އިންޑިއާ އަސްކަރިއްޔާ އާއި އެމްއެންޑީއެފް ގުޅިގެން ރާއްޖޭގެ ކަނޑުގެ ސަރަހައްދުތަކުގައި ކުރަން ފެށި ހައިޑްރޮގްރަޕިކް ސާވޭގެ ތެރެއިން މާލޭ ސަރަހައްދާއި އުތުރުގެ ކަނޑުގެ ސަރަހައްދު ސާވޭކޮށް ނިންމާލައިފިއެވެ.

މި ސާވޭ އަކީ އިންޑިއާ އަސްކަރިއްޔާ އާާއި އެމްއެންޑީއެފް ގުޅިގެން ރާއްޖޭގައި ކުރިޔަށްގެންދިޔަ ދެވަނަ ޖޮއިންޓް ހައިޑްރޮގްރެފިކް ސާވޭއެވެ. ސާވޭ ކުރަން ބޭނުންކޮށްފައިވަނީ އިންޑިއާގެ ސުލްތެޖު ކިޔާ މަނަވަރެކެވެ. ސާވޭގެ ތެރެއިން ހޯދުނު ހޯދުންތައް ވަނީ ޑިފެންސް މިނިސްޓަރު މާރިޔާ އަޙުމަދު ދީދީއާ ހަވާލުކޮށްފައެވެ. މިސާވޭ ކުރިޔަށް ގެންގޮސްފައިވަނީ އޭޕްރީލް 21ން މެއި 23އަށެވެ.

ދެވަނަ ހައިޑްރޮގްރަޕިކް ސާވޭގެ ދަށުން 650 ނެނޮމީޓަރުގެ ސައުންޑިން ހަދާފައިވެއެވެ. އެއީ އުތުރުގައި 4750 ނެނޮމީޓަރުގެ ސައުންޑިން އާއި މާލެ ސަރަހައްދުގައި 1730 ނެނޮމީޓަރުގެ ސައުންޑިންއެވެ. ހދ. ހަނިމާދޫ އިން ފެށިގެން ށ. ފުނަދޫއާ ހިސާބަށް 844 ސްކޮޔާ ކިލޯމީޓަރު ވަނީ ސާވޭ ކޮށްފައެވެ. އަދި މާލޭ ސަރަހައްދުގެ 100 ސްކޮޔާ ކިލޯމީޓަރުގެ ސަރަހައްދެއް ވަނީ ސާވޭކޮށްފައެވެ.

އެންމެ ފުރަތަމަ ޖޮއިންޓް ހައިޑްރޮގްރެފިކް ސާވޭއެއް ރާއްޖޭގައި ކުރިއަށް ގެންގޮސްފައި ވަނީ އިންޑިއާގެ ދަރްޝަކް އިންނެވެ. އެއީ މިދިޔަ އަހަރުގެ ފެބްރުއަރީ އަދި މާޗް މަހުގައެވެ.

ހައިޑްރޮގްރެޕިކް ދެވަނަ ސާވޭގެ ސަބަބުން މި ސަރަހައްދުތަކުގައި ދަތުރުކުރަން ބޭނުން ކުރާ އިލެކްޓޮރޯނިކް ނެވިގޭޝަނަލް ޗާޓްތައް އަޕްޑޭޓްވާނެ ކަމަށް ވެސް ހައިޑްރޮގްރެޕިކް ސާވިސްއިން ބުނެއެވެ. އަދި ކަނޑުދަތުރުކުރާ ބޯޓުފަހަރުގެ ސަލާމަތީ ކަންތައްތައް ވަރުގަދަވެގެން ދާނެ ކަމަށްވެސް އެ އިދާރާއިން ވަނީ ބުނެފައެވެ.

މި ސަރވޭގެ އަލީގައި ދަތުރުވެރިންގެ ސަލާމަތާއި ރައްކާތެރިކަން އިތުރުކުރެވި ރާއްޖޭގައި އެންމެ ގިނައިން ހިނގާ ކަނޑުމަތީގެ ހާދިސާކަމުގައިވާ ފަރަށް އެރުންފަދަ ހާދިސާތައް މަދުކުރެވުމުގެ ނަތީޖާއެއްގެ ގޮތުން މިފަދަ ހާދިސާތަކުން އޮޑިވެރިންނަށް ގެއްލުން ލިބުމުގެ ފުރުސަރު ކުޑަކުރެވިގެންދާނެ ކަމަށް އެމްއެންޑީއެފްއިން ބުނެއެވެ. އަދި މި މަސައްކަތުގެ ސަބަބުން އިންޝުއަރެންސް ކްލެއިމްތައް ލީގަލައިޒްކުރުމަށާއި، އިޤްތިޞާދު ފުޅާކުރުމަށް ބޭނުންވާ މައުލޫމާތު ލިބިގެންދާނެ ކަމަށާއި، ރާއްޖޭގެ ތިމާވެއްޓަށް ލިބޭ ގެއްލުންތައް ދިރާސާކުރުމަށް ބޭނުންވާނެ މައުލޫމާތާއި ކޯސްޓަލް ޒޯން މެނޭޖްމަންޓް ފަދަ މުހިންމު މަސައްކަތްތަކަށް ބޭނުންވާނެ މައުލޫމާތު ވެސް ލިބިގެންދާނެ ކަމަށް އެމްއެންޑީއެފުން ބުނެއެވެ.