ޑަބްލިޔުއެޗްއޯގެ ޑިރެކްޓަރ ޖެނެރަލްކަމަށް ދެ ވަނަ ދައުރަކަށް ޓެޑްރޯސް އިންތިޚާބުކޮށްފި

ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)ގެ ޑިރެކްޓަރ ޖެނެރަލްގެ މަގާމަށް ދެ ވަނަ ދައުރަކަށް ޓެޑްރޯސް އަދަނޮމް ގެބްރެޔެސުސް އިންތިޚާބުވެވަޑައިގެންފިއެވެ.

ޑަބްލިޔުއެޗްއޯގެ ޑިރެކްޓަރ ޖެނެރަލްކަމުގެ މަގާމަށް ކުރިމަތިލައްވާފައި ވަނީވެސް ހަމައެކަނި ޓެޑްރޯސްއެވެ. ޓެޑްރޯސް އެމަގާމަށް އިންތިޚާބުކުރުމުގެ ވޯޓުލުން ކުރިޔަށް ގެންގޮސްފައިވަނީ ސިއްރު ވޯޓެއްގެ ގޮތުގައެވެ.

އިތިއޯޕިއާގެ ކުރީގެ ހެލްތު މިނިސްޓަރގެ މަގާމުގައި ހުންނެވި ޓެޑްރޯސް ޑަބްލިޔުއެޗްއޯގެ ޑިރެކްޓަރ ޖެނެރަލްކަމުގެ މަގާމަށް ދެ ވަނަ ދައުރަކަށް އިންތިޚާބުވުމާއެކު އެކި ގައުމުތަކުގެ މިނިސްޓަރުންނާއި ޑެލިގޭޓުންވަނީ ޓެޑްރޯސް އާ ސަލާންކޮށް މަރުޚަބާކިޔާފައެވެ. ޓެޑްރޯސް އެންމެ ބޮޑަށް ފާހަގަވެފައިވަނީ ކޮވިޑް-19 ޕެންޑަމިކްގެ ކަންތަކުގައި އެންމެ އިސްކޮށް ޑަބްލިޔުއެޗްއޯގެ ކަންކަން ލީޑުކުރައްވަން ހުންނެވި ބޭފުޅާގެ ގޮތުގައެވެ.

މަގާމާ ހަވާލުވެވަޑައިގެންނެވުމަށްފަހު ވާހަކަދައްކަވަމުން ޓެޑްރޯސް ވިދާޅުވީ މައިގަނޑުގޮތެއްގައި މަސައްކަތްތައް އަމާޒުކުރައްވާނީ އިމަރޖެންސީ ތައްޔާރީތައްވުމަށާއި ޑަބްލިޔުއެޗްއޯ އިތުރަށް ޚަރުދަނާކުރުމަށްކަމަށެވެ.

ޕެންޑަމިކާއެކު ކުރިން ހީވެފައިނުވާ އެތައް ކަމެއް ދަސްވެގެން ހިނގައްޖެކަމަށާއި ދަސްވިކަންކަމުގެ ބޭނުން ކުރިޔަށް އޮތްތަނުގައިވެސް ހިފަންޖެހޭނެކަމަށް ޓެޑްރޯސް ވިދާޅުވިއެވެ. މީގެއިތުރުން ޔޫކްރެއިންގައި މިހާރު ދިމާވަމުންދާ ކަންކަމުގެ މައްޗަށްވެސް އަލިއަޅުވާލެއްވިއެވެ. އެގޮތުން ހަނގުރާމައިގެ ސަބަބުން ކުޑަކުދިން މަރުވެ އެމީހުންނަށް އެންމެ އެކަށީގެންނުވާ މާހައުލެއްގެ ތެރޭގައި އުޅެންޖެހުމަށް މަޖުބޫރުވެގެންދަނީ ކަމަށާއި އެކަން އެގޮތަށް ވެގެންނުވާނެކަމަށް ޓެޑްރޯސް ވިދާޅުވިއެވެ.

އެމެރިކާ އަދި ޖަރުމަނު ހިމެނޭގޮތުން ގިނަ ގައުމުތަކަކުން ވަނީ ޓެޑްރޯސް އަށް މަރުޚަބާ ކިޔާފައެވެ. ނަމަވެސް އިތިއޯޕިއާގައި ހިނގަމުންދާ ދާޚިލީކަންކަމުގެ ސަބަބުން އެގައުމުން މާބޮޑު މަރުޚަބާއެއް ޓެޑްރޯސް އަށް ކިޔާފައެއްނުވެއެވެ.