ސައުތުހެމްޓަން އަތުން 0-2 ގެ ނަތީޖާއަކުން މޮޅުވެ އިނގިރޭސި ޕްރެމިއަ ލީގުގެ ގަދަ ހަތަރެއްގެ ޖާގައެއް ކަށަވަރުކުރަން އާސެނަލުން ކުރަމުން އަންނަ މަސައްކަތަށް އިތުރު ހިތްވަރެއް ލިބިއްޖެއެވެ.

މި މޮޅާއެކު އާސެނަލަށް ލީގުގެ ފަސްވަނަ ލިބެނީ ކުރިން އެ މަގާމުގައި އޮތް މެންޗެސްޓަރ ޔުނައިޓެޑަށް އެއް ޕޮއިންޓް އިތުރަށް ޖުމްލަ 66 ޕޮއިންޓާއެކުއެވެ. ލީގުގެ ހަތަރުވަނައިގައި އޮތް މެންޗެސްޓާ ސިޓީއަށް ލިބިފައި ވަނީ އާސެނަލަށްވުރެ އިތުރަށް ތިން ޕޮއިންޓެވެ. މެޗުން ބަލިވި ސައުތުހެމްޓަން އޮތީ 42 ޕޮއިންޓާއެކު ލީގުގެ ދިހަ ވަނައިގައެވެ.

ސައުތުހެމްޓަންގެ އަމިއްލަ ދަނޑުގައި ބުދަ ދުވަހުގެރޭ ކުޅުނު މި މެޗުގައި އާސެނަލުން ކާމިޔާބުކުރި ދެލަނޑުވެސް ފެނިގެން ގޮސްފައި ވަނީ ދެވަނަ ހާފުގައެވެ.

މޮޅު ކުޅުމަކާއެކު އަމިއްލަ ދަނޑުގައި ކުޅެމުންދިޔަ ސައުތުހެމްޓަނުން ދިޔައީ ފުރަތަމަ ހާފުގައި އާސެނަލްގެ ހާފަށް ބާރު ބޮޑުކޮށް ގޯލާ އަމާޒުކޮށް ނުރައްކާތެރި ހަމަލާތައް ފޮނުވާލަމުންނެވެ. އެގޮތުން އާސެނަލްގެ ޑިފެންސުން ދިޔައީ ސައުތުހެމްޓަންގެ ހަމަލާތައް ދިފާއު ކުރުމަށް ބުރަކޮށް މަސައްކަތް ކުރަމުންނެވެ.

މިހާފުގައި އާސެނަލްގެ އާރޮން ރަމްޒީ އާއި އޮކްސްލޭ ޗެމްބަލިންގެ ފަރާތުން ވަނީ މޮޅު ކުޅުމެއް ފެނިގެން ގޮސްފައެވެ.

މެޗުގެ ދެވަނަ ހާފު ފެށިގެން އާސެނަލުން ވަނީ މޮޅު ކުޅުމަކާއެކު ސައުތުހެމްޓަންގެ ހާފަށް ބާރު ބޮޑު ކުރަން ފަށާފައެވެ. އެގޮތުން އެލެކްސިސް ސަންޗޭޒް އަދި ޑެނީ ވެލްބެކްގެ ފަރާތުން ފެނުނު މޮޅު ކުޅުން ފާހަގަކޮށްލެވެއެވެ.

މި މެޗުގައި އާސެނަލުން ޖެހި ފުރަތަމަ ގޯލު 60 ވަނަ މިނެޓުގައި ކާމިޔާބުކޮށްދިނީ އެލެކްސިސް ސަންޗޭޒް އެވެ. މިލަނޑު އޭނާ ކާމިޔާބުކުރީ މެސުތް އޮޒިލް ދިން ޕާހަކުން އިދިކޮޅު ދެ ޑިފެންޑަރުން ކައިރިން ނައްޓާލުމަށްފަހު ގޯލުގެ ތިރީ ކަނަށް ފޮނުވާލައިގެންނެވެ.

މި ލަނޑާއެކު އާސެނަލުން ލީޑު ނަގައިގެން ކުޅެމުންދިޔަ އިރު، އެޓީމުން ވަނީ އިދިކޮޅު ހާފަށް ބާރުބޮޑުކޮށް ގޯލާ އަމާޒުކޮށް ނުރައްކާތެރި ގިނަ ހަމަލާތަކެއް ފޮނުވާލާފައެވެ.

ނަތީޖާއެއްގެ ގޮތުން އާރޮން ރަމްޒީ ތަނަވަސްކޮށްދިން ފުރުސަތަކުން ބަދަލު ކުޅުންތެރިޔެއްގެ ގޮތުގައި ކުޅެން ނުކުތް އޮލިވިއެ ޖިރޫޑް ވަނީ 83 ވަނަ މިނެޓުގައި އިތުރު ލަނޑެއް ކާމިޔާބުކޮށްދީ އެޓީމަށް ލީޑު ފުޅާކޮށްދީފައެވެ.

މިލަނޑުތަކަށްފަހު ވެސް ދެޓީމަށް ވަނީ ލަނޑުޖަހާނެ ހުސް ފުރުސަތު ލިބި ބޭނުންކުރެވޭ ގޮތް ނުވެފައެވެ.

ލީގުގައި އާސެނަލް ދެން އެންމެ އަވަހަށް މެޗެއް ކުޅުމަށް ހަމަޖެހިފައި ވަނީ މި މަހުގެ 13 ވަނަ ދުވަހު ސްޓޯކް ސިޓީއާ ދެކޮޅަށެވެ.