މަންކީޕޮކްސްގެ އިތުރު ކޭސްތަކާއެކު ބަލި ފެތުރިގެން ދިޔުމުގެ ފުރުސަތު އެބައޮތް ކަމަށް ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ)އިން ބުނެފިއެވެ.
އެ ޖަމިއްޔާއިން ބުނީ މިހާރު ބަލި ނުފެންނަ ގައުމުތަކުންވެސް ބަލި ފެނުމުގެ ފުރުސަތު އެބައޮތް ކަމަށެވެ. ވައިރަސް އަމިއްލަ ޒާތުގައި ފެތުރޭނަމަ އަދި އެކަމުން އާންމު މުޖުތަމައަށް ފެތުރިއްޖެނަމަ، ކުޑަކުދިންނާއި ހައި ރިސްކް މީހުންނަށް ކުރާ އަސަރު ބޮޑު ވާނެ ކަމަށްވެސް އެ ޖަމިއްޔާއިން ބުނެއެވެ.
މެއި މަހުގެ 26ވަނަ ދުވަހު 257 ކޭސް ރިޕޯޓްކޮށްފައިވެއެވެ. އަދި ބައްޔަށް ޝައްކު ކުރެވިގެން 120 މީހުން ރިޕޯޓުކޮށްފައިވެއެވެ.
މަންކީޕޮކްސް އާންމުކޮށް ނުފެތުރޭ ސަރަހައްދުތަކުގައި ބަލި ފެތުރުން ކޮންޓްރޯލްކުރުމަށް އިސްކަމެއް ދޭންޖެހޭކަމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)ން ބުނެފައިވެއެވެ.
މިހާތަނަށް އެންމެ ގިނަ ކޭސް ރިޕޯޓުކޮށްފައިވަނީ އިނގެރޭސިވިލާތް، ސްޕެއިން އަދި ޕޯޗުގަލްއިންނެވެ. މިހާތަނަށް ފެނުނު ގިނަ ކޭސްތަކަކީ، ފުރަތަމަ ބަލި ފެނުނު ސަރަހައްދުތަކަށް ދަތުރުކޮށްފައިވާ މީހުންގެ ފަރާތުން ފެނުނު ކޭސްތަކެކެވެ.
މަންކީޕޮކްސް އަކީ އެފްރިކާގެ ގައުމުތަކުން އާންމުކޮށް ފެންނަމުން ގޮސްފައިވާ ބައްޔެކެވެ. ނަމަވެސް މިފަހަކުން އެބަލި ވަނީ ކުރިން ނުފެންނަ ހިސާބުތަކުން ފެންނަން ފަށާފައެވެ.
