކުޅުންތެރިޔާ މެސީއަކީ ވަރަށް މަދުން ނޫނީ މީޑިއާތަކާ ވާހަކަދައްކާ ކުޅުންތެރިއެއް ނޫނެވެ. ނަމަވެސް އޭނާ މީޑިއާތަކާ ވާހަކަދައްކާ މަދު ފަހަރަކީ އެންމެންގެ ސަމާލުކަން އޭނާއަށް ހުއްޓޭ ފަހަރުތަކެކެވެ.
ދާދި ފަހުން ޓީވައިސީ ސްޕޯޓްސްއަށް މެސީ ދިން އިންޓަވިއުއެއްގައި އޭނާ ބުނީ ކޮވިޑު ޖެހުމުގެ ސަބަބުން ނޭވާލުމަށް އުނދަގޫވެ، އޭގެ ނޭދެވޭ އަސަރު ކުޅުމަށް ކޮށްފައިވާ ކަމަށެވެ. މެސީއަށް ކޮވިޑު ޖެހުނީ މިއަހަރުގެ ޖެނުއަރީ މަހުއެވެ. ދުނިޔޭގެ ގިނަ މީހުންނެކޭ އެއްގޮތަށް ކޮވިޑު ޖެހުމުން މެސީއަށްވެސް ވަނީ ކެއްސުމާއި، ކަރަށް ތަދުވުމުގެ އިތުރުން ހުންއައުންފަދަ އުނދަގޫތައް ވެފައެވެ.
ނަމަވެސް ކޮވިޑުން ރަނގަޅުވި ފަހުންވެސް މެސީގެ ނޭވާލުމަށް އުނދަގޫވާކަން އޭނާ ފާހަގަކުރިއެވެ. މިއީ ކޮވިޑުގެ އާފްޓަރ އިފެކްޓެއްގެ ގޮތުގައި ބައެއް މީހުންނަށް ދިމާވާ މައްސަލައެކެވެ. މެސީ ބުނީ އޭނާ ހީކުރި ވަރަށްވުރެ ދިގު މުއްދަތަކަށް މި މައްސަލައާ ކުރިމަތިލާން ޖެހުނު ކަމަށެވެ. އޭގެ ސަބަބުން ރަނގަޅަށް ދުއްވައި ނުގަނެވި ދޮޅު މަސް ހޭދަކުރަން ޖެހުނުކަން މެސީ ފާހަގަކުރިއެވެ. ކޮވިޑުގެ ސަބަބުން ފްރެންޗް ލީގުގެ ދެމެޗަކާއި ކޫޕް ޑި ފްރާންސްގެ މެޗެއް މެސީއަށް ގެއްލުނެވެ.
ނޭވާލާން އުނދަގޫވި ނަމަވެސް އަވަހަށް ކުޅުމުގެ ތެރެއަށް ވަނީ ޓީމުގައި ކުރިއަށްދާން ބޭނުންވެފައި ހުރި ވަރުން ކަމަށް މެސީ ބުންޏެވެ. އެކަށީގެންވާ މުއްދަތަކު ކުޅުމާއި ދުރުގައި މަޑު ނުކުރުމުން އޭނާގެ ކުޅުމަށް ނޭދެވޭ އަސަރުކޮށް، ބަލި އިތުރަށް ގޯސްވިކަމަށް މެސީ ބުންޏެވެ.
