ސައުތު ކޮރެއާއިން ސޮންއަށް ހޫނު މަރުހަބާއެއް

އިނގިރޭސި ޕްރިމިއަރ ލީގުގެ މި ސީޒަންގައި އެންމެ ގިނަ ލަނޑު ޖެހި ކުޅުންތެރިޔާ ސޮންއަށް އޭނާގެ އުފަން ގައުމު ސައުތު ކޮރެއާއިން ހޫނު މަރުހަބާއެއް ކިޔައިފިއެވެ.

މުބާރާތް ނިންމާލުމަށްފަހު އެނބުރި ގައުމަށް ދިޔުމުން އޭނާއަށް ހޫނު ތަރުހީބެއް ލިބުނެވެ. އޭނާއަށް މަރުހަބާ ކިޔުމަށްޓަކައި އެއަރޕޯޓުގައި ގިނަ އަދަދެއްގެ ސަޕޯޓަރުން އެއްވެ ތިއްބެވެ.

ސޮން މުބާރާތުގެ ރަން ބޫޓު ކާމިޔާބުކުރީ މުބާރާތުގައި 23 ލަނޑު ޖަހައިގެންނެވެ. ސޮން ރަންބޫޓް ހޯދީ ލިވަޕޫލްގެ ސަލާހުއާއެކު އެވެ. ސަލާހްވެސް ވަނީ މުބާރާތުގައި 23 ލަނޑު ޖަހާފައެވެ. ސޮންއަކީ ޕްރިމިއަރ ލީގުގެ ރަން ބޫޓު ހޯދި އެންމެ ފުރަތަމަ އޭޝިޔާ ނަސްލުގެ ކުޅުންތެރިޔާއެވެ.

އެންމެފަހު މެޗަށް މި ދެކުޅުންތެރިން ކުރިމަތިލިއިރު ސަލާހް އުޅުނީ ސޮން އަށްވުރެ އެއް ލަނޑުގެ ތަފާތުން ކުރީގައެވެ. ނަމަވެސް މުބާރާތައި ކުޅުނު ފަހު މެޗުތަކުގައި ސަލާހަށް އެއް ލަނޑު ކާމިޔާބުކުރެވުނުއިރު، ސޮން ވަނީ ދެ ލަނޑު ޖަހާފައެވެ.

މުބާރާތުގައި ރަން ބޫޓޫ ހާސިލްކުރުމުގެ އިތުރުންވެސް ސޮން އަންނަނީ ޓޮޓެންހަމްގައި މޮޅު ކުޅުމެއް ދައްކަމުންނެވެ.