ޤައުމީ އުފެއްދުންތެރިކަމުގެ ނިސްބަތުން ރާއްޖޭގެ ދަރަނީ ދަނީ ދަށްވަމުން: އަމީރު
26 މެއި 2022 | ބުރާސްފަތި 06:56ކުރިއަށް އޮތް ތަނުގައި ރާއްޖޭގެ ދަރަނި އެންމެ ބޮޑަށް އިތުރުވެގެންދާނީ 2026 ވަނަ އަހަރު
އިޤްތިސާދީ ކޮމިޓީ ބައްދަލުވުން
ޤައުމީ އުފެއްދުންތެރިކަމުގެ ނިސްބަތުން ރާއްޖޭގެ ދަރަނީ ދަނީ ދަށްވަމުން ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ދިވެހިރާއްޖޭގެ ޓޫރިޒަމް ޤާނޫނަށް އިސްލާޙު ގެނައުމުގެ ބިލާ ގުޅޭގޮތުން ރައްޔިތުންގެ މަޖިލީހުގެ އިޤްތިސާދީ ކޮމިޓީ ބައްދަލުވުމުގައި ދުވާފަރު ދާއިރާގެ މެމްބަރު އިސްމާއިލް އަހުމަދު ކުރެއްވި ސުވާލަށް ޖަވާބުދެއްވަމުން މިނިސްޓަރު އަމީރު ވިދާޅުވީ ކޮވިޑަށް ފަހު ދުނިޔޭގައި އެންމެ ބާރަށް ކުރިއަރާ އިޤްތިސާދުތަކުގެ ތެރޭގައި ދިވެހިރާއްޖެ ހިމެނިގެންދާ ކަމަށެވެ.
މިނިސްޓަރު ވިދާޅުވީ ރާއްޖޭގެ އިޤްތިސާދަށް އެންމެ ބޮޑު ލޮޅުމެއް އައީ 2020 އަދި 2021 ގައި ކަމަށެވެ. މިހާރު ރާއްޖެ އޮތީ މިއަށްވުރެ ރަނގަޅު ހާލަތެއްގައި ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ 2020 ވަނަ އަހަރު ނިމުނުއިރު ގައުމީ އުފެއްދުންތެރިކަމުގެ ނިސްބަތުން ރާއްޖޭގެ ދަރަނީގެ ނިސްބަތް ހުރީ ގާތްގަނޑަކަށް 130 ގައި ކަމަށެވެ. މިހާރު ދައުލަތުގެ އާމްދަނީ އިތުރުވެ، ޖީޑީޕީ އިތުރުވަމުންދިއުމާއެކު ދަރަނި ނަގާ މިންވަރު ދަށްވަމުންދާތީ ގައުމީ އުފެއްދުންތެރިކަމުގެ ނިސްބަތުން ދަރަނި ދަނީ ދަށްވަމުން ކަމަށް މިނިސްޓަރު އަމީރު ވިދާޅުވިއެވެ.
އެހެންކަމުން، ރާއްޖެއިން ދައްކަންޖެހޭ ދަރަނި ނުދެއްކުމުގެ އެއްވެސް ރިސްކެއް ނެތް ކަމަށާއި އެކަންކަން މެނޭޖްކުރަމުންދާކަމަށް މިނިސްޓަރު އަމީރު ވިދާޅުވިއެވެ. މިގޮތުން، 2021 ވަނައަހަރު ސުކޫކު ވިއްކިއިރު ލައިބިލިޓީ މެނޭޖްމެންޓް އެކްސަރސައިޒެއް ހިންގައި، މާކެޓް ޕްރޯ ގޮތަކަށް މިކަން ރީސްޓްރަކްޗަރ ކޮށްފައިވާކަމަށް މިނިސްޓަރު ވިދާޅުވިއެވެ. އެހެން ނޫންނަމަ މި އަންނަ ޖޫން މަހު ސަނީ ސައިޑް ބޮންޑަށް އެއްފަހަރާ 250 މިލިއަން ޑޮލަރު ދައްކަންޖެހޭނެ ކަމަށާއި، ކުރިއާލައި ރާވައިގެން މިދިޔަ އަހަރު މި ބޮންޑަށް ގާތްގަނޑަކަށް 192 މިލިއަން ޑޮލަރު ދައްކާފައިވާކަމަށް މިނިސްޓަރު އަމީރު ވިދާޅުވިއެވެ. ބާކީ 58 މިލިއަން ޑޮލަރާއި އިންޓްރެސްޓް ޕޭމެންޓާ އެއްކޮށް ޖޫން ފުރަތަމަ ހަފްތާގައި 62 މިލިއަން ރުފިޔާ ދައްކާނެ ކަމަށް މިނިސްޓަރު ވިދާޅުވިއެވެ. އެ ފައިސާ އެބަހުރި ކަންވެސް މިނިސްޓަރު ފާހަގަކުރެއްވިއެވެ.
މިހާރު ނަގާފައިހުރި ދަރަނިތަކާއެކު ކުރިއަށް އޮތް ތަނުގައި ރާއްޖޭގެ ދަރަނި އެންމެ ބޮޑަށް އިތުރުވެގެންދާނީ 2026 ވަނަ އަހަރުގައި ކަމަށް މިނިސްޓަރު ވިދާޅުވިއެވެ. އޭގެ ކުރިން އަނެއްކާވެސް ލައިބިލިޓީ މެނޭޖްމެންޓް އެކްސަރސައިޒެއް ހިންގައި ދަރަނި މެނޭޖްކުރުމަށްޓަކާ މަސައްކަތްތަކެއް ކުރަންޖެހޭނެކަން މިނިސްޓަރު އަމީރު ވަނީ ފާހަގަކުރައްވާފައެވެ. ޗޯޓް އަދި މީޑިއަމް ޓާމްގައި ރާއްޖެއިން ދަރަނި ދެއްކުމަށް އެއްވެސް ހުރަހެއް ނެތް ކަމަށާއި އެކަން ވޯލްޑް ބޭންކް އަދި އޭޑީބީގެ ރިޕޯޓުތަކުގައިވެސް ފާހަގަކުރަމުންދާކަމަށް މިނިސްޓަރު ވިދާޅުވިއެވެ.
މިނިސްޓަރު އަމީރު އިތުރަށް ވިދާޅުވީ ކުރީގެ ސަރުކާރުތަކުން ނަގާފައި ހުރި ލޯނުތައްވެސް ބަރާބަރަށް ދަށްކަމުން ދާކަމަށެވެ. ޑެޓް މެނޭޖްމެންޓް ސްޓްރެޓެޖީގެ ދަށުން އެ ދަރަނީގެ 76 އިންސައްތަ ވަނީ ދައްކާފައި ކަމަށް މިނިސްޓަރު ވިދާޅުވިއެވެ. އޭގެ އިތުރުންވެސް ސަރުކާރުތަކުން ނަގާފައި ހުރި ލޯނުތައް ދައްކަމުން ދާކަމަށާއި، 2020 ވަނަ އަހަރު އިޤްތިސާދު އެންމެ ދަށް ދަނޑިވަޅުގައިވެސް ދަރަނި ދެއްކުމަށް އިސްކަންދީގެން އެެކަން ކުރަމުން ދިޔަކަން މިނިސްޓަރު ފާހަގަކުރެއްވިއެވެ.
ރާއްޖޭގެ އިޤްތިސާދަކީ ކޮވިޑްގެ ހާލަތުގައި ވަރަށް ބޮޑަށް ދަށަށް ދިޔަ، އަދި އެހާމެ އަވަހަށް ރަނގަޅު ހާލަތަކަށް އަނބުރާ ރުޖޫއަވި އިގްތިސާދެއް ކަމުގައި މިނިސްޓަރު ފާހަގަކުރެއްވިއެވެ. މިގޮތުން 2021 ވަނަ އަހަރު އަންދާޒާކުރީ 1 މިލިއަން ފަތުރުވެރިން އަންނާނެ ކަމަށް ކަމަށާއި އަހަރު ނިމުނުރިއު 1.3 މިލިއަން ފަތުރުވެރިން އައިސް 2019 ވަނަ އަހަރަށްވުރެ ބެޑް ނައިޓް އިތުރުވި ކަމަށް މިނިސްޓަރު ވިދާޅުވިއެވެ. 2020 ވަނަ އަހަރު ރާއްޖޭގެ އިގްތިސާދު ވަރަށް ބޮޑަށް ދަށަށް ގޮސް، 2021 ވަނަ އަހަރު އިގްތިސާދު 30 އިންސައްތައަށްވުރެ އިތުރުވެފައިވާކަމަށް މިނިސްޓަރ ވިދާޅުވިއެވެ.
މިއަހަރު ފަތުރުވެރިން އަންނަ މިންވަރަށް ބަލާއިރުވެސް މިހާތަނަށް އަންދާޒާކުރި މިންވަރަށް ފަތުރުވެރިން އަންނަމުންދާކަމަށް މިނިސްޓަރ ވިދާޅުވިއެވެ. މިހާތަނަށް އަންދާޒާކުރި މިންވަރުގެ 90 އިންސައްތަ ހާސިލުކުރެވިފައިވާކަމަށާއި، އަހަރު ނިމޭއިރު އަންޒާދާ ކުރާ މިންވަރަށް ފަތުރުވެރިން އަންނާނެ ކަމަށް މިނިސްޓަރ ވިދާޅުވިއެވެ. އަދި ރާއްޖޭގެ އިގްތިސާދީ އިންޖީނު ބަރާބަރަށް ހިނގާ ކަމަށް މިނިސްޓަރ އަމީރު ވަނީ ވިދާޅުވެފައެވެ.
