ލިވަޕޫލް ބަލިކޮށް, ސާދަ ވަނަ ފަހަރަށް ޗެމްޕިއަންސްލީގު ތަށި ރެއާލް މެޑްރިޑުން އުފުލާލި ފައިނަލް މެޗުގެ މޮޅު ކުޅުންތެރިއަކަށް ކީޕަރު ތިބައޫ ކޯޓުއާ ހޮވައިފިއެވެ. ބީބީސީން ރޭޓް ކޮށްފައިވާގޮތުން ސަޕޯޓަރުންގެ އެންމެ މޮޅު ކުޅުންތެރިއަކީ ކޯޓުއާއެވެ.

މެޗުން ރެއާލް މޮޅުވީ ކޯޓުއާ މަތަކުރި ބޯޅަތަކުގެ ސަބަބުންނެވެ. ސަލާހުއާއި, މާނޭއާއި, ތިއާގޯ ފޮނުވާލި ބޯޅަތައް ބެލްޖިއަމްގެ ކީޕަރު ވަނީ މަތަކޮށްފައެވެ. މެޗުގައި ގިނަ އެޓޭކް ކުރީ ލިވަޕޫލުންނެވެ. ހޮނިހިރު ދުވަހުގެރޭ ކުޅުނު ފައިނަލް މެޗަށްފަހު ކޯޓުއާއަށް ގިނަ ބައެއްގެ ތައުރީފް އަންނަނީ ލިބެމުންނެވެ. އެކަމަކު ކޯޓުއާ ބުނީ ކުރިން އޭނާއަށް އެއިހުތިރާމް ނުލިބޭކަމަށެވެ. ޕްރިމިއަރ ލީގުގައި ކުޅުނު އިތުވެސް އިހުތިރާމް ލިބުމުގެ ބަދަލުގައި ފާޑުކިއުންތައް އަމާޒުވަމުން ދިޔަކަން ކޯޓުއާ ފާހަގަކުރިއެވެ. އެކަމަކު ޗެލްސީގައި ހޭދަކުރި މުއްދަތުގައި ކޯޓުއާ ވަނީ ޕްރިމިއަރ ލީގުގައި ކުޅުނު 128 މެޗުގެ ތެރެއިން 48 މެޗުގައި ކޮޅަށް ގޯލެއް ވަނަނުދީ ހިފަހައްޓާފައެވެ. ޗެލްސީއާއެކު ދެފަހަރު ޕްރިމިއަރ ލީގު ހޯދިއެވެ.

ރެއާލްއަށް ބަދަލުވީ 2018 ވަނަ އަހަރުއެވެ. ރެއާލްގައި ޗެމްޕިއަންސްލީގުގެ އިތުރުން ލީގު ދެފަހަރު ހޯދައިފިއެވެ. މިފަހަރު ރެއާލްއިން ޗެމްޕިއަންސްލީގު ހޯދިއިރު ފަސް މެޗެއްގައި ކޮޅަށް ގޯލެއް ވަނަނުދީ ހިފެހެއްޓިއެވެ. 59 ސޭވް ކުރިއެވެ. އެއީ އިންސައްތައިން ބަލާނަމަ 80.56 އެވެ. ކޯޓުއާ ބުނީ ލިވަޕޫލާއި, ސިޓީފަދަ ވަރުގަދަ މޮޅު ޓީމްތައް ބަލިކޮށް ޗެމްޕިއަންސްލީގު އުފުލާލުމަކީ ބޮޑު އުފަލެއްކަމަށެވެ.