ރެއާލްއިން އެމްބާޕޭ ހަނދާން ނައްތާލައިފި: ޕެރޭޒް

ރެއާލް މެޑްރިޑުން ޕީއެސްޖީގެ ތަރި ކީލިއަން އެމްބާޕޭ ހަނދާން ނައްތާލާފައިވާކަމަށް ރެއާލްގެ ރައީސް ލޮރެންޓީނޯ ޕެރޭޒް ވިދާޅުވެއްޖެއެވެ.

ކުރިއަށް އޮތް ސީޒަންގައި ރެއާލްއަށް ބަދަލުވުމުގެ މަޝްވަރާތައް ކުރުމަށްފަހު އެމްބާޕޭ ވަނީ ޕީއެސްޖީގައި މަޑުކުރުމަށް ނިންމާފައެވެ. މީގެ ސަބަބުން ރެއާލްގެ މެނޭޖުމެންޓާއި ސަޕޯޓަރުން އަދި ކުޅުންތެރިންވެސް ވަނީ އެމްބާޕޭގެ ނިންމުމާމެދު ނުރުހުން ފާޅުކޮށްފައެވެ.

ހޮނިހިރު ދުވަހުގެރޭ ޗެމްޕިއަންސް ލީގުގެ ތަށި އުފުލާލުމަށްފަހު ޕެރޭޒް ވިދާޅުވީ ރެއާލްއިން އަބަދުވެސް ސަމާލުކަން ދޭނީ އެންމެ މޮޅު ކުޅުންތެރިންނާއެކު މަސައްކަތް ކުރުމަށް ކަމަށެވެ. ނަމަވެސް މިއަދު އެމްބާޕޭގެ މަތިން ޓީމު ހަނދާން ނައްތާލައިފިކަން ފާހަގަކޮށް ޕެރޭޒް ވިދާޅުވީ ރެއާލް މެޑްރިޑުން މިވަނީ ފުރިހަމަ ސީޒަނެއް ނިންމާލާފައި ކަމަށެވެ. މި ސީޒަންގައި ރެއާލް ވަނީ ސްޕެނިޝް ލީގުވެސް ކާމިޔާބު ކޮށްފައެވެ.

ޕެރޭޒް ވިދާޅުވީ ޓީމު ހޯދި ކާމިޔާބީއާމެދު އޭނާ އުފާކުރާ ކަމަށެވެ. އަދި މިއީ ޓީމުގެ ކުޅުންތެރިންނާ ކޯޗުގެ އިތުރުން ސަޕޯޓަރުންގެ ހިތްވަރުން ލިބުނު ކާމިޔާބެއްގެ ގޮތުގައި ޕެރޭޒް ސިފަކުރެއްވިއެވެ. މުބާރާތުގެ ފައިނަލް މެޗުގައި ލިވަޕޫލް އަތުން ރެއާލް މޮޅުވި ލަނޑު ކާމިޔާބު ކޮށްދިނީ ޒުވާން ފޯވާޑް ވިނީޝިއޫސް ޖޫނިއާއެވެ. މި ސީޒަންގައި މޮޅު ކުޅުމެއް ދެއްކި ވިނީޝިއޫސް ވަނީ މުބާރާތުގެ ތަށި ޓީމަށް ހޯދައިދީ، ޓީމުގައި ޒުވާން މުސްތަގުބަލެއް އޮތްކަން ސާބިތު ކޮށްދީފައެވެ.

ޕެރޭޒް ވަނީ މި ސީޒަންގައި އެޓީމުގެ ކީޕަރު ތީބޯ ކޯޓުއާ ދެއްކި މޮޅު ކުޅުމަށް ތައުރީފު ކޮށްފައެވެ. ޕެރޭޒް ވަނީ ލިވަޕޫލްގެ ސަލާހްއާ މާނޭ އުފެއްދި ނުރައްކާތެރި ހަމަލާތައް ދިފާއު ކުރުމުގައި ކޯޓުއާ އަދާކުރި މުހިންމު ދައުރު ފާހަގަކުރައްވާފައެވެ. މީގެ އިތުރުން ޕެރޭޒް ވިދާޅުވީ ކޯޓުއާއަކީ މިހާރު ދުނިޔޭގައި ހުރި އެންމެ މޮޅު ގޯލްކީޕަރު ކަމަށެވެ.