މެޑިކަލް ޓެސްޓުތައް ހަދައި ރުޑިގާ ރެއާލަށް ސޮއިކޮށްފި

ޗެލްސީއަށް ކުޅެމުން އައި ޑިފެންޑަރު އެންޓޯނިއޯ ރުޑިގާ ރެއާލް މެޑްރިޑަށް ބަދަލުވުމަށް ހަދަންޖެހޭ މެޑިކަލް ޓެސްޓުތައް ހަދައި އެ ޓީމަށް ސޮއިކޮށްފިއެވެ.

ކުޅިވަރު ނޫސްވެރިޔާ ފެބްރީޒިއޯ ރޮމާނޯ ބުނި ގޮތުގައި އަންނަ ސީޒަނަށް ރެއާލުން ހޯދި ފުރަތަމަ ކުޅުންތެރިޔާގެ ގޮތުގައި ރުޑިގާ އިއުލާންކުރުމަށް އެ ޓީމުން މިހާރު ވަނީ ތައްޔާރުވެފައެވެ. އަދި ރެއާލަށް ބަދަލުވުމުގެ ކުރިން ހަދަން ޖެހޭ މެޑިކަލް ޓެސްޓުތައް ހަފްތާތަކެއްގެ ކުރިން ލަންޑަނުގައި ހަދާފައިވާ ކަމަށެވެ. އަދި ރެއާލާއެކު އެއްބަސްވުމުގައި ސޮއިކޮށްފި ކަމަށް ރޮމާނޯ ވަނީ ބުނެފައެވެ.

ރުޑިގާ ރެއާލަށް ބަދަލުވީ ހަތަރު އަހަރު ދުވަހުގެ އެއްބަސްވުމެއްގެ ދަށުންނެވެ. އޭނާ ރެއާލާއެކު ހެދި އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. ރެއާލުން ރުޑިގާ ހޯދީ އެ ޓީމަށް މިހާރު އެންމެ ބޭނުން ބޮޑުވެފައި އޮތީ ޓީމުގެ ފަހަތަށް ކުޅޭނެ ޓޮޕް ލެވެލްގެ ކުޅުންތެރިއަކަށްވުމުން ކަމަށް މީޑިއާ ރިޕޯޓުތައް ވަނީ ބުނެފައެވެ.

ރޮމާގައި ހުރުމަށްފަހު ރުޑިގާ ޗެލްސީއަށް ބަދަލުވީ 2017 ވަނަ އަހަރުއެވެ. އޭގެ ފަހުން އޭނާ ވަނީ އެ ޓީމަށް 203 މެޗު ކުޅެދީ 12 ލަނޑު ޖަހާފައެވެ. ރުޑިގާ ވަނީ ޗެލްސީއާއެކު އެފްއޭ ކަޕް އެއް ފަހަރު، ޔުއެފާ ޗެމްޕިއަންސް ލީގު އެއް ފަހަރު، ޔުއެފާ ޔޫރޮޕާ ލީގު އެއް ފަހަރު، ޔުއެފާ ސުޕަ ކަޕް އެއް ފަހަރު އަދި ފީފާ ކުލަބް ވޯލްޑް ކަޕް އެއް ފަހަރު ހޯދާފައެވެ. މީގެ އިތުރުން އޭނާ ވަނީ އެ ޓީމާއެކު އެފްއޭ ކަޕްގެ ރަނަރއަޕް ކަން ތިން ފަހަރު އަދި ކަރަބޯ ކަޕްގެ ރަނަރއަޕް ކަން ދެ ފަހަރު ހޯދާފައެވެ.

ޖަރުމަނުގެ ގައުމީ ޓީމަށް ކުޅެމުން އަންނަ ރުޑިގާ ވަނީ ގައުމީ ޓީމާއެކު 2017 ވަނަ އަހަރުގެ ފީފާ ކޮންފެޑަރޭޝަން ކަޕް ކާމިޔާބުކޮށްފައެވެ. އޭނާ އަންނަނީ 2014 ވަނަ އަހަރުން ފެށިގެން ޖަރުމަނުގެ ގައުމީ ޓީމަށް ކުޅެމުންނެވެ.