ގައުމުން ބޭރަށް ވަޑައިގެންނެވުން މަނާކޮށްފައިވާ ޔޫކްރެއިންގެ ކުރީގެ ރައީސް ޕެޓްރޯ ޕޮރޮޝެންކޯއަށް ގައުމުން ބޭރަށް ވަޑައިގެންނެވުމުގެ ހުއްދަދީފައިވާކަމަށް އެމަނިކުފާނުގެ ޕާޓީން ބުނެފިއެވެ.
ޕެޓްރޯއަށް ހުއްދަދީފައިވަނީ ޕޮލެންޑް މަގުން ބޯޑަރު ހުރަސްކޮށް ވަޑައިގެންނެވުމަށްކަމަށް ޕެޓްރޯގެ ސިޔާސީ ޕާޓީ ޔޫރަޕިއަން ސޮލިޑާރިޓީން ނެރުނު ބަޔާނެއްގައި ބުނެފައިވެއެވެ. ޕެޓްރޯ ޔޫކްރެއިނުން ބޭރަށް މިވަޑައިގަންނަވަނީ ޔޫރަޕިއަން ޕީޕަލް ޕާޓީގެ ސަމިޓް އަދި ކޮންގްރެސްގައި ބައިވެރިވެވަޑައިގަތުމަށެވެ.
މީގެކުރިން ދެ ފަހަރެއްގެ މަތިން ޕެޓްރޯ ގައުމުން ބޭރަށް ވަޑައިގެންނެވުން ހުއްޓުވާފައިވެއެވެ. އޭގެތެރެއިން އެއް ފަހަރު ވަޑައިގެންނެވުމަށް މަސައްކަތްކުރެއްވީ ނޭޓޯގެ ޕާލަމަންޓްރީ އެސެމްބްލީގައި ބައިވެރިވެވަޑައިގަތުމަށެވެ.
ޕެޓްރޯގެ މައްޗަށް ތުހުމަތުކުރަނީ ޔޫކްރެއިންގެ އިރުމަތީގައި ހަރަކާތްތެރިވާ ރަޝިޔާއަށް ވާގިދޭ ގްރޫޕްތަކަށް ފައިނޭންސްކޮށްދީ އެހީތެރިކަން ފޯރުކޮށްދޭކަމަށެވެ. އެއީ 2014 ވަނަ އަހަރާއި 2015 އަހަރުއެވެ. ނަމަވެސް ޕެޓްރޯ ގެންދަވަނީ އެކަންތައް ދޮގުކުރައްވަމުންނެވެ.
ޖެނުއަރީ މަހު ޕެޓްރޯ ހައްޔަރުކުރުމުގެ އަމުރެއް ނެރެދިނުމަށް ޔޫކްރެއިންގެ ޕްރޮސެކިޔުޓަރ އެދިވަޑައިގަތުމުން އެއީ ސިޔާސީ ކަމެއްކަމުގައި ވިދާޅުވެ ފަނޑިޔާރު ވަނީ އެފަދަ އަމުރެއް ނެރެދެއްވުމަށް އިންކާރުކުރައްވާފައެވެ.
