ލ. ގަމުގައި 100 ހައުސިންގ ޔުނިޓު އެޅުމަށް ބަޔަކާ ހަވާލުކޮށްފި
އެސްޖޭ ކުންފުނީގެ ފަރާތުން ސޮއިކުރެއްވީ ޝިހާދު އިބްރާހިމް
ލ. ގަމުގައި 100 ހައުސިންގ ޔުނިޓު އެޅުމަށް ހަވާލުކުރުން
ޑިޒައިން އެންޑް ބިލްޑް އުސޫލުން ލ. ގަމުގައި 100 ހައުސިންގ ޔުނިޓު އެޅުމަށް ބަޔަކާ ހަވާލުކޮށްފިއެވެ.
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ކުރިއަށްގެންދިޔަ ރަސްމިއްޔާތެއްގައި މި މަޝްރޫއު ހަވާލުކޮށްފައިވަނީ އެސްޖޭ ކޮންސްޓްރަކްޝަން ޕްރައިވެޓް ލިމިޓެޑާއެވެ. މި މަޝްރޫއުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ހައުސިންގ ޑިޕާޓްމަންޓުގެ ޑިރެކްޓަރ ޖެނެރަލް އަހުމަދު ވިސާން ނަސީމެވެ. އެސްޖޭ ކުންފުނީގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރ ޝިހާދު އިބްރާހިމްއެވެ.
މި މަޝްރޫއަށް ޚަރަދު ކުރަނީ ދިވެހި ސަރުކާރުން، 2022 ވަނަ އަހަރުގެ ޕީއެސްއައިޕީ ބަޖެޓުންނެވެ.
މިނިސްޓްރީން މައުލޫމާތުދޭގޮތުގައި، މި މަސައްކަތުގެ އަގަކީ 84،397،200 (އައްޑިހަ ހަތަރު މިލިއަން ތިންލައްކަ ނުވަދިހަ ހަތްހާސް ދުއިސައްތަ) ރުފިޔާއެވެ. މި މަސައްކަތުގެ މުއްދަތަކީ 365 ދުވަހެވެ.
މި މަޝްރޫއުގައި ހިމެނެނީ 100 ހައުސިންގ ޔުނިޓެވެ. ކޮންމެ ހައުސިންގ ޔުނިޓެއްގައި 1000 އަކަފޫޓް ހުންނާނެއެވެ. ޔުނިޓެއްގައި ހިމެނޭނީ 3 ކޮޓަރިއާއި 3 ފާޚާނާއާއި ސިޓިންގ ރޫމާއި، ބަދިގެއާއި ލޯންޑަރީ އަދި ސްޓޯރ ރޫމް ކަމަށް މިނިސްޓްރީން މައުލޫމާތުދެއެވެ.
