މިމަހު ރާއްޖޭގެ ފަތުރުވެރިކަން ރަނގަޅު، އަދަދުތައް 2019 ވަނަ އަހަރާ އަޅާބަލާއިރު އިތުރު
2019ގެ މި މުއްދަތުގައި އައި ފަތުރުވެރިންގެ އަދަދަށްވުރެ 22.4 އިންސައްތަ އިތުރު
ފަތުރުވެރިންތަކެއް އެއަރޕޯޓުގައި
މިމަހުގެ މިހާތަނަށް ރާއްޖެ އައި ފަތުރުވެރިންގެ އަދަދު (ކޮވިޑް-19ގެ ހާލަތުގެ ކުރިން) 2019ގެ މި މުއްދަތުފައި އައި ފަތުރުވެރިންނަށްވުރެ 22.4 އިންސައްތަ އިތުރުވެއްޖެއެވެ.
ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން، މެއި މަހުގެ 24 ވަނަ ދުވަހުގެ ނިޔަލަށް ރާއްޖެ އައިސްފައިވަނީ 100،228 ފަތުރުވެރިންނެވެ. 2019 ވަނަ އަހަރުގެ މި މުއްދަތުގައި އައިސްފައިވަނީ 81،889 ފަތުރުވެރިންނެވެ. 2019 ވަނަ އަހަރާ އަޅާބަލާއިރު މިއަހަރު އައި ފަތުރުވެރިންގެ އަދަދު ވަނީ 22.4 އިންސައްތަ އިތުރުވެފައެވެ. މިއީ 2019 ވަނަ އަހަރު ފަތުރުވެރިން އައި މިންވަރަށްވުރެ އިތުރަށް ފަތުރުވެރިން އައި ފުރަތަމަ މަހެވެ.
މީގެ ކުރީ މަސްތަކަށް ބަލާއިރު، އޭޕްރިލް މަހު 145،280 ފަތުރުވެރިން ރާއްޖެ އައިސްފައިވެއެވެ. މިއީ 2019 ވަނަ އަހަރުގެ މި މުއްދަތާ އަޅާ ބަލާއިރު 10.9 އިންސައްތަ ދަށް އަދަދެކެވެ. މިއަހަރުގެ މާޗް މަސް ނިމުނުއިރު 150،748 ފަތުރުވެރިން ރާއްޖެ އައިސްފައިވެއެވެ. މިއީ 2019 ވަނަ އަހަރާ އަޅާ ބަލާއިރު 7.4 އިންސައްތަ ދަށް އަދަދެކެވެ. ފެބްރުއަރީ މަހު 149،008 ފަތުރުވެރިން އައިސްފައިވާއިރު، މިއީ 2019 ވަނަ އަހަރާ އަޅާ ބަލާއިރު 11.6 އިންސައްތަ ދަށް އަދަދެކެވެ. ޖެނުއަރީ މަހު 131،764 ފަތުރުވެރިން އައިސްފައިވާއިރު، މިއީވެސް 2019 ވަނަ އަހަރާ އަޅާ ބަލާއިރު 13.1 އިންސައްތަ ދަށް އަދަދެކެވެ.
މިއަހަރުގެ މިހާތަނަށް 677،028 ފަތުރުވެރިން އައިސްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ. މިއީ ފާއިތުވި 2021 ވަނަ އަހަރާ އަޅާ ބަލާއިރު 52.5 އިންސައްތަ އިތުރު އަދަދެކެވެ. 2019 ވަނަ އަހަރާ އަޅާ ބަލާއިރު މިއީ 7 އިންސައްތަ ދަށް އަދަދެކެވެ. މިއަހަރުގެ މިހާތަނަށް ދުވާލެއްގެ މައްޗަށް 4،702 ފަތުރުވެރިން އަންނަމުންދާކަމަށް މިނިސްޓްރީން ހާމަކުރެއެވެ. އަދި އެވްރެޖުކޮށް 8 ދުވަހު ރާއްޖޭގެ މަޑުކުރާކަމަށް ވަނީ ރެކޯޑުކޮށްފައެވެ.
މިއަހަރުގެ މިހާތަނަށް އެންމެ ގިނަ ފަތުރުވެރިން އައިސްފައިވަނީ އިންޑިއާ މާކެޓުންނެވެ. އިންޑިއާ މާކެޓު މިހާރު ޓޮޕް މާކެޓަށް ވެފައިވާއިރު، ރާއްޖޭގެ ފަތުރުވެރިކަމަށް އިންޑިއާ މާކެޓުން 13.6 އިންސައްތަ ހިއްސާކުރާކަމަށް ޓޫރިޒަމް މިނިސްޓްރީން ހާމަކޮށްފައިވެއެވެ. މިހާރު ދެވަނަ މާކެޓެއްގެ ގޮތުގައި އޮތީ އިނގިރޭސި ވިލާތް ހިމެނޭއިރު، މި މާކެޓުގެ ހިއްސާއަކީ 12.5 އިންސައްތައެވެ. ތިންވަނައިގައި ރަޝިއާ މާކެޓު އޮތްއިރު މި މާކެޓަކީ އަހަރު ފެށުނުއިރު ޓޮޕް މާކެޓުގެ ގޮތުގައި އޮތް މާކެޓެވެ.
މިއަހަރު ނިމުމުގެ ކުރިން 1.6 މިލިއަން ފަތުރުވެރިން ގެނައުމަށް ސަރުކާރުން ދަނީ މަސައްކަތްކުރަމުންނެވެ. މި މަސައްކަތުގެ ތެރެއިން، ދުނިޔޭގެ އެކި ސަރަހައްދުތަކުގައި ރާއްޖެ އިޝްތިހާރުކުރުމުގެ މަސައްކަތް ޓޫރިޒަމް މިނިސްޓްރީއާއި އެމްއެމްޕީއާރުސީ އަދި ފަތުރުވެރިކަމުގެ ދާއިރާގައި ހަރަކާތްތެރިވާ އެހެނިހެން ފަރާތްތައް ގުޅިގެން ދަނީ ކުރަމުންނެވެ.
